Diyarname
Kovara Vate ke serey vernî ma kuna sera 20'inan, qeybî na joy û qeybî berzkerdişê qîmetê kirmanckî Musabeqey Hîkaye û Şîîran da dest pa kerdiş. Yê biwazê heta 28'ê sibatê 2017'inan eşkenê berhemanê xo bişrawê.

Fermo daxuyaniya qeybî musabeqeyî:

"XELATA KOVARA VATEYÎ

MUSABEQAYA HÎKAYE Û ŞÎÎRANÊ KIRMANCKÎ (ZAZAKÎ)

Kovara Vateyî bi qerarêkê Grûba Xebate ya Vateyî, aşma tebaxe ya 1997 de Stokholm de dest bi weşanê xo kerd û nika Îstanbul de weşanê xo domnena. Heta nika 48 hûmarê kovare amey weşanayene. Kovara Vateyî hûmara yewine ra heta hûmara vîstine Stokholm de, hûmara vîst û yewine ra heta nika Îstanbul de weşanîyêna. Goreyê planê redaksîyonî hûmara 50. ya kovare destpêkê aşma çeleyî ya serra 2017î de do bikewa destê wendoxan û mîyanê eynî serre de kovare biba vîstserra.

Hem seba pîrozkerdişê hûmara 50. ya Vateyî hem zî seba berzkerdişê qedr û qîymetê nuştişê kirmanckî (zazakî), Grûba Xebate ya Vateyî kombîyayîşê xoyê 29. de (30.06.2016), qerar da ke yew (jû) musabeqaya hîkaye û şîîranê kirmanckî organîze bika.

Şertê Musabeqa

1.Musabeqa hem do warê şîîre hem zî warê hîkaye de biba. Kesêk şêno/a (besekeno/a) her di waran de zî beşdarê musabeqa bibo.

2.Esero ke musabeqa rê şawîyêno (yeno rusnayene), ganî verê cayêk de nêamebîyo weşanayene (nêamebîyo neşrkerdene).

3.Hîkaye ganî (gerek) des hezar çekuyan ra zafêr nêba. Semedê şîîre sînorê çekuyan çin o.

4.Eserê ke beşdarê musabeqa benê, ganî goreyê rastnuştişê (îmlaya) Grûba Vateyî bêrîn nuştene.

5.Kesê ke îmkanê xo estê wa eseranê xo bi formo dîjîtal bişawîn (birusnîn). Kesê ke îmkanê xo çin ê, şênê (besekenê) kaxite ser o zî bişawîn..

6.Her beşdardarbîyayox/e ganî eserê xo reyde bi kilmî cuya xo binuso/a û nameyê xo yê rastikênî het naznameyêk (mexlesêk) zî binuso/a. Eser, do bi naznameyê nuştoxî/e, endamanê jurî rê şêro. Yew endamê jurî ra teber endamê jurî yê bînî, heta peynîya musabeqa do nameyê rastikên yê beşdarbîyayoxan nêzanî.

7.Xelata Kovara Vateyî seba hîkaya yewine 3000 TL, seba şîîra yewine zî 3000 TL ya. Her di eserê ke xelata yewine bigîrê, do kovara Vateyî de bêrîn weşanayene. Eke redaksîyonê kovara Vateyî munasib bivîno, şêno eseranê bînan zî kovare de biweşano.

8.Eserê Xelata Kovara Vateyî, tewr berey (erey) ganî 28ê sibata 2017î de biresî adresa “Xelata Kovara Vateyî“.

9.Xelata Kovara Vateyî, nîsana 2017î de, Dîyarbekir de îlan bena û yena dayene.

10.Nameyê endamanê jurîyê hîkayan: Munzur Çem, Deniz Gunduz, Pinar Yildiz.

Nameyê endamanê jurîyê şîîran: M. Malmîsanij, J. Îhsan Espar, Newzat Valêrî

11.Heqê her di jurîyan esto ke tu eserî (yew eserî) zî layîqê xelate nêvînî

12.Beşdarî, ganî eseranê xo bi îbareyê “Xelata Kovara Vateyî“ adresa cêrêne rê bişawîn (birusnê). Eserê ke yewna (jûna) adrese yan zî kesî rê bêrê şawitene (rusnayene) qebul nêbenê.

Adresa posteyî ya Xelata Kovara Vateyî: 

Ihsan Espar 

Eksätravägen 186 

12761 Skärholmen/SWEDEN

Seba eseranê dîjîtalbîyayeyan adresa e-mailî: ihsanespar@gmail.com"