Mêvan hatibûn, wê şîv bixwarana û biçûna. Derbasî salonê bûn. Gotin hat ser bîranînan. Maliyekê çû pîncok anîn, dest bi lîstikê kirin. Şîv amade bû. Kêfxweşiyê dewam dikir. Dixwestin sohbet ber bi şevbuhêrkek xweş here. Şevbuhêrk bêyî şîrînahî nedibû. Kevaniya malê çû metbexê. Hişê wê li şevbuhêrkê bû. Bi lez û bez şîrînahî çêkir. Şîrînahî û çay li ser masê bûn. Bala her kesî çû şiklê şîrînahiyê. Bi dengek bilind, bi hev re gotin:
“Aniha, şîrînahiya em li bendê bûn, ev bû!”
Kevaniyê got: “Niyet xweş bû, ji bo ji şevbuhêrk û şahiyê nemînim, min lez kir, erê niyet xweş bû mixabin leza min ev anî serê min!"
Piştî tehmkirina şîrînahiyê deng bi mêvanan ket:
“Ew şikil û ev tehma xweşik!”
Rûyê kevaniyê sor bû, bişirî!
Roja din kevaniyê xwest ku tiştek nû biceribîne. Çû metbexê, eletexmîn, hinek arvan bi bêhnek fireh, bi hal û hemdê xwe qeland. Her ku ard reng diguhert, bêhna ardê qelandî ew dibir zarokaniya wê; dema derûcîranan xwarinek çedikir û bêhna xwarinê li kuçeyê belav dibû, zarokan digot, xwezil îşev ew bêhn ji mala me jî bihata.
Bi wê bîranînê re dengê dilê xwe guhdarî kir: ”Wê gelek xweş be!”
Ard qeliya. Ardê qelandî hinek sar bû, ew û şîrînahiya şeva din xist nav hev, bi destê xwe şikil dayê.
Rojek biharê, hewa xweş bû. Mêvanên bêxeber hatin malê. Ji bo herin li bexçeyê rûnin, çay dem kir. Dema mêvanan li ber çayê şîrînahî xwarin, gelek ecibandin, yekê got, "çi bi tehm e, te çawa çêkir? Navê wê çi ye?"
Kevaniyê li hêlekê bersiv dida, li alî din jî bi tîqetîq bû. Got:
”Ji bo meriv karibe wê tehmê bi dest bixe, gerek meriv zanibe pêşî xerab bike û pişt re meriv bi cesaret be, tişta xirab kiriye biceribîne ji nû ve çêke. Herçî nav e hema navê min lêke!”
***
Xwendevanên ezîz, ji mehê carê, ez ê bi nivîsên xwe li Dîyarnameyê bim. Bi dîtin, dîmen, kitûmatên ji ‘mala jîyanê’ bi we re bim. Carna ‘xirab bikim’ jî niyeta min ew e di avakirinê de bi israr bim! Çi baş e ku hezkiriyên edebiyatê, dost û nas, saziyên wekî Diyarnameyê ên kedkar hene, wexta mirov xirab bike jî ew dibin sebeb, mirov ji meşa xwe nemîne. Hêvî ji we dikim hûn jî bi dîtin, rexne û xwendinên xwe li kêlek qelemên kurdî bimeşin. Kerem kin.
***
Ji bo guhdarîkirinê:
