Amed
Endamên Komelên Hemwelatiyên Azad ji bo fatureyên av, ceryan û telefonê bi kurdî werin birîn, çalakî li darxistin.
Rêveber û endamên Komelên Hemwelatiyên Azad a taxên navçeya Sûra Amedê li ber Komela Hemwalatiyên Azad a taxa Hasirliyê ji bo fatureyên av, ceryan û telefonên welatiyan bi kurdî werin amadekirin û şandin daxuyaniya dan çapemeniyê. Rêveberên BDP'a Sûrê, rêveber û endamên Komeleyên Hemwelatiyên Azad û gelek welatî tevlî çalakiyê bûn.
Komê pankarta "Gelê kurd di saziyên fermî de bi zimanê xwe xizmetê dixwaze" hate vekirin.
Li ser navê girseyê Mamoste Medya Ormek, daxuyanî xwend. Ormek, diyar kir ku ji bo çareseriya pirsgirêka kurd, bikaranîna mafê zimanê kurdî gavekî girîng e û wiha axivî: "Li Tirkiyeyê ji ber ku pirsgirêka kurd bi awayekî demokratik nayê çareserkirin, alozî jî her rojên ku dibihurê zêde dibe. Ji bo çareseriya pirsgirêka kurd bikaranîna mafê zimanê kurdî gavekî grîng e. Heta niha bikaranîna mafê zimanê kurdî gavekî berbiçav hê nehatiyê avêtin."
Ormek, got ku hemwelatiyên Tirkiyê tev bi tirkî dipeyivin, li gor agahiyên daneyên fermî li Tirkiyeyê 52 ziman û zarava hene.
Medya Ormek da zanîn ku li Tirkiyeyê ji xeynî zimanê tirkî bi tu zimanê din xizmet nayê kirin û wiha berdewam kir: "Her ciqas Zagona Bingehîn wekî asteng bê nîşandayîn jî, weşanên Tv û rojnameyan heta niha kar û xebatên xwe berdewam kirine. Li Tirkiyeyê welatiyên kurd bi zimanê xwe li dadgehê parastina xwe nikarin bikin û kurd bi zimanê xwe perwerdehî û hîndekarî nikarin bibînin."
Ormek, destnîşan kir ku li Tirkiyeyê ziman hemû bi tirkî ye, li saziyên dewletê dan û standin, nivîsên wan tev bi yek zimanî ye.
Herî dawî Ormek, bi bîrxist ku fatureyên avê, ceryanê û telefonan welatiyên kurd bi kurdî bên birîn û got ewê li dijî polîtakayên asîmîlasyonê li ber xwe bidin û heta ku şîrketên ragihandin û saziyên din fatureyên wan yên av, ceryan û telefonê bi kurdî nebirin, dê mafê zimanê xwe bixwazin û razandina fatureyan nekin.