Diyarname

Piştî sansurkirina fîlmê “Bakur” derhênerên din ên fîlmên wan di festîvalê de ne li hemberî sansurê fîlmên xwe bi paş ve kişandin. Li ser vê yekê rêveberiya festîvalê li hev civiya û biryar girt; piştgirî dan derhêneran û pêşbaziyên festîvalê betal kirin.

Belgefîlmê Çayan Demirel û Ertugrul Mavioglu ê bi navê “Bakur”* ku li ser PKK’ê ye bi zordariya Wezareta Çandê ya Tirkiyeyê festîvalê belgefîlm bi paş ve kişand. Li ser vê sansurê hemû derhênerên fîlmên ji Tirkiyeyê duh** li hev civiyan û biryar dan ku heta Bakur neyê nîşandayîn ew fîlmên xwe nîşan nadin. Li ser vê yeke rêveberiya Festîvala Fîlman a Stenbolê îro li hev civiya û rewşa dawî nirxandin.

Festîvalê wisa got: “Em piştgirî didin derhênerên ku fîlmên xwe bi paş ve kişandin.”

Dîrektora Festîvala Fîlmên Stenbolê Azîze Tan got ku Wezareta Çandê roja 11’ê mehê nivîsek şandiye û xwestiye ji fîlman belgeya qeyda tescîlkirinê bixwazin, ger nexwazin dê ceza li wan bibirin û wisa dom kir: “Em wekî Festîvala Stenbolê me tu demê ji beşdaran belge nexwestiye. Ji bo ku rêzikname biguhere me berê hevdîtin çêkirin. Ez hêvî dikim ev rewşa ku niha derketiye holê bibe sedem ku ji bo guherandina rêziknameyê cemaeta sînemayê bê cem hev.

Tan got ku ew piştgirî didin derhênerên ku fîlmên xwe ji festîvalê bi paş ve kişandine û got: “Xwediyên fîlman dema ku ji bo fîlmên wan hatiye veqetandin dikarin wê demê bên salonê û vê dema xwe ji bo nîqaşa ligel temaşevanan bikar bînin.”

Serokê Juriya Pêşbaziya Navneteweyî Rolf de Heer jî di civînê de axivî û got: “Juriya Pêşbaziya Neteweyî vê sansurê dijî azadiya ramanê dibîne û ji ber vê yeke ji festîvalê vekişiya ye.”

Serokê Juriya Neteweyî Zeki Demirkubuz jî wisa got: “Fîlmên herî baş di dema faşîzmê de derdikevin holê, di vê demê de yên ku aqilê wan têrî sînemayê neke bila karê sînemayê nekin. Fîlm ne sedem e, hefteyek berê kuştina qantiran jî di vê de bandorker e. Gelek berî niha biryara qedexeya fîlm hatiye dayîn.”

Li gor rewşa dawî dê pêşbazî li dar nekeve, fîlmên ji Tirkiyeyê neyên nîşandayîn lê fîlmên ji derveyî Tirkiyeyê hatine dê bêne nîşandayîn. Ji ber vê yekê jî merasima xelatdayînê û şeva dawî ya festîvalê dê li dar nekeve.

Li aliyê din derhênerên ku fîlmên xwe bi paş ve kişandin dê roja 14’ê mehê saet 15.30 de li Sînemaya Atlasê civîneke çapemeniyê li dar bixin.

Nûçeyên eleqedar:

**- Derhêner dijî sansurê derketin, niha dê çi bibe? 

*- Nehiştin 'Bakur' bê nîşandayîn 

- Ev çi 'Hal' e, çi hewal e? 

- Derî vebûn: Li Stenbolê du hefte fîlm serdest in! 

- Belgefîlmên kurdan li Festîvalê li benda we ne 

- Fîlmên kurdan li Festîvala Stenbolê dibin mêvan

- Agahiyên nû li ser Festîvala Fîlman a Stenbolê
- Pêşbaziya belgefîlman jî li festîvalê hate zêdekirin