Amed
Li Amedê, Akademiya Ziman û Wêjeya Kurdî ya Ehmedê Xanî bi merasîmekê hate vekirin.
Endamê Komîteya Ziman a KCD'ê Osman Ozçelîk di vekirinê de axivî û wiha got: "Bila Bulent Arinç biçe ji patronê xwe Fethullah bipirse ka zimanê kurdî zimanê şaristaniyê ye an na."
Akademiya Ziman û Wêjeya Kurdî ya Ehmedê Xanî hate vekirin. Navenda akademiyê li Sûra Amedê, li kêleka Mizgefta Mezin e. Di merasima akademiyê de endamê Komîteya Ziman a KCD'ê Osman Ozçelîk, Hevseroka BDP'a Amedê Zubeyde Zumrut, Serokê Enstîtuya Kurdî ya Stenbolê Zana Farqînê, Şaredarê Bajarê Mezin ê Amedê Osman Baydemîr, Serokê KURDÎ-DER'ê Burhan Zorooglu, Serokê Baroya Amedê Mehmet Emîn Aktar, rêveber û endamê Kurdî-Derê û gelek kes amade bû.
Pêşî Serokê Akademiya Ziman û Wêjeya Kurdî ya Ehmdê Xanî Hayrettîn Altun axivî û ji bo kesên beşdarî merasima vekerinê bûne spasiyên xwe pêşkêş kir. Altun got ku ji bo vekirina akademiya wan bi taybetî Roja Zimanê Zikmakî hilbijartiye û wiha got: "Zextên li ser zimanê kurdî didomin. Hê jî stranên kurdî qedexene. Divê zimanê kurdî bibe zimanê perwerdehiyê. Divê ev daxwaza gelê kurd bê cih."
Şaredarê Bajarê Mezin ê Amedê Osman Baydemîr jî diyar kir ku têkoşîna ku tê dayîn dê teqez rojekê bi ser bikeve û got: Divê zimanê kurdî bibe zimanê perwerdehiyê.
Baydemir got "Peyameke min ji bo Enqereyê û birayên min ên tirk heye" û wisa dom kir: "Hin maf hene li dora masê mirov rûdine, nîqaş dike û li ser bazarê dike. Lê hin maf hene nîqaş û bazara wan nîn e. Mirov bi ser kesek ve awir bide û bibêje 'Tu bi her du çavên xwe mêze neke' dibe? Zimanê zikmakî divê bibe zimanê perwerdehiyê. Ji Dibistana seretayî heta zanîngehê divê bibe zimanê perwerdehiyê. Nîqaş û bazara vê daxwazê tune ye. Xwedîlêderketina zimanekî, xwedîlêderketina gelekî ye, xwedîlêderketina şaristaniyê ye. Kuştina zimanek, kuştina gelekî, şaristaniyekê ye. Bi her molekulê xwe, ji bo parastina ziman û çanda gelê xwe, emê têkoşînê bidin û hemû astengiyan rakin. Bijî zimanê kurdî, zimanê me dermanê me ye."
Hevseroka BDP'a Amedê Zubeyde Zumrut jî da zanîn ku ji bo parastina ziman rola dayikan gelek girîng e.
Serokê Enstîtuya Kurdî ya Stenbolê Zana Farqînî jî got ku ev akademiya ku hatiye vekirin ji bo gelê kurd gelek watedar e.
Endamê Komîsyona Ziman a KCD'ê Osman Ozçelîk jî da zanîn ku gelê kurd bi têkoşîna xwe mafên xwe bidestxistine, berê xwe da Bulent Arinçê ku gotibû "Kurdî ne zimanê şaristaniyê ye" û wiha got: "Bulent Arinç îdîa dike ku zimanê kurdî ne zimanê şaristniyê ye. Ev encama zihniyeta dagirker e. Bila Ariç ji Fetullah Gulen bipirse û hîn bibe ku zimanê kurdî zimanê şaristaniyê ye an na. Em ji şaristaniya Mezopotamyayê tên. Em ji ber ku xwedî şaristaniyê ne ev hezar sal in nekarîn zimanê me ji holê rakin."
Piştî vekirinê Serokê KURDÎ-DER'ê Burhan Zorooglu jî got ku ev roja dîrokî di encama têkoşîna mezin de hatine dayîn. Zorooglu di berdewamiya axaftina xwe de metneke ku ji aliyê KCD, BDP, Enstîtuya KurdÎ ya Amedê, Enstîtuya Kurdi ya Stenbolê, KURDÎ-DER, Navenda Çanda Cegerxwîn, Navenda Çand û Hunerê ya Dîcle, KADEP, HAK-PAR û DÎSA'yê ve hatibû amadekirin xwend.
***
Nûçeyên eleqedar:
- Kurd ji bo Roja Zimanê Zikmakî li kuçeyan bûn
- KNK: Ala zimanê xwe bilind bikin
- Akademiya Ziman a Ehmedê Xanî vedibe