Diyarname

'Kavar' navê herêmek e li der û dora Gola Wanê. Di heman demê de navê belgefîlmekî ye ku niha ew belgefîlm tê nîşandayîn.

Derhêner Murat Bayramoglu berê bi belgefîlmê wî "Tirkî: Pekî" zêdetir hat nasîn. Bayramolu niha ligel Tunç Erenkuş belgefîlmê bi navê "Kavar" kişandin û belgefîlm niha dê bê nîşandayîn.

Belgefîlm ku navê xwe ji wê herêmê digire, ev der herêmek li dora Gola Wanê ye. Di salên 90'î de wekî gelek gundên kurdan, herêmên kurdan herêma Kavarê û gundên têde jî têne valakirin, piraniya gundiyan berê xwe didin Stenbolê û metropolên dir. Piştî salên 2000'î ew careke din berê xwe didin gund, lê vê carê hê zêdetir bi rêxistinbûyî. Bi vê yekê re di nava xwe de nîqaş dikin dê çi bikin, çawa bikin, çi biajon, debara xwe bi çi bikin? Kooperatîf vedikin, mêşvanî, firotina şîr û gelek tiştên din... 

Piştî demekê derhêner Bayramoglu û Erenkuş berê xwe didin wê herêmê. Ji sala 2009'an heta 2013'yan gelek caran diçin, bi gundiyan re diaxivin, karên wan dikişînin û di dawiyê de belgefîlmê bi navê "Kavar" derdixin holê. Kavar çîroka wan hem aliyê bi êş, hem aliyê bi coş, di dawiyê de rewşa wê derê pêşkêşî temaşevanan dike.

Belgefîlm yekemîn car vê mehê di çarçoveya 9'emîn Rojên Belgefîlman a Stenbolê Documentarist de hat nîşandayîn. Niha jî li Navenda Fîlman a Mîthat Alan ya li Zanîgeha Bogazîçî (Kampusa Başûr) bê nîşandayîn.

Ji bo kesên bixwazin  temaşe bikin, fîlm roja 29'ê mehê saet 19'an de wê bê nîşandayîn û piştî nîşandayînê dê ligel derhêneran sohbetek çêbibe.

Murat Bayramoglu kî ye?

Bayramgolu derhênerekî kurd e, di sala 1971'ê de hatiye dinê. Li  Zanîngeha Guildhall a Londonê Beşa Ragihandin Deng û Sazkirina Dîmenê xwendiye. Heta niha hin kurtefîlm kişandine. Belgefîlmê "Turkçe: Pekîyî" kişand û "Kavar" duyemîn belgefîlmê wî ye.

Tunç Erenkuş kî ye?

Erenkuş di sala 1974'an de li Stenbolê hatiye dinê, li Zanîngeha Bîlgî ya Stenbolê Beşa Televîzyon û Sînema xwendiye. Heta niha gelek kurtefîlm û fîlmê reklaman kişandine. Ji belgefîlmên wî yê herî zêde tê zanîn "Oglunuk Erdal" e ku li ser Erdal Eren ê di 17 saliya xwe de hat îdamkirin kişandiye. Ew di heman demê de fotografan jî dikişîne.