Kek Nêçîrvan Barzanî, tu hatî Stenbolê, te du qesir dîtin. Tu bi xêr hatî û bi xêr çûyî. Dibe ku niha tiştên ez binivîsim tu ji min baştir bizanibî, tu baştir bizanibî rewş çi ye, lê bi destûra te ez dîsa dixwazim binivîsim. Ha, hin kurdên me yên Bakur (Başûrî jî hene) jî hene, ji xwe re "serxwebûnxwaz" dibêjin, belkî xwe wisa nîşan didin lê li aliyê din tu dibînî dijî tevgera kurdên bakur in. Bi destûra te bila ew "serxwebûnxwaz" jî vê nivîsê bixwînin.
Yek ji wan (ez nav nedim, jixwe tu dizanî ez qala kî dikim) wisa nivîsî bû, "Leşkerên tirk ji bo parastina Kurdistaneke Serbixwe hatine Başika"...
Ka em binêrin hikumet û rayedarên vê hikumeta ku ew leşker "Ji bo parastina serxwebûna Kurdistanê" şandine Başika li Bakur çi dibêjin...
Kek Nêçîrvan roja ku tu li Tirkiyeyê bûyî û te bi Serokomarê Tirkiyeyê Recep Tayyip Erdogan û Serokwezîrê Tirkiyeyê Ahmet Davutoglu re hevdîtin pêk anîn, rêxistina sivîl a herî mezin a Bakur "Kongreya Civaka Demokratîk" (KCD) li Amedê bi awayekî awarte di civînê de bû.
KCD'ê bi encamnameyek (1) ji bo kurdan û ji bo bajarên din ên Tirkiyeyê xweserî xwest; xwest bajar û herêm ji herêmê ve bêne rêvebirin, meclisên wan hebin û gelek tiştên wisa. Lê tuyê bibêjî çi bû? Wisa bû:
Dozgerê ev welatê ku "qenciya Başûr dixwaze" der barê hevserokên partiyên kurdan (2) de ji ber vê "xweserî"yê lêpirsîn da dest pê kirin. Û rêveberên AKP'ê û Hikumeta Tirkiyeyê (ku AKP'ê hikumet saz kiriye) wisa axivîn:
Wezîrê Karên Hundir ê Tirkiyeyê Efkan Ala:
Qala xweserî dike ku KCD'ê û rêveberên HDP'ê eşkere kiriye û dibêje: "Siyaseta ku vê bîne ziman meşrûbûna wê xilas bûye."
Tê zanîn li dinyayê siyaset ji bo guherandina pergalan tê kirin. Ma ne wisaye Kek Nêçîrvan? Çawa "meşrûbûn" têk diçe? Mînak, Kek Mesûd Barzanî kurtedemek berê xwest li Başûr kurd ji bo serxwebûnê referandûmê çêbikin meşrûbûna wî ya Serokatiya Herêma Kurdistanê têk çû gelo?
Wezîrê Edaletê yê Tirkiyeyê Bekir Bozdag:
"Demîrtaş hedefên rêxistina terorê ya cudaxwaz bi awayekî zelal û eşkere anîne ziman. Ev daxuyanî îxanet e, sûc e, di asta tunebûnê de ye. Demîrtaş ji bo li meclisê di bingeha azad a demokratîk de siyasetê bike xwedî li siyaseta qirêj a terorê derketiye, bi awayekî eşkere cudaxwazî aniye ziman. Rêxistina terorê ya cudaxwaz û piştgirên wê ne sed sal bi sedan salan derbas bibe jî dê negihîjin armanca xwe. "(Ji Twittera xwe daxuyand)
Ha, ne Demîrtaş, ne jî endamên din ên KCD'ê qala parçebûna Tirkiyeyê, cudabûna kurdan ji Tirkiyeyê nekirine! Tenê qala xweseriyek kirine. Bila kes agahiyên şaş nede te Kek Nêçîrvan. Lê binêre dîsa jî vaye Wezîrê Edaletê çi bersivê dide. Ma ev edalet e? Tu jî dizanî kek Nêçîrvan, 22 welatên ereb hene hemû misilsan in. Misilmanên din jî welatên wan hene. Ma gelo di Quranê de tê gotin ku kurdên Bakur nikarin bibin xwedî mafek? Ez qala welatek jî nakim ha, tenê mafek... Dîsa tu jî dizanî ev hikumet li ser rêça Osmanî diçe. Ez bawerim haya te jê heye di serdema Osmanî de jî kurd xwedî xweseriyê bûn. De ez nizanim çima ev kesê Wezîrê Edaletê, yanê yê ku divê edaletê saz bike dijê vê xweseriyê jî dertê. Nizanim di hevdîtina we de qet qala xweseriya kurdan a di dema Osmanî de hat kirin? Nizanim te qal kir yan na, gelo kurd li Bakur dikarin bibin xwedî xweseriyek ji rêzê jî... Nizanim kurd bibin xwedî xweseriyê dê edalet pêk bê? Ger pêk bê ev Wezîrê Edaletê dê çi bike?
Kek Nêçîrvan ez dizanim ez serê te diêşînim, dema te bi gotinên xwe re mijûl dikim lê bibore ezê hin mînakên din jî bidim:
Wezîrê Ewlehiya Civakê û Xebatê Suleyman Soylu jî axiviye. Ev kes dema Serokê DP'ê bû rexneyên tûj li AKP'ê didan, niha jî wezîr e. Soylu wisa gotiye, "Ev deklerasyon demokrasiyê ji qîmetê dadixe û encamên demokratîk ji holê radike û demokrasiyê tune dihesibîne. Ger li vî welatî hilbijartin çêdibin dê encamek wê jî hebe. Ger li vî welatî demokrasî hebe divê qebûlek wê jî hebe. Bi gotinek zelal, eşkerekirin wisa (qala deklerasyonê dike) kêmînek e li hemberî demokrasiyê. Bila kes nekeve şikê, ev welat parçe nabe."(Ji çapemenî)
De ka ez çi bibêjim? Kek Nêçîrvan, tu jî dizanî çend roj berê li Katalonyayê (tu dizanî niha bi awayekî fermî parçeyek Spanyayê ye) gotin "ji bo serxwebûnê em dê referandûmek saz bikin". Ji rêveberên Spanyayê kes ranebû negot "ev demokrasiyê tune dike". Jixwe tu dizanî Katalanan ji aliyê xweseriyê ve her cure maf bi dest xistiye jî. Ka te çi got?
Berdevkê Serokomar heye, navê wî Îbrahîm Kalin e. Wî jî gotina xwe gotiye: "Tu beramberiya, qebûlkirina fanteziyên wekî rêveberiya cewherî nîn e. Civakên di nav demokrasiya kemilî de dijîn fanteziyên wisa qebûl nakin."
Xweş gotiye ne?
Ma ew tenê, mebûsên li nav AKP'ê yên "kurd" jî axivîne. Ev "kurd" bi taybetî min xist nav neynûrê bibore ha.
Ji wan Mebûsê AKP'ê Galip Ensarioglu, tu dizanî ji Amedê ye, wisa gotiye:
“Derfeta ev yek bê cih gelek lawaz e."
Çima? Ma tu ne kurd î? Tu ne ji Amedê yî? Amedî vê dixwazin, çima lawaz e? Ji ber ku tu û partiya te naxwazin ne? Em derbasî yekî din bibin kek Nêçîrvan?
Belê dîsa ji wan kurdan, Mebûsê berê yê AKP'ê Abdurrahman Kurt jî gotiye:
"Jixwe ez pêdivî pê nabînim ku îlankirinek wisa cidî bigirim, bidim nîqaşkirin jî. Ji bo bala dewletên derve bikişînin tiştek wisa kirine... Ev întîxarek e... Li Tirkiyeyê empatî ji bo kurdan çêbûbû lê vê yekê ew têk bir." (Ji bo BBC Tirkî axivî)
Ha hoo, ha hoo...
Piştî ew qas gotinan de ez nizanim ev rêveber û ev hikumet ji bo Başûr Kurdistanek serbixwe dixwazin yan na? Ger ji bo Başûr tiştek wisa bixwazin ji bo kurdên vir çima ew qas xwe tûj dikin? Ma kurdên li Başûr kurd in, kurdên li Bakur ne kurd in? Bawer bike min tiştek fêm nekir. Ka te çi got Kek Nêçîrvan?
Ez wekî birayekî te yê biçûk ji Bakur heta Başûr silavên xwe ji bo te dişînim...
.jpg)
