Ji Wan, Sêrt, Batman heta Manîsayê di 22'yê adarê de li gelek bajaran Newroz hate pîroz kirin tevî binçavkirin û birîndaran.
Vaye bajar bi bajar roja 22'yê adarê cihên ku Newroz lê hatin pîrozkirin û cihên pevçûn derketin:

Wan

Ji serê sibê de li Wanê mebûsên Wanê yên DTP'yî Fatma Kurtalan û Ozdal Uçar jî di nav de gel li ber avahiya DTP'ê gihîştin hev û diruşm qîriyan. DTP'yiyên ku tevî kincên xwe yên neteweyî xwestin tevî gel Newrozê pîroz bikin ji aliyê polîsan ve hatin hişyarkirin û dûre êrîş pêk hat. Polîsan mebûs jî di nav de êrîşê gel kir û heta niha li gor agahiyan hin birîndar hene. Her wiha heyeteke îtalyan ku ji bo şopandina Newrozê hatibûn ew jî bi êrîşê re rû bi rû ma.
Midûriya Ewlehiyê yê Wanê diyar kir ku 130 hatine binçavkirin.
Her wiha Serokê Rêxistina DTP'ê ya Bajêr a Wanê Abdurrahman Dogar jî hat binçavkirin.

Sêrt

Li Sêrtê ji ber qedeya li ser Newrozê xirecir derket. Ji serê sibê de gel xwest Newrozê pîroz bike, ji bo vê yekê li dora avahiya DTP'a Sêrtê gihîştin hev, bi vî awayî jî hêzên ewlehiyê dorpêçkirina xwe da dest pê kirin. Mebûsê DTP'ê yê Sêrtê Osman Ozçelîk, mebûsên DTP'ê yên Amede Akin Bîrdal û Aysel Tugluk ji bo bi rayedaran re biaxivin çûn avahiyê lê ne walîtî, ne jî midûriyeta emniyetê bersiva hevdîtinê nedan.
Û di vê navberê de li cihên ku dest bi pîrozbahiya Newrozê hatibû kirin êrîşa polîsan pêk hat gelek kes birîndar bûn. Jineke jî bi gule birîndar bû û rakirin nexweşxaneyê. Parlamenterên DTP'ê Osman Ozçelîk, Aysel Tugluk, Akin Bîrdal û rêveberên Navenda Giştî ya DTP'ê li nexweşxaneyê çûn serdana jina birîndar. Ozçelîk, diyar kir ku di bûyeran de gelek kes birîndar bûne wîha dom kir: "Kesên bi sivikî birîndar bûn, li ser piyan hatin dermankirin û piştre ji aliyê polîsan ve hatin binçavkirin. Gelek birîndar hene. Hinek tax hîn jî dibin ablukayê de ne. Nêzî 100 kesan dibin çavan de ne."

Culemêrg

Li Culemêrgê jî gel ji serê sibê de li ber avahiya DTP'ê de hatin cem hev. Mebûsê Culemêrgê Hamit Geylanî jî di nav de gel hatin cem hev û govend gerandin.
Piştî demekê polîsan mudexeleyên gel kir û hin kes birîndar bûn. Şaredarê Berê yê Culemêrgê Metin Tekçe ji bo bikeve navbera polîs û çalakvanan û wan aş bike ket nava hewldanê lê polîsa êrîşê wî jî kir û ew birîndar bû. Tekçe rakirin nexweşxaneyê û piştî dermankirinê ew şandin mal
 

Batman

Li Batmanê li Qada Festîvalê bi beşdariya 100 hezar kesî Newroz hat pîrozkirin. Di pîrozbahiyê de Serokê Koma Meclisê ya DTP'ê Ahmet Turk, parlementerên DTP'ê Ayla Akat Ata, Bengî Yildiz, Şaredarê Batmanê Huseyîn Kalkan, Şaredarê Bişêriyê Burhan Kurhan, Şaredarê Kercewsê Esat Oner, rêveberên DTP'yî û Cîgirê Serokê Rêxistina DTP'ê ya Batmanê M. Şirîn Tekîk, nûnerên gelek rêxistinên civakî beşdarî pîrozbahiyê bûn. DTP'yiyan bi kincên neteweyî di pîrozbahiyê de cih girtin û axaftina xwe jî bi kurdî kirin.
Piştî axaftinan Serokê Rêxistina DTP'ê ya Batmanê M. Şirîn Tekîk derket ser dikê û derbarê bûyerên li Wan, Colemêrg û Sêrtê agahî dan. Ji bo piştgiriya  çalakiyên li Culemêrg, Wan û Sêrtê gel 5 deqîqeyan çalakiya rûniştinê pêk anî. Hunermend Hekîm Sefkan jî li ser dikê qetlîama 3 roj berî niha li Qamişloyê pêk hatibû nalet kir û li hemberî girseyê 3 caran çû secdeyê. Sefkan ji bo 3 kurdên li Qamişloyê hatine qetilkirin stranek xwend. Piştî konseran Newroza bêbûyer bi dawî bû. Lê di dema belavbûnê de polîsan mudexeleyê gel kir û 8 kes girt bin çavan.

Mûş

Li Mûşê, li kêleka Stadyuma Bajêr a Mûşê pîrozbahiya Newrozê bi beşdariya 30 hezar kesî li dar ket. Di pîrozbahiyê de dengbêj Kazo bû stran pêşkêş kir û dûre ji bo protestokirina bûyerên li Wan û Culemêrgê gel 5 deqîqe çalakiya rûniştinê pêk anî û piştre pîrozbahî bi dawî bû.

Dêrsim

Li Dêrsimê ji serê sibê de bi dengê def û zirneyê gel gihîşt hev û çûn Qada Kişlayê. Pîrozbahiya Newrozê ji aliyê Komîteya Amadekar a DTP, EMEP, DHP, Partîzan, HOC, DHP, HKM û KESK jî di nav de gelek saziyên civakî yên sivîl ve hate amadekirin.
Di axaftinên ku hatin kirin re li hemberî bendavên ku wê li ser Çemê Mûnzûrê bêne çêkirin nerazîbûn hatin nîşandan. Di axaftinan de hate ziman ku divê metodên alternatîf ên enerjiyê bêne ceribandin.
Piştî axaftinan, Parlementerê DTP'ê yê Dêrsimê Şerafettîn Halîs û endamên Komîteya Amadekar a Newrozê, agirê Newrozê vêxistin. Mitînga ku beşdaran kincên herêmî li xwe kiribûn, bi konsera hunermendê kurd Mehmet Atli bidawî bû.

Riha

Li Rihayê li kêleka Otogare bi beşdariya 10 hezarî ve Newroz hate pîrozkirin.
Parlamenterê DTP'ê yê Rihayê Îbrahîm Bînîcî, Serokê DTP'a Rihayê Îbrahîm Ayhan, Endamê MP'ya DTP'ê Vakkas Dalkiliç axivîn. Newroz bê bûyer bi dawî bû lê piştî belavbûnê polîsan operasyona binçavkirinê da dest pêkirin û 123 kes hatin binçavkirin.

Manîsa

Li Manîsayê Cejna Newrozê bi beşdariya 10 hezar kesî hate pîrozkirin. Hemwaltiyên kincên neteweyî li xwe kirîn, bi flamayên kesk, sor û zer qada Newrozê wekî keskesorê xemilandin.Parlementera DTP'ê Gultan Kişanak û endamên PM'ya DTP'ê Mustafa Rollas, Kamîle Kandar jî beşdarî Newrozê bûn.
Piştî axaftinan Dengbêj Zahiro û Hunermend Sîdar Bêrîtan derketin ser dikê. Pîrozbahiyî bi govendên li ber dengê Bêrîtan hatin kişandin, bi dawî bû.

Kayserî

Li Kayseriyê bi organîzasyona ÎHD, Pîr Sultan Abdal, DTP, EMEP û ESP'ê Newroz hate pîrozkirin. Pîrozbahiya li Taxa Batalgazî ku kurd zêde dijîn jîn, li ber Muxtariya Taxê Newroz pîrozkirin, bi sedan kes anîn cem hev. Di pîrozbahiya di bin dorpêçkirina polîsan pêk hadî de, jinan kincên neteweyî li xwe kir. Her wiha pankartên "Newroz pîroz be", "Bijî Newroz", "Em zimanê zikmakî dixwazin" hatin vekirin û sloganên, "Bijî Newroz", "Bijî biratiya gelan" hatin avêtin. Bi sedan kesên beşdarî Newrozê bûn li ber agir govend girêdan.

Îzmîr

Bi boneya beşdarî Newroza li Navçeya Torbaliya Îzmîrê pêk hatî bûne 6 karkerên înşîatê hatin binçavkirin.
Operasyona binçavkirinê ya duh piştî pîrozbahiya li Qada Gundogduyê pêk hatî, dest pê kir, îro jî berdewam kir. Di çarçoveya operasyona binçavkirinê de bi boneya beşdarî Newroza li Navçeya Torbaliya Îzmîrê ya di 20'ê adarê pêk hatî bûne, 6 karkerên înşîatê hatin binçavkirin. Kesên bi hinceta, Li Îzmîrê 23'yê mehê dê li Gundogduyê Newroz bê pîroz kirin.
Di vê navberê de Serokê Rêxistina DTP'ê ya Îzmîrê Mehmet Bayraktar, li ber avahiya rêxistina partiyê ya bajêr hate binçavkirin.

Amed

Serdozgeriya Komarê ya Amedê derbarê Newroza Amedêya duh bi beşdariya bi sedhezaran pêk hatî de lêkolîn vekir. Dozgeriyê ji bo lêgerînê hemû dîmen û wêneyên polîsan kişandine ji Midûriyeta Ewlehiyê ya Amedê xwestin. Dozgeriyê ligel pankart, dowîz û sloganên di qadê hatine vekirn û avêtin, axaftinên Serokê Koma DTP'ê Ahmet Turk, Parlementera DEP'ê ya berê Leyla Zana û Şaredarê Amedê Osman Baydemîr jî lêkolîn dike. Dozgerî piştî lêkolînê dê biryarê bide.