Cemil Oguz

Festîvala Fîlman a Navneteweyî ya Stenbolê îsal di navbera 4-19'ê meha avrêlê de li dar dikeve. Vane hin agahiyên nû yên li ser festîvalê:

Fîlmên xelatgir

- Di çarçoveya Galayên Akbankê de gelek fîlmên xelatgirt ên derhênerên navdar têne nîşandayîn. 14 fîlmên di vê çarçoveyê hatine amadekirin yekem car li Tirkiyeyê têne nîşandayîn.Ji fîlmê Paul Thomas Anderson û François Ozon heta fîlmê Cefer Panahi ku li Berlînê Xalat Hirça Zêrîn girt gelek fîlm hene.

Fîlmê Paul Thomas Anderson "Inherent Vice" di du waran de bûbû berendamê Oscarê.

9 derhênerî fîlmekî kişand ku di nav wan de derhênerê kurd Behmen Qubadî jî heye. Dehênerên din Guillermo Arriaga, Emir Kusturica, Amos Gitai, Mira Nair, Warwick Thornton, Hector Babenco, Hideo Nakata, Álex de la Iglesia ne ku fîlmê bi navê "Words with Gods" kişandine. Fîlm li erdnîgariya cihê li ser pergala baweriyan (ji hindû heta misilmantî) hatiye kişandin. Her yek derhênerî ji aliyek ve li meseleyê nêriye. Derhênerê kurd Behmen Qubadî dê li festivalê jî amade be.

Fîlmê Bertrand Bonello"Saint Laurent" li Cannesê berendamê Palmiyeya Zêrîn bû.

Fîlmê Oliver Hirschbiegel "13 Minutes" li ser çîroka rastîn a serdema Almanyaya Nazî hatiye kişandin. Fîlm portreya berxwedêr Georg Elser ê ku li hemberî Hîtler suîkast pêk anî pêşkêş dike. Derhêner Oliver Hirschbiegel berê jî bi navê "Downfall" (Têkçûn) li ser rojên dawî yên Hîtler fîlmekî kişandibû û gelek bal kişandibû ser xwe.

Fîlmê François Ozon "The New Girlfriend" li festîvalên San Sebastian û li St Petesburgê xelat girtibû, niha tê Stenbolê.

Derhênerê Îranî Cefer Penahî bi fîlmê xwe "Texsî" ku li Berlînê Xelata Hirça Zêrîn girt dibe mêvanê Stenbolê. Penahî ev fîlm jî bi dizî li Îranê kişandiye. Qedexeye ku ew derkeve derveyî Îranê. Di "Texsî" de portreya Îranê tê pêşkêşkirin.

'Yilanlarin Ocu' hat nûkirin

- Festîvalê heşt sal berê ligel Groupama dest bi nûkirina fîlmên klasîk ên Tirkiyeyê kir ku piştî nûkirina wan weşandinê kir. Di vê çarçoveyê de îsal fîlmê derhêner Metîn Erksan "Yilanlarin Ocu" hatiye nûkirin û tê pêşkêşkirin. Fîlmê "Yilanlarin Ocu" ku derhêneriya wî Erksan kiriye Fîkret Hakan, Nurhan Nur, Aliye Rona, Kadir Savun, Şadiye Arcıman û Erol Taş têde lîstiye. Fîlm di sala 1962'yan de hatibû kişandin û dema hatibû nîşandayîn li Enqere, Edene û hin bajarên din bûyer derketin, salonên sînemayê zirar dîtibûn. Fîlm piştî ku Serokomarê wê demê Cemal Gursel destûr dabû hatibû nîşandayîn. Fîlm ji çîroka Fakir Baykurt a bi heman navî hatiye girtin û Lijneya Sansurê ya wê demê hin sehneyên wî sansur kiribûn.

Xelatên rûmetê

- Festîval her sal Xelatên Rûmetê yên Sînemayê dide kesên ku di vî warî de bi salan ked dane. Îsal festîval xelatê dide derhêner û sazkarê fîlman Yilmaz Atadeniz, muzîkar Cahit Berkay, lîstikvan Nebahat Çehre, senarîst û derhêner Safa Onal û lîstikvan Suleyman Turan. Êvara 3'yê avrêlê di merasima vekirina festîvalê ya li Salona Lutfi Kirdan de dê bêne dayîn.

Serokê Juriya Laleya Zêrîn Demîrkubuz e

- Di festîvalê de di gelek waran de pêşbazî heye û beşa Laleya Zêrîn a Neteweyî ji fîlmên Tirkiyeyê pêk tê. Serokê Juriya Laleya Zêrîn derhêner Zekî Demîrkubuz e. Di vê beşê de di warê fîlm, derhêner, lîstikvan (jin û mêr), derhênerê dîmenê, vesazkirin, senaryo, muzîk bi giştî di 9 waran de xelat tê dayîn. Xelata ji bo Fîlmê Herî Serketî 150 hezar TL, ji bo Derhênerê Herî Serketî jî 50 hezar TL ye.

Belgefîlmê berendamê Oscarê

- Festîval her sal qîmeteke baş dide belgefîlman û ji dinyayê belgefîlmên baş tîne pêşkêş dike. Îsal yek ji wan jî belgefîlmê bi navê  “The Salt of the Earth / Xwêya Axê" ye ku bûbû berendamê Xelata Oscarê. Belgefîlmê derhêner Wim Wenders nekarî Oscarê bigire lê li gelek cihên din xelat bi dest xistiye. Niha ew di Beşa Nifşê Belgefîlman a NTV de dê bê nîşandayîn.
Her wiha ji ber vê qîmetdayînê îsal beşa Pêşbaziya Belgefîlman jî li festîvalê hatiye zêdekirin.

Bi temamî bernameya festîvalê vê hefteyê tê eşkerekirin.

**

Nûçeya eleqedar:
- Pêşbaziya belgefîlman jî li festîvalê hate zêdekirin