QAMIŞLO
Şandeyên çavdêriya hilbijartinan ên ji Başûr û Bakurê Kurdistanê hatine, îro bi daxuyaniyeke ji çapemeniyê re destnîşan kirin ku hilbijartinên federaliyê li Rojava-Bakurê Sûriyeyê bi awayekî demokratîk çêbûn û ji bo giştî Rojhilata Navîn dibin mînak.
Civîn li navçeya Amûdê ya Kantona Qamişlo hat organîzekirin û şandeyan di civînê de encamên çavdêriya xwe eşkere kirin.
Pêşî li ser navê şandeya Başûr Perlementerê Herêma Başûrê Kurdistanê Şêrgo Heme Emîn axivî û got: “Bi navê Parlementoya Kurdistanê em hilbijartinên Rojava-Bakurê Sûriyeyê pîroz dikin. Li Rojava hêzên leşkerî li hemberî DAIŞ’ê li pêşiya giştî cîhanê bi lehengî li ber xwe dan. Êdî pêvajoya duyemîn a hilbijartinên federaliyê dest pê kir da ku deskeftiyên leşkerî temam bike.”
Di berdewamiya axaftina xwe de Şêrgo got “Em rêz didin hemû pêkhateyên ku dengê xwe dan: Ereb, suryan, tirkmen, ermen, asûrî û kurd tevlî hilbijartinan bûn û nûnerên xwe hilbijartin. Hilbijartin bi awayekî demokratîk bi rê ve çûn û ji bo tevahiya herêmê dibin mînak. Ev modela hilbijartinên demokratîk e. Hemû pêkhateyan bi awayekî azad û demokratîk dengên xwe bi kar anîn û di hilbijartinan de binpêkirin çênebûn.”
Şêrgo Heme Emîn gotinên xwe wiha bi dawî kir: “Em hilbijartinên ku bi saya cangorî û şervanên leheng çêbûne li tavahiya gelên Rojava-Bakurê Sûriyeyê pîroz dikin û em bi hêvî ne ku Rojhilat û Bakurê Kurdistanê jî mîna Rojavayê Kurdistanê azad bibin.”
'Çavdêriya hilbijartinan ji bo me gavekî dîrokî bû'
Li ser navê Şandeya Bakurê Kurdistanê Parlamenterê HDP’ê Nadir Yildirim axivî û got: “Çavdêriya hilbijartinan ji bo me gavekî dîrokî bû û em serbilind in ku me hilbijartin şopand. Hemû pêkhate tevlî hilbijartinan bûn û di lîsteyan de nûnerên wan jî hebûn. Ev ji bo jiyana hevbeş a herêmê gavek bû. Ji bo ronîkirina pêşeroja herêmê dibe ku hemû hikumet û gelên Rojhilata Navîn bibin şopdarê vê gavê.”
Yildirim hilbijartinên li Bakûrê Sûriyeyê pêk hatin wekî nimûneya çareseriyê ya Rojhilata Navîn nirxand û got:” Ev hilbijartin ji bo çareserkirina hemû pirsgirêkên Rojhilata Navîn peyameke demokratîk bû, em bang li hemû hêz, alî û hikumetên Rojhilata Navîn dikin ku vîna pêkhateyên Rojava-Bakurê Sûriyeyê nas bikin.”
Yidirim bal kişand ku tişta wan li Rojava-Bakurê Sûriyeyê dîqet kiriye ew e ku gelên Bakûrê Sûriyeyê naxwazin Sûriye were parçekirin û got “Di hilbijartinan de ev peyam hat dayîn. Hemû pêkhateyên Bakurê Sûriyeyê dixwazin azad û demokratîk bi hev re bijîn.”
Di nava gotinên Yildirim de hat gotin ku rewşa Rojavayê Kurdistanê ne mîna rewşa Bakurê Kurdistanê ye û ev tişt bi lêv kir:” Li Bakurê Kurdistanê û Tirkiyeyê em ji bo demokrasiyê têdikoşin û em di mercên zehmet re derbas dibin. Tecrubeya ku me ji Rojavayê Kurdistanê girtiye em ê veguhêzînin Bakurê Kurdistanê.”
'Em banga yekîtiya neteweyî dikin'
Ji bo yekîtiya netewî jî Yildirim ev tişt anî ziman: “Di vê pêvajoyê de pêdiviya gelê kurd bi yekîtiya netewî heye. Li ser vê bingehê bi navê şandeya Başûr û Bakurê Kurdistanê em bang li hêz, partî û hemû aliyên kurd dikin ku pirsgirêkên xwe yên hundirîn bidin aliyekî û kongreyeke netewî li dar bixînin.”
Yildirim gotinên xwe wiha bi dawî kir:” Em gelê Rojava-Bakurê Sûriyeyê ji bo pêşwazî û mêvandariya wan spas dikin û serkeftinê ji her kesî re dixwazin.”
Li ser pirsa “Di hilbijartinan de cudayî yan binpêkirin çêbû yan na?” Şêrgo Heme Emîn bi navê şandeyê wiha bersiv da:” Di hilbijartinan de me cudahî di navbera netew û partiyan de nedît. Em wekî şandeya Başûrê Kurdistanê û Parlamentoya Kurdistanê hilbijartinên gelê Rojavayê Kurdistanê destek dikin. Em bi navê Parlamentoya Kurdistanê hatin da ku piştgirî bidin projaya Rojava û hilbijartinan çavdêr bikin.”
Şêrgo Heme Emîn wisa dawî li axaftina xwe anî: “Li ser çavdêriya xwe ya hilbijartinên Bakurê Sûriyeyê em ê raporekê rakin Parlamentoya Kurdistanê. Di raporê de em ê têbiniyên xwe ji bo hilbijartinên herêma Firatê û Cizîrê bibêjin. Me dixwest em biçin serdana herêma Efrînê jî, lê derfet nebû.”
**
Nûçeyên eleqedar:
.jpg)
