Her tişt bi daliqandina tabelaya Enstîtuya Kurdî ya Stenbolê re dest pê kir. Jêre digotin Ataturk Bulvari. Kolaneke gelek mezin bû; her roj ez bibêjim bi hezaran, hûn bêjin bi dehezaran erebe têre derbas dibûn...
18'ê avrêla 1992'yan bû, çend kurdhezên û kurdîhezên navsere, yên ku sal û zeman di vî karî de, ji bo vî karî derbas kiribûn hatibûn cem hev. Avahiyeke ku li wê kolana mezin mêze dikir kirê kiribûn... Dê li wir li ser kurdî xebat bikira, ew der dê biba zanîngeha ziman ji bo gelek ciwanên kurd. Heta vê derê tu problem nîn bû. Cih vebû, tabelaya xwe daliqandin. Ew çi ye? Li ser tabelayê "Enstîtuya Kurdî ya Stenbolê" dinivîse. Û wê demê problem derket; Pêşî polîs hatin ew tabela daxistin, dûre ew şopandin. Lê di xema kî de bû, ew şopand; wan xebata xwe didomand, lê bê tabela.
Bi ser vê yekê re sal derbas bûn, gelek daran pel weşand, gelek kaniyan ava xwe herikand û gelek rojan xatir ji me xwest. Û bi vî awayî me sedsala 20'an li dû xwe hişt, em ketin sedsala 21'ê... Yanê qirneke mezin ser re derbas bûbû... Û di vê qirnê de careke din tabelayên kurdan xwe nîşan dan.
Pêşî nivîskarên kurd hatin cem hev, komeleya xwe ava kirin di nav dilê Amedê de û daleqandin tabelaya xwe: Kurd Pen.
Dûre, Qursên Zimanê Kurdî,
Dûre, Kurdî-der...
Dûre...
Û yên din di rêzê de ne...
Êdî 'kurd' li kolanan ji dûr ve dixuyan...
Van coşeke mezin xist nav dilê min, ew coş di nava rehên min de herikî...
Her tabelayeke coşeke din e ji bo min, her coşeke rêwîtiyeke, xebateke û serketineke din...
Ez her tabelaya ku li ser 'Kurd' dinivîse dibînim dilê min xurtir lê dide.
Hûnê bêjin ev ji ku derket?
Niha tabelayeke din ku sala 1992'yan de hatibû daxistin tê daleqandin.
Enstîtuya Kurdî ya Stenbolê ku ji wê rojê ve kar û barê xwe li ser navê şîrketekê dikir, niha bû komeleyeke. Bi awayekî fermî navê Komeleya Enstîtuya Kurdî ya Stenbolê girt û wê di kurtedemekê de tabelaya xwe bidaleqînin. Tabelaya ku 1992'yan de hatibû daxistin dê dîsa li ser kolanê dest bihejîne ji rêwiyan re...
Yek ji kesên ku bi vê yekê dilgeş bûye jî serokê enstîtuyê Samî Tan e. Em pêşî wan pîroz dikin, ew dibêje, "Ya yekem emê pêşî tabelayê bidaleqînin, ya diduyan êdî emê bikaribin projeyan amade bikin, endaman bi awayekî fermî qeyd bikin û emê bi karibin bi awayekî fermî dersa kurdî bidin endamên xwe."
Dibe ku hûn bipirsin 'Tabela tenê bes e?'
Ew jî meseleyeke din e...
.jpg)
.jpg)
