Diyarname
BDP, roja 8'ê mehê* li Amedê bi civînekê dê berendamên xwe yên ji bo mebûsiyê eşkere bike. Berî eşkerekirina wê lîstiye hin navên ku ji niha de diyar bûn hene.

Di serdema nû de hedefa BDP'ê ew e ku li dor 30-35 mebûsî bişîne meclisê. Ji mebûsên heyî dê 9 kesan careke din wekî berendam nîşan nede, lê wezîfeyên din bide wan.

Di nav kesên ku vê carê dê nîşan bide de Hevserokên KCD'ê Ahmet Turk, Aysel Tugluk, mebûsa berê ya DEP'ê Leyla Zana, hunermend Ferhat Tunç, Selma Irmak, Firat Anli û Ramazan Morkoç ku ji doza KCK'ê girtî ne, dîsa nivîskar Ertugrul Kurkçu, rojnameger û derhêner Sirri Sureyya Onder dê wekî berendam bêne nîşandayîn.

BDP dike ku ji Amedê 6 mebûsan bi dest bixe ku li Amedê pêşhilbijartin ji bo berendaman hat kirin. Di vir de Dicle di rêza yekemîn, Demirtaş rêza duyemîn, Tugluk rêza sêyemîn, Emine Ayna rêza çaremîn û Ahmet İnan jî rêza pêncemîn girt.

BDP li Stenbol û Wanê li ser 4 berendaman difikire. Ji bo Şirnexê 3, ji bo Agirî, Entab, Edene, Îzmîr, Mêrsîn, Manîsa, Enqere, Hatay, Aydin, Semsûr û Bursayê jî ji xwe kiriye hedef ku mebûsek derxe.

Li gor agahiyên gihîştin ber destê me Ahmet Turk û Leyla Zana ji bilî Amedê dê li cihekê bêne nîşandayîn. Her wiha li Bedlîs û Sêrtê jî dê berendamên jin bêne nîşandayîn.

*Têbinî: BDP'ê agahiyeke nû belav kir û diyar kir ku dê roja yekşemê (10'ê mehê) berendaman eşkere bike.