Qamişlo
TEV-DEM'ê diyar kir ku piştî agirbesta ku rejîma Sûriyeyê û Artêşa Azad qaşo ji ber Cejna Qurbanê îlan kiriye, berê xwe dane kurdan û dixwazin gel bikişînin nava şerê ku tu berjewendiyên kurdan tê de nîn e. TEV-DEM'ê destnîşan kir ku ew ê di siyaseta demokratîk de israr bikin, lê divê bê zanîn ku gelê kurd jî xwedî îradeyek bihêz e û bang li gel hate kirin ku bêdeng nemîne.

Tevgera Civaka Demokratîk (TEV-DEM) têkildarî bûyerên îro (26.10.2012) li taxên kurdan ên Helebê rûdan daxuyaniyek nivîskî weşand. Di daxuyaniyê de hate destnîşankirin ku komek çekdar duh derbasî Taxa Eşrefiyê bûye û bicih bûye, lê gelê kurd ji bo ku taxa wan nebe amurek şer, ew ji taxê derxistine. Di daxuyaniyê de hate gotin ku piştî van koman artêşa rejîmê guleyên hewanê avêtin taxê û di encamê de 15 kesan jiyana xwe ji dest daye, 20 welatî jî birîndar bûn. Di daxuyaniya TEV-DEM'ê de hate destnîşankirin ku îro jî komek çekdar ku navê Artêşa Azad li xwe dike, bi armanca korçberkirina welatiyan û derxistina tirsê, riya di navbera taxên Eşrefiye û Şêxmeqsud girtin û gule berdan welatiyên sivîl.

'LI HEMBERÎ DAXWAZA HEVDÎTINÊ GULE BARANDIN'

Di daxuyaniyê de hate gotin ku piştî van bûyeran li ser daxwaza welatiyên herdu taxan, heyetek ji Meclîsa Gel û gelên li taxan hatiye avakirin û ji bo ku bi koma çekdar re hevdîtinê çêbikin ketiye nava hewldan. Di berdewama daxuyaniyê de ev agahî hatin dayîn: "Armanca vê heyetê ew bû ku koma çekdar îkna bikin da ku ji taxê derkevin. Heteyê xwest ku ji komê re ragihîne ku gelên taxê bi hemû neteweyan re naxwazin bibin amurên şer û dixwazin ewlekariya xwe bi xwe çêbikin. Lê îro serê sibê, gelê kurd bi daxuyaniya van komên çekdar ku dibêjin êdî taxa Eşrefiyê di bin kontrola wan de ye û rizgar kiriye, matmayî ma. Li ser vê yekê di saetên nîvro de gelê kurd li hemberî vê yekê meşek aştiyane lidar xist û xwest ev komên çekdar derkevin û komkuji êdî neyên kirin. Bi sedan kurd û ereb, bi zarok û mezinan li kêleka fabrîqeya asfaltê ya li sînorê taxên Eşrefiye û Şêxmeqsud kom bûn. Komê xwest ji vir heta Eşrefiyê bimeşin û ji koma çekdar bixwazin ku derkevin. Lê van komên çekdar gule berdan ser gel û di encamê de ji gelê me kuştî û birîndar çêbûne."

'RÊZDARIYA WAN A JI BO ROJÊN PÎROZ NÎN E'

Di berdewama daxuyaniyê de hate diyarkirin ku TEV-DEM'ê heta roja îro her bangawaziya xwe ji bo rawestandina kuştin û komkujiyan daye û wiha hate gotin: "Em her tim pêşniyarên rêbazên çareseriyê yên aştiyane pêşniyar kirin. Lê piştî artêşa rejîma Sûriyeyê û komên çekdar agirbest îlan kirin, em dibînin ku herdu alî girîngiyê nadin rojên pîroz. Herdu alî hewl didin ku rasete rast an jî nerasterast îradeya gel bişkînin û gel bikişînin nava şerê ku tu berjewendiyên gem tê de nîn e. Her wiha dixwazin gel bikin qurbaniyên berjewendiyên xwe û di komkujiyê re derbas bikin."

'EM Ê DI SIYASETA DEMOKRATÎK DE ISRAR BIKIN, LÊ ÎRADEYA ME JÎ HEYE'

Li ser helwesta Tevgera Civaka Demokratîk (TEV-DEM) jî di daxuyaniyê de hate gotin ku tê TEV-DEM di riya siyaseta demokratîk ku mîsogeriya Sûriyeyek demokratîk û azad e û her wiha mafên gelê kurd mîsoger dike de bi israr bike û wiha hat domandin: "Sekna li hemberî van lîstok û komployên hanê, ji erkên me ya sereke ku dê serkeftinê bixwe re bîne ye. Em dixwazin ji hêzên şer dikin re jî bêjin ku gelê kurd bi tenê nîn e û îradeyek wan a bi hêz heye."

BANGA 'NEYÊN LÎSTOKAN'

Di dawiya daxuyaniyê de bang li gelê kurd ê Helebê hate kirin ku li dijî lîstokên li dijî wan ên ku dixwazin wan bikişînin nava şerekî tu berjewendiya wan tê de tune ye, bisekinin û ev tişt hatin gotin: "Her wiha em bang li gel dikin ku li dora saziyên xwe bibin xelek. Em bang li hemû gelên Rojavayê Kurdistanê jî dikin ku li hemberî van komkujiya bêdeng nemînîn û dibin slogana 'Ma ev bû agirbesta we?' de piştgiriyê bidin gelê Helebê. "

ANF