Diyarname
Pisporên ji Mîrateya Dinyayê yên ji Skoçyayê ji bo berhemên dîrokî yên di nav şer de xisar dîtine restore bikin tên Amed û Mêrdînê.
Li ser vê yekê rojnameya îngilîz The Timesê nûçe weşand. Di nûçeyê de li ser Amed û Mêrdînê agahî hatine weşandin. Rojnameyê di nûçeyê de got ku Serokê Baroya Amedê Tahir Elçi di sermaweza 2015'an de dema ji bo parastina berhemên dîrokî li ber Minareya Çarling daxuyanî xwend û kuştin, ji wê rojê de saziyên çandî yên sivîl dibêjin heta niha ji bo vê pirsgirêkê çareserî nehatiye dîtin.
Li gor nûçeyê British Council 1.2 mîlyon pound pere ji bo vê yekê veqetandiye. Pisporên bên dê ligel hosteyên keviran ên herêmî û mîmaran bixebitin. Tê gotin ku dê bername sê salan bidome.
Dîroktorê Rêxistina Mîrateya Dinyayê yê Edinburgê Adam Wilkinson ku dê koma restoreyê bike bişîne vir li ser meseleyê wisa gotiye: "Tirsa me ya bingehîn meseleya ewlehiyê ye, emê ligel pisporên ewlehiyê nirxandinê bikin."
Nûçe dibêje her du bajar li başûrê Tirkiyeyê, li ser sînorê Iraq û Sûriyeyê ne, ji ber vê yekê piranî ji ber şer ev der xira bûye. Her wiha nûçe li ser girîngiya dîrokî ya Amed û Mêrdînê û dibêje ku taxên dîrokî yên Amed û Mêrdînê di nav Mîrateya Çandî ya Dinyayê ya UNESCO'yê de ne.
Endama Lijneya Rêveberiyê ya Komeleya Parastina Mîrateya Çandî ya Stenbolê Prof. Eva Şarlak jî ji bo nûçeyê wisa gotiye: "Li Tirkiyeyê yekemîn car projeyek wisa çêdibe. Bi alîkariya Rêxistina Mîrateya Dinyayê ya Edinburgê dê parastina dewlemendiya çandî ya her du bajaran bê parastin."
Midûrê Navneteweyî yê Mîrateya Dinyayê yê Edinburgê Krzysztof Chuchra jî wisa gotiye: "Edinburghê her gavê ji bo derve eleqe nîşan daye, bajareke navneteweyiye û ev proje jî dewlemendiya parçeyek vê kevneşopiyê ye."


Ji bo temamê nûçeyê:

- Edinburgh heritage team to help restore sites in Turkey