Enqere
Mebûsên DTP'ê li hemberî êrîşên li ser partiya wan êvara 22'yê avrêlê li meclisê dest bi çalakiya rûniştinê kir. Çalakiya ku heta sibê dê dom bike de tevî 21 mebûsên DTP'ê, mebûsê Stenbolê yê ODP'ê Ufuk Uras jî beşdar dibe.

Di 2'yê adara 1994'an de jî mebûsên kurd ên DEP'ê ji bo balê bikişînin ser zor û êrîşên li ser partiya wan li meclisê dest bi çalakiya rûniştinê kiribû. Piştî 15 salan vê carê mebûsên DTP'ê heman çalakiyê pêk tînin.
Berî ku çalakiya rûniştinê pêk bê bi 15 deqîqeyan Serokê Meclisê Koksal Toptan hat cem DTP'yiyan û serdaneke hurmetî pêk anî. Toptan piştî 5 deqîqeyan ji DTP'yiyan veqetiya û çû.
Çalikiya DTP'yiyan ji êvarê 22'yê mehê heta saet 08'ê sibê ya 23'yê mehê dê dom bike.

Berî ku çalakî pêk bê Wekîlê Serokê Koma Parlamentoyê ya DTP'ê Selahattîn Demîrtaş tevî hin mebûsên DTP'ê li meclisê civîneke çapemeniyê li dar ist û  sedema çalakiya mebûsên wan anî ziman. Demîrtaş got ku, ew ji bo ku balê bikêşin ser binçavkirin û girtina DTP'iyan vê çalakiyê pêk tînin û ev yek lê zêde kir: "Em dibêjin navnîşana çareseriyê parlamento ye, bila ev banga me bê bihîstin. Bila çalakiya me baş bê fêmkirin. Divê parlamento ji bo çareseriyê însiyatîfê bigire ser xwe."

Demîrtaş li ser hilbijartinan ji sekinî û wisa got: "Ligel hemû çewsandin û rêbazên dij-demokratîk li hemberî tifaqa dewletê ya li dora AKP'ê çêbû gelê me bi awayekî zelal îradeya xwe ya azad daniye holê. DTP'ê dengên xwe du qadî zêdekirin. Bi destxistina şaredariyan serkeftineke mezin pêk anî. Ev hilbijartin ji bo gelê me ku nasname, ziman, çanda wî tê înkarkirin di riya azadiyê de bûn qonaxeke girîng. Di vê serkeftinê de rola partiya me ya ji bo çareseriya demokratîk û aştiyane ya pirsgirêka kurd hêzdar kir. Bêtehamûliya li hemberî encamên hilbijartinan di 14'ê nîsanê de ligel pêkhatina operasyonan derket lûtkeya herî jor. Heta niha zêdeyî 200 endamên partiya me di bin çavan de ne. Di nav de 3 cîgerên hevserokên me, 52 rayedar û bi dehan endamên partiya me hatine girtin. Operasyon hê jî dom dikin. Her wiha duh Şaredarê Bajarê Mezin ê Amedê Osman Baydemîr û Şaredarê Êlihê Nejdet Atalay, ligel wan serokê partiya yê Amedê ji ber axaftinên ku kirine hatine cezakirin.

Demîrtaş got ku operasyona li hemberî patiya wan siyasî ye û wiha got: "Operasyon tê wateya nenaskirina îradeya ku ji sindoqan derketiye. Ev operasyon bi armanca çewsandina îradeya azad a ji sindogan derketî û muxalefeta DTP'ê pêk hatiye. Bi vê operasyonê tê xwestin ku şîdet bê pêşxistin û konespteke nû didin destpêkirin."