Diyarname

Bi temamî 48 mîlyon û 5 hezar û 650 kes çûn cem sindoqan û dengên xwe bikar anîn. Vane notên ji îro:

- Li Rihayê di navbera berendamên moxtariyê Ali Çetindag û Muslum Babacan de pevçûn derket û berendamekî moxtar bi navê Muslum Babacan (39 salî) jiyana xwe ji dest da. Bi dehan birîndar hene.

- Li gundê Goynuk a navçeya Çobanlar a Afyonkarahisarê ji bo moxtariyê pevçûn derket, 2 jê bi giranî 7 birîndar hene.

- Li Licêya Amedê di navbera Şîrîn Camli û hin hilbijêran de pevçûn derket. Hate gotin ku Şirin Çamli ji ber qeyrana dil jiyana xwe ji dest da.

- Li gundê Karabag a Qaxizmana Qersê ji ber moxtariyê pevçûnek çekdarî pêk hat. Di encamê de berendamekî moxtariyê Zeki Demir mir û 5 birîndar hene. Tê gotin ku du jê birîna wan xidar e.

- Li Îdirê jî di navbera berendamên moxtariyê de pevçûn derket, birîndar hene.

- Li gundê Dibekli ya Qerqeliya Wanê, di navbera malbatên Erdemli û Înan de pevçûn derket. Di encamê de Cumali Erdemli, Feyat Erdemli û Şefik İnan birîndar bûn û ew rakirin nexweşxaneya Qerqeliya Wanê.

- Siyasetmedara kurd Leyla Zana piştî 18 salan yekem car dengê xwe bikar anî. Zana li Dibistana Seretayî ya Yaşar Egitim Kultur Vakfi, li cem sindoqa bi nimreya 1124 dengê xwe da.

- Li navçeya Gimgema Mûşê Serokê Giştî yê BDP'ê Demir Çelik û endamên meclisê ji bo şopandina dengan çûn ser sindoqan lê AKP'yiyan bi kêran êrîşê wan kir. Di êrîşê de Çelik jî di nav de 5 kes birîndar bûn. Li navçeyê alozî berdewam e.

- Heyeta alman a Partiya Keskan ku li ser navê Parlemena Ewropayê hat Bedlîsê her polîsan pêşî li wan girt û nehiştin karê xwe bikin.

- Li Culemêrgê mebûsê DTP'ê Hamit Geylanî çû dibistanê ku dengê xwe bide. Geylanî xwest silavê li polîsên wê derê bike lê polîsan destê Geylanî li hewayê hişt. Piştî dengdayînê amirekê emniyetê hat cem Geylanî û lêborîn xwest. Geylanî da zanîn ku ev bûyer kêmasiya pergalê ye.