Amed

Li Şaredariya Bajarê Mezin a Amedê bi beşdariya Hevşaredar Gultan Kişanak û Firat Anli, Endama Meclisê Serra Bucak Kuçuk, Serokê Daîreya Xurtkirina Aboriya Herîmî Necati Pirinçcioglu, nûnerên Baroya Amedê, Hewldana 78'iyan, Komeleya Mafên Mirovan, Tuhad-Fed û Meya-Derê li ser xebata Girtîgeha Amedê ku bikin muze civîneke hate lidarxistin. 

Girtîgeha Amedê di dema derbeya 12'yê Rezbera 1980'an de û salên dû de bûbû cihê îşkenceyê, bi hezaran kes li wir bi îşkenceyê re rû bi rû mabûn, hin birîndar bûbûn, hinan jiyana xwe ji dest dabû. Salên borî hikumeta AKP'ê ragihandibû ku ew dixwazin girtîgehê xira bikin û li cihê wê dibistanê çêbikin, lê saziyên sivîl ên Amedê dij derketibûn û xwestibûn ev der bibe muze. Ji bo ev der bibe muze roja 4'ê mehê li Şaredariya Bajarê Mezin pêşcivîneke hate li dar xistin. Şaredar Kişanak di civînê de got ku wan ew der di plana îmarê de wekî "qada muzeyê" diyar kirine lê xezîne dijî vê biryarê derketiye û got: "Lê ev îtîraza xezîneyê nehatiye qebûlkirin û ew der wekî 'cihê muzeyê' hatiye erêkirin."

Li ser xebata ku dê bê kirin û li ser daxwazên xwe nûnerên saziyan dîtinên xwe anîn ziman. Nûnerê Hewldana 78'iyan Gani Alkan got ku ev der ji bo bibe muze wan daxwazname berhev kirine, bi van daxwaznameya serî li Komîsyona Daxwaznameyan a Meclisa Mezin a Tirkiyeyê dane. Alkan got ku Wezareta Edelatê ya Tirkiyeyê ji bo meclisê ragihandiye ku bi çêkirina girtîgeha nû ya li Amedê re Girtîgeha Tîpa E ya Amedê dê di tîrmeha 2015'an de bi temamî bê valakirin û ji bo dîtina Wezareta Çandê jî ev agahî da: "Wezaretê gotiye ku ji bo girtîgeh bibe muze pereyên wan nîn e lê saziyeke herêmî bar bigire ser milên xwe ewê jî piştgirî bidin."

Di civînê de biryar hate girtin ku ji bo Girtîgeha Amedê bibe muze bi beşdariya gelek derdoran dê civîneke berfirehtir li dar bixin.

Wekî notek: Wezîrê Edaletê yê Tirkiyeyê Bekir Bozdag di 19'ê kewçêra 2014'an de çûbû serdana Şaredariya Bajarê Mezin a Amedê û di serdanê de Şaredar Kişanak ji Bozdag xwestibû ku ji bo Girtîgeha Amedê bikin muze girtîgehê teslîmê şaredariyê bikin.

Bozdag jî wê demê gotibû ku heta niha di vî warî de li Ulucanlar û Sînopê xebata wan çêbûye, ew dê vê daxwazê jî binirxînin.