Cemil Oguz

Bernameya Festîvala Fîlman a Navneteweyî ya Stenbolê hate eşkerekirin. Di nav bernameyê de gelek fîlmên derhênerên kurd jî hene.

Festîvala Fîlman a Navneteweyî ya Stenbolê ku ji aliyê İKSV'ê (Weqfa Çand û Hunerê ya Stenbolê) ve tê organîzekirin, îsal 34'emîn car deriyên xwe vedike. Festîvala îsal dê di navbera 4-19'ê meha avrêlê de li dar bikeve. Ji bo eşkerekirina bernameya festîvalê li Marti Otela Stenbolê merasimek hat lidarxistin. Midûrê Giştî yê ÎKSV'ê Gungor Taner, ji sponsorên fesTîvalê Midûrê Giştî yê Akbankê Hakan Binbaşgil, Dîrektora Festîvalê Azîze Tan û rojnameger û derhêneran beşdarî merasimê bûn. Taner û Tan nivîskar Onat Kutlar ku 20'emîn salvegera kuştina wî ye bibîr anîn. Her wiha Dîrektor Tan xebatên Sînema Tekê jî bibîr xist ku di nav festîvalê de li ser wan jî dê çalakî hebin.

Îsal ji 62 welatan 204 fîlmên derhêneran têne nîşandayîn. Di festîvalê de li dor 20 beşan hene û fîlm di bin van beşan de têne nîşandayîn. Her wiha pêşbaziyên neteweyî û navneteweyî jî li dar dikevin. Di nav fîlman de fîlm û belgefîlmên derhênerên kurd jî hene.

Fîlmên derhênerên kurdan di pêşbaziyan de ne

Fîlmê "Bîranînen li ser kevirî" fîlmê derhênerê kurd yê ji başûr Şewket Emîn Korkî ye. Fîlm di çarçoveya Pêşbaziya Navneteweyî de ji bo xelata Laleya Zêrîn dikeve pêşbaziyê.

Di beşa Pêşbaziya Belgefîlman jî çend belgefîlmên derhênerên kurd hene. Belgefîlmê Zekeriya Aydogan "Şilfîtazî" yek ji wan e. Belgefîlmê îhsan Kaçar û Omer Leventoglu yê bi navê "Beroj" ku li ser Kobanî ye di nav pêşbaziyê de ye. Her wiha derhêner Faysal Soysal bi belgefîlmê xwe "Kayip Zamanlar / Demên Winda" û derhêner Kazim Oz ku di vê festîvalê de heta niha gelek xelat girtine îsal bi "Çinara Spî" dibe mêvanê festîvalê.

Di pêşbaziya beşa Mafên Mirovan de jî du berhemên derhênerên kurd heney. Yek ji wan fîlmê Erol Mintaş "Klama Dayika Min" e ku di gelek festîvalan de xelat girtibû. Fîlmê din jî yê derhêner Hîşam Zeman e. Zeman bi fîlmê xwe "Nameya ji bo Qral" dikeve pêşbaziyê.

Ji derhênerên kurd Çayan Demîral vê carê ligel Ertugrul Mavioglu fîlmekî bi navê "Bakur" kişandiye. Ev fîlm di di çarçoveya festîvalê de dê derkeve pêşberî temaşevanan.

Ji hostayan fîlm

Di beşa hostayan de gelek fîlmê derhênerên navdar derdikevin pêşberî temaşevanan. Yek jiwan hostayan jî ji Îranê Muhsîn Mexmelbaf e. Fîlmê Mexmelbaf ê bi navê "The President / Serok" dê bê nîşandayîn. Her wiha hin fîlmên din jî ji Îranê dibin mêvanên festîvalê.

Ji festîvalên dinyayê 24 fîlmên ku bal kişandine, xelat girtine û eleqeyeke baş dîtine di çarçoveya "Ji festîvalên dinyayê" de têne nîşandayîn.

Salonên nîşandayînê

îsal li Beyoglu li Sînemaya Atlasê (2 salonên wê) li Beyoglu û li Navenda Çanda Fransiz, li Kadikoyê li Sînemaya Rexxê (2 salonên wê), li Ortakoy li Sînemaya Ferîkoy û li Sînemaya îstanbul Modernê fîlm têne nîşandayîn. Wekî salên din îsal jî seansên saet11.00, 13.30 û 16.00 bilêtên wan bi buhaya 5 TL û seansên saet 19.00 û hemû seansen dawiya hefteyê bi buhaya 17 TL (yên tam) û yên erzan bi 12 TL têne firotin.

28'ê vê mehê dê dest bi firotina bilêtên fîlman bê kirin.

** 

Nûçeya eleqedar:

- Agahiyên nû li ser Festîvala Fîlman a Stenbolê
- Pêşbaziya belgefîlman jî li festîvalê hate zêdekirin

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.  

REKLAM

"Ji Osmanî heta Komarê Dêrsim"