Diyarname
Du roj berê Tabura Sînor a Çalişkan a li Şirnexê Çiyayê Cudî topbaran kir û di encamê de agir bi çiyê ket. Ev du roj in agirê li Çiyayê Cudî nehatiye temirandin û dewlet, rayedar tiştek nakin. Gelê herêmê bi derfetên xwe hewl dide şewatê vemirîne lê hê encam nehatiye girtin. Ligel şewata li vir li Mêrdînê jî li qada daristanê şewat derket. 

Şaredariya Silopî wesayîtên kar û wesayîtên îtfaiyeyê şandin herêmê lê ji ber astengiyên herêmê mudaxele li şewatê nekirin. Welatî dibêjin heke bi helîkopteran nebe ne mimkûn e şewat bê kontrolkirin. Gel gazincan ji dewletê dike ku çima dest navêje meseleyê. Hevşaredarê Silopî Seyfettîn Aydemîr bertek nîşanî rayedarên dewletê yên ku tu tiştî nakin da û got heke bi helîkopteran mudaxeleyê li şewatê nekirin dê daristan bişewite.

Parlamenterê HDP'ê yê Şirnexê Faysal Sariyildiz bertek nîşanî bêndengiya rayedarên dewletê da û wiha got: "Dewlet ji bo şewata ku bi xwe derxistiye tiştekî nake. Ger ev şewat li cihek din ê Tirkiyeyê bûya dê dewlet seferber bibû ya."

Sariyildiz da zanîn ku şewat bi awayekî zanebûn ji aliyê leşkeran ve hatiye derxistin û wiha got: "Dixwazin herêmê bê mirov bihêlin." Her wiha Sariyildiz got ku piştî hewldanên wan ên demdirêj xwe gihandine Waliyê Şirnexê û got: "Di hevdîtinê de walî got ku dê bi balafiran şewatê vemirînin. Lê heta niha em ne bûne şahidê tiştek wisa. Em dizanin ku dewlet mudaxeleyî şewatên ku li Kurdistanê derdixe nake.

Sariyildiz bang li hemû gelê Şirnexê kir ku ber bi Çiyayê Cûdî ve biçin, tevlî xebatên vemirandina şewatê bibin û wiha axivî: "Divê her kes li hemberî qetlîama xwezayê seferber bibe. Heta şewata li vir nekeve bin kontrolê em ê ji vir neçin. Welat"i dê şeva xwe li Çiyayê Cudî der bas bikin."

Li Mêrdînê jî şewata daristanê



Her wiha li çoltarên navçeyên Şemrex û Dêrîkê yên Mêrdînê jî li qada daristanê şewat derket. Welatiyan ji bo xebatên vemirinadinê bidin destpêkirin agahî dan rayedaran. Welatî ji bo şewatê vemirinin ber bi herêmê ve derketin rê.