HAYDAR DİLJEN

Hefteyê verê ney, serokê YMK (Yekitîya mamosteyanê Kurdistanî) Abdulkadir Ulumaskanî facebook de, bi sernuşteyê ”Protestoyêndo sosret” (ecêb), nuşteyê vila kerd. Mamosta Ulumaskan nuşteyê xo de vano ”şagirdanê mi bi slogananê bi almankî ya, ez û dersa kurdîkî protesto kerde.” Wexto ke mi o nuşte wend, mi xorîyeya trajedîya kurdan zerrîya xo de hewna vêşî  hîs kerd.

Mamoste Ulumaskan, xeylê serrî yo ke Almanya de ciwîyêno û mamostayeya kurdkî keno. Mamostayê ma yo hêja bi kilmey a wina vano:

”Ez çend dibistanan de dersa kurdkî dana. Dibistanê de 80 domanê (gedeyê) kurdan estê, înan ra 12-13 yenê dersa kurdkî. Dersa ma çorşmeyê saet 12 de dest pa kena. Wexto ke ma dersa kurdkî de yê, şagirdê dibistane yê bînî teber de kay kenê. Domanê ke yenê derse vanê ”çirê ê xo rê kay kenê û ma yenê dersa kurdkî, ma ê zî kurdî nîy?” Helbet ez psîkolojîyê domanan fam kena, labirê mesela ay ra girdêrî û xorîyêrî ya. A roje derse dima ez ewnîyaya ke qîr-qîra domanan yena. Ez vijyaya kêberî ver ke ez çi bivîna! 7-8 şagirdê mi bi ziwanê almankî ya qîranê û vane ”Ma kurdkî ra nefret kenê, ma kurdî ra nefret kenê!” Bifikirîyê! Domanê kurdî bi almankî ya ziwanê xo protesto kenê! Ez xo ya şîya. Mi nêzana ke ez se bikera. Mi înan rê çîyê nêva. Çike sûcê domanan nîyo, ê ke ê kerdê o hal may û pîyê înan ê!

Min gore, mesela ne ez a û ne zî domanê. Ez bi heme qehr û qotikê domanan û may û pîyê înan a zî karê xo baş kena. Mesela kişta ziwan û nasnameya sistbîyayîşê may û pîyê domanan ê.

Ez zana, may û pîyê ke qaşo vanê ma welatperwerê û domanê înan şinê na dibistane, ke domanê xo birişnayê dersa kurdî, do na protestoya ecêbe nêbîyayê û ez û ziwanê kurdkî zî ma do do raştê niheqîyêya wina zalime nêyameyê. Ez na protestoya bi mana, hedîyeyê sîyasetê ma ya ziwanî, ke têk şîyo, û may û pîyê ke domananê xo nêrişenê dersa kurdkî kena:”

Mi no nuşteyê mamoste Ulumaskanî wend tepîya, mi meraq kerd û ci ra persî kerdî:

To na mesela dima bi may û pîyê doman, rayedarê dibistane, bi komel û dezgeyanê kurdan yê bînan û bi YMK ya qiseyî kerdî? Ey zî cewabê mi da û va ”Mi bi pêrina qisey kerdî. Mi may û pî zî dawetê kombîyayîşî kerdê. Ke nêrê, ez do yew yew şira keyanê înan.”

 Min go re zî na mesela meselaya asîmlasyondê 90 serran a. Polîtîkaya asîmlasyonî kurdî winî kerdê ke ziwanê xo ra şerm kenê û pa qisey nêkenê û ser o zî vanê ma kurd ê. Kurdeya bê ziwan nêbena. 

Hema-hema welatanê Ewropa pêrune de zî perwerdeyê kurdkî esto. Almanya de çar eyaletan de dersê kurdkî yenê dayene. Nezdîyê milyonê kurdî Almanya de ciwîyênê. Labelê hûmara gedeyanê ke beşdarê dersa kurdkî benê nezdîyê 2000an na. Sebebê nay o tewr gir bêxeyretêya kurdan a. Na bêxeyretêya kurdan ardimê asîmîlasyonî kena. Sebebê hedîseya ecêbe ya ke Mamoste Ulumaskan behs keno zî na ya.

24.12.2016, Yenî Ozgur Polîtîka