Diyarname

Serokê TYB'ê (Yekîtiya Weşangerên Tirkiyeyê) Metin Celal di axaftina vekirina Fûara Pirtûkan a Stenbolê de bangî hikumeta nû ku dê çêbibe kir: "Em wekî civak aştî û hizûr dixwazin. Wekî weşanger jî em azadiya weşandinê ku di çarçoveya azadiya ramanê de dixwazin."

34'emîn Fûara Pirtûkan a Stenbolê ku ji aliyê TUYAP û TYB'ê ve tê organîzekirin bi merasima vekirinê dest pê kir. Îsal Mêvanê Rûmetê yê fûarê Tan Oral, wekî welat jî Mêvanê Rûmetê Romanya ye. Her sal bi axaftina Kordînatorê Fûarê Deniz Kavukçuoglu merasim dest pê dikir lê ji ber nexweşiya wî ji dêvla wî Kordînatora Ragihandinê Cemran Anil Oder axivî û got ku îsal bi ser 2000'î re nivîskar dê di çarçoveya fûarê de pirtûkan îmze bikin, ji bo nivîskarên wekî Aziz Nesin, Cevdet Anday jî çalakiyên sedsaliyê li dar xistine. Li ser navê TUYAP'ê jî Bulent Unal diyar kir ku li dor 700 xebatkarên wan hene, ew sipasiya her kesî dike.

'Em azadiya weşandinê dixwazin'

Serokê TYB'ê Metin Celal bal kişand ser rewşa sala dawî ya Tirkiyeyê û got ku canê me diêşe, di dema ku rewş ew qas tariye de "Bi ken nêrîna li jiyanê" ji bo me xweş hat û dûre mêvarê rûmetê Tan Oral pîroz kir.

Celal diyar kir ku li Tirkiyeyê weşangerî salê sedî 5 mezin dibe, îsal serê kesî 7.3 pirtûk dikevin. Her wiha diyar kir ku sektora weşangerî li Tirkiyeyê bi meziniya xwe li dinyayê di rêza 11'emîn de ye. Celal bal kişand ser hikumeta nû ku dê ava bibe û daxwaza xwe kir: "Em wekî civak aştî û hizûr dixwazin. Wekî weşanger em du tiştan dixwazin; yek jê em azadiya weşandinê ku di çarçoveya azadiya ramanê de ye dixwazin. Ev yek pêdiviya hemû civakê ye. Xala din jî em dixwazin hikumet pêşî li konsanê bigire. Bi awayekî fizîkî konsan kêm bûye lê di nav dîjîtalê de korsan gelek mezin bûye. Ew 'Zagona fikir û hunerê' ku gelek derdoran amade kiriye bila êdî were meclisê. Ger hinek din dereng bimîne korsana dîjîtal dê ew qas mezin bibe ku êdî emê nikaribin pirtûkan çap bikin."

Her wiha Celal sipasiya 500 hezar xwendevanên ku par hatine serdana fûarê jî kir.

Miqayesekirina pirtûkan

Şêwirmendê fûarê Dogah Hizlan jî diyar kir ku xwendevan li derve pirtûkek nivîskar dibîne, lê li fûarê hemûyan dibîne, dikare bi pirtûkên wekî wê re jî muqayeseyê bike. Her wiha Hizlan bal kişand ser gotina Y. Kemal Beyatli a wekî "meseleya me bêwênebûn e, bêwênebûn" û got ku yên tên fûara pirtûkan bila li fûara hunerê jî binêrin.

'Hatina xwendevanan hêviya mezin e'

Mêvanê Rûmetê Tan Oral jî di kurteaxaftina sipasiyê de got ku em wekî welat, dema me pirtûk dinivîsand, diweşand em rihatin cezakirin lê beramberî vê wekî lehî xwendevan ber bi pirtûkan ve tên ev yek hêviyek mezin e.

**

Nûçeyên eleqedar:

- Çima panelek jî bi kurdî nîn e? 

- ‘Li nav kurdan dîplomasî’ derket û li Fûarê ye
- Weşanxaneyên kurd ên beşdarî Fûara Stenbolê dibin diyar bûn

*** 

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.