Diyarname
Televîzyonên Bugun û Kanalturk ku di bin banê Koza Îpek Holdîngê de weşan dikirin îro hatin rawestandin.

Hikumeta Tirkiyeyê Koza Îpek Holding û şîrketên di bin banê wê de dest danîn ser û li gor xwe rêveber tayîn kirin. Wan rêveberan duh polîs şandin ser avahiyan û îro jî polîs çûn avahiyên kanalên Bugun û Kanal Turk û rojnameya Millet. Polîsan gaz avêt bi ser xebatkarên kanalê re û ketin avahiyê. Dûre çûn odeyên navenda weşanê û weşana her du kanalan dan rawestandin. Saet li dor 16.30 de weşana televîzyonan hate rawestandin.
Gerînendeyê Weşanê yê Bugun TV Tarik Toros ji rêveberên kayyumê* xwest dest nedin weşana wan. Toros wisa got: "Ez gerînendeyê weşanê yê vê kanalê me. Û ev weşan didome. Ji kerema xwe re negirin."

Hevserokê HDP'ê Selahattin Demirtaş û hin mebûsên CHP'ê jî ji bo piştgiriyê îro çûbûn kanalê.

Hikumeta AKP'ê ku berê ligel Cemaeta Fettullah Gulen kar dikir di van salên dawî de navbera wan xira bû û hikumetê berê xwe da saziyên Cemaetê. Koza Holding û saziyên navborî jî saziyên nêzî Cemaetê ne.

Demîrtaş: Ev yek isûla mafyayê ye

Demîrtaş di serdana van televîzyonan de wisa got: "Em çend kuçe geriyan encax gihîştin vir. Bi hezaran polîs vir kom kirine. Em şaşwaz bûn, mixabin na. Di Tirkiyeya AKP'ê de salên dirêj gelek caran tiştên wisa çêbûn. Tiştek gelek xemgîn e. Di dema weşana zindî ya çapemeniyê de bi awayê mafyayî, nobranê dewletek wekî rêxwistina sûcê tevdigere."

Demîrtaş got ku hûn dikarin kayyumê pêk bînin, hûnê bibêjin 'Hûn nikarin bi rê ve bibin û heta rewş asan bibe hûnê rêvberiyek tayîn bikin' lê gazavêtin, bi copan lêdana xebatkaran, bi zorê ketina hundir, ev yek isûlên mafyayê, çeteyan in.  Mirov nikare vê kirinê biparêze. Ev yek ne bi serdeçûna Koma Çapemeniyê ya Îpekê, ev yek derbeyek li hemberî azadiya girtina nûçeyan a gel e.

Têbiniya Diyarnameyê: Nav çi dibe bila bibe divê weşanek bi vî awayî neyê rawestandin. Di serdema derbeyan de bi vî awayî weşan têne rawestandin

* Kayyum: Li Tirkiyeyê hikumet li gor zagonan dest datînin ser saziyan, heta ew sazî bê firotin, yan jî rewş zelal bibe hina kesan wekî rêveber peywirdar dike. Ji vê rewşê re "Kayyum" dibêjin.