Cîhan Roj
Gelek kes ji derî karê xwe wekî ‘hobî’ bi tiştên din re mijûl dibin. Carnan hin însan ew qas xwe li hobiyan digirin pirî caran hobî ji bo wan re dibin karê sereke. Ez jî ji derî nivîskarî li peyv û biwêjên xweş û balkêş digerim. Li ser wateya wan difikirim. Carna afirandina têgehan li xweşiya min diçe. Hobiyek din jî kişandina wêneyan e.
Kerem bikin hin peyvên ku bi min balkêş tên, çend biwêj û bi tevî çend wêneyan ji xebatên hobiyê.
Selexane:
Di tirkî de wekî navdêr ‘salhane’ heye. Hevwateya, ‘mezbaha’ ye. Wekî mala serjêkirinê wate girtiye. Di kurmancî de peyva selexane wekî biwêj tê bikaranîn. Ji bo kesên bêkarî ji xwe re kirine xwî û edet tê bikaranîn. Wateya tiralî û zexeliyê nade der; taybetiya kesên selexane ew e ku kes û civak wan bi wî halî dihewînin, ji ber ku bi xwiyê wan dizanin li wan nakin şerm!
Gewende:
Ev peyv hinek nêzî peyva selexane be jî wê wateyê nade der. Kesên ku bi bedena xwe bi nav û deng in, hinek jî xwe dispêrin hêza bedenê ji bo wan tê bikaranîn. Wateya, badîgard, dide der.
Heft kir heştê helandî:
Biwêjek wekî, te pê de rî, heye. Biwêja, te heft kir heştê helandî, di heman wateyê de tê bikaranîn. Bêhtir kubarî dihewîne.
Berf bi qasî dermanê şevekê barî/ye:
Cara pêşî ku berf dibare pir tenik e. Hew şevekê li erdê dimîne. Dotira rojê dihele. Wexta berf gelek hindik tê bikaranîn ev biwêj tê bikaranîn.
Bi ser ya xwe xistin:
Li ya xwe zêdekirin. Wateya, ‘kendînî aşmak’ ya bi tirkî dide der.
Dara bêkesan:
Kesên bi bêkesan re, bi kesên bi tenê mane re dibin heval û dost ji bo wan tê bikaranîn.
Serê bêvila wî/ê jî xwî nade:
Kesên qebehet kirine, yan jî xwedî tawan in û ne bi xem in ji bo wan kesan tê bikaranîn.
***
Û çend wêneyên amatorî: Ji jiyana kurdan çend wêne
.jpg)
