Diyarname

Li Almanyayê yek ji rojnameyên mezin Die Welt li ser muzakereyên Tirkiyeyê yên ji bo beşdariya Yekîtiya Ewropayê nûçe weşand. Rojnameyê got ku di civîna Wezîrên Karên Derve yên YE'yê (Yekîtiya Ewropayê) de dê rawestandina muzakereyên ji bo endamtiya YE'yê ya Tirkiyeyê bê rojevê.

Rojnameyê ragihandiye ku Komîsyona YE'yê her radigihîne ku Tirkiye mafên mirovan, azadî û rêgezên demokrasiyê bi awayekî cidî her binpê dike û ji ber van yekan dê hevdîtin bêne rawestandin.

Yek ji dîplomatên di asta jor de yê YE'yê ji bo Die Weltê axiviye û wisa gotiye: "Wezîrên Karên Derve yên YE'yê hefteya pêşiya me (28-29 avrêl) li Malta wê bicivin û meseleyê bigirin dest. Ewê ji Komîsyona YE'yê bipirsin ku Tirkiyeyê rêgezên muzakereyê binpê kirine yan na û li ser vê yekê lêkolîn bikin ku muzakereyan bidin rawestandin yan na."

Rojname diyar dike ku fikra serdest ew e ku ji bo demek muzakereyan bidin rawestandin. Ji bo biryarek wisa ji 28 endamên YE'yê pêdivî bi dengên 16 dewletan heye.