Diyarname
Duh êvarê ji nişke ve 10 kanalên cuda yên kurdan û yên muxalif ji TURSAT'ê hatin avêtin. Bi gotinek din hatin girtin. Yek ji wan jî kanala zarokan Zarok TV bû. Kondînatora Weşana Giştî ya Zarok TV Dîlek Demîrel got; "Heta niha tenê hişyariyek jî ji bo kanala me nehatiye. Em hê jî nizanin çima girtin."
TURKSAT ku li Tirkiyeyê kanal bi ser wê re weşanê dikin Jiyan TV, Azadî TV, Denge TV, Zarok TV, Hayat TV, TV10 û Van TV girtin. Bêyî biryareke fermî ya girtina kanalan hebe bi KHK'ê (Biryara di Hukmê Qanûnê) de ew girtin. Zarok TV ku ew jî hat girtin di 21'ê adara 2015'an de dest bi weşanê kiribû. Li Tirkiyeyê û li Bakur tekane kanala zarokan e û zarokan gelek jê hez kiribû. Kanalê gelek xêzefîlm heta niha pêşkêş kirin û di vê meha rezberê de dest bi serdema weşanê ya nû jî kiribû.
Li ser girtina kanalê em bi Kordînatora Weşana Giştî ya Zarok TV Dîlek Demîral re axivîn. Demîral li dijî vê bê hiqûqiya ku Zarok TV hat girtin nerazîbûn nîşan da û got ku em li bendê ne dest ji vê gava şaş berdin.
Demîral bi vî awayî qala meseleya girtinê dike: "Duh êvarê saet li dor 20.30’an ji nişke ve weşana televîzyonê hat girtin. Em li TURKSAT’ê geriyan, ji me re gotin kuli gor KHK'ê weşan hatiye rawestandin. Komîsyona di bin serokatiya Numan Kurtuluş de ye biryara van dide. Vê komîsyonê bi KHK'ê weşana me rawestandiye. Hê teblûgatek fermî nehatiye em nizanin ji ber çi girtine jî. Em tenê dizanin bi KHK'ê girtine. Teblîx were emê binêrin ka ji ber çi girtine û li gor wê emê serîlêdanên xwe yên fermî bikin."
Demaril dibêje ku ji kesên îdam dikin jî gotina dawî dipirsin, lê yê me bêyî wê gotinê bipirsin jî hema kanal girtin.
Dîlek Demîral wisa dibêje: “Zarok TV weşana kurdî ya ku li cîhanê zarok lê temaşe dikin. Ev nêzî du salan e em bi zaravayên dimilkî û kurmancî weşanê dikin. Ji roja Zarok TV dest bi weşanê kiriye ve rastî eleqeyek mezin hat û herkesî piştgirî da me. Her roj me weşanek baştir dikir. Heta îro tu hişyariyek, yan jî cezayek li Zarok TV nehaiye birîn. Tenê sûcê me ew e ku me weşana kurdî kiriye."
Demîral diyar dike ku tu hincetek ji bo girtina weşana wan nikarin nîşan bidin, ji ber em weşanek zarokan e û weşanê bi kurdî dikin rastî vê yekê hatine.
Di dawiyê de Demîrel dibêje ji bo careke din pêşî li weşana wan vebe çi ji destê wan bê dê bikin û heta wê demê zarok dikarin ji ser malpera wan re li weşanê temaşe bikin.
Ev in navnîşanên malperên Zarok TV:
www.zarok.tv
www.zaroktv.com.tr
www.zaroktv.org
Kordînatora Weşanê ya Zarok TV Dîlek Demîral