Diyarname
Îro nivîskarê kurd Hemîd Dilbihar hat girtin, rojnamegerê kurd Cengîz Kapmaz û siyasetmedar Mahmut Alinak hatin cezakirin.
Dilbihar birin Batmanê
Nivîskar Hemîd Dilbihar di mîtînga ziman a li Batmanê ku 10'ê vê mehê lidar ket de axaftineke kiribû. Dozgerê Komarê yê Batmanê li ser axaftina Dilbihar xwestibû îfadeya wî bigirin. Li ser vê yekê Dilbihar îro li Wanê hat binçavkirin û ew birin Batmanê.
Li Batmanê piştî îfadegirtina Dilbihar ew derxistin pêşberî dadgeh û Dilbihar hat tewqîfkirin.
Ceza dan Kapmaz
Rojnamegerê kurd Cengîz Kapmaz ji ber hevpeyvîna wî ya bi mebûsê berê yê DEP'ê Orhan Doganê rehmetî re îro ji aliyê 13'emîn Dadgeha Cezaya Giran a Stenbolê ve hat cezakirin.
Kapmaz di 22'ê pûşhera 2006'an de bi Dogan re hevpeyvîn kiribû û hevpeyvîn bi sernavê "Bila PKK bikeve meclisê di Ulkede Ozgur Gundemê de hatibû weşandin.
Di danişîna îro de Kapmaz bi 10 meh cezaya hepsê û 375 YTL pere hat cezakirin. Tevî Kapmaz berpirsê karên nivîsaran ê rojnameyê Hasan Bayar bi 2 hezar YTL û xwediyê rojnameyê Ali Gurbuz jî bi 4 hezar û 138 YTL pere hate cezakirin.
500 YTL cezayê pere dan Alinak
Danişîneke din jî îro der barê mebûsê berê yê DEP'ê Mahmut Alinak de bû. Alinak di Komeleya Xwendekaran a Kafkasê de axivî bû. Ev axaftina wî bûbû sedema dozvekirinê û îro Alinak bi 4 meh û 5 roj cezaya hepsê hat cezakirin. Dadger piştre ev ceza veguhart 500 YTL pereyî.
Ger Alinak vî pereyî nede dê dîsa bikeve girtîgehê.