Belê, Heqê Erdal Polat dê kî teslîm bike? Ger hûn bibêjin Erdal Polat kî ye?
Di 3'yê rêbendana 2008'an de li Amedê li hemberî serwîsa leşkerî êrîşeke bombeyî hate kirin, têde leşker û sivîl mirin. Erdal Polat jî bi îdîaya ku wî ev çalakî pêk aniye hat girtin.
Çapemeniya tirk Polat wekî kiryar nîşan da, wêneyên wî weşandin. Mixabin malperên kurdan jî wêneyê ku ji çapemeniya tirk girtin weşandin, nûçeya xwe jî wisa saz kirin.
Di 15. 01. 2008'an de di nivîsa xwe ya bi sernavê "Di nûçeyên malperên kurdan de edalet!" de min wisa nivîsîbû:
- "Her kes dizane vê mehê li Amedê teqîneke trajik pêk hat û di encamê de 6 kesî jiyana xwe ji dest da. Pêşî çend kes hatin binçavkirin û hatin berdan. Dûre kesek hat binçavkirin û çapemeniya tirk ew wekî kiryarê teqînê nîşan da, wêneyê wî weşand.
Malperên kurdan ên bi navê Hemdem, Avestakurd, Netkurdê û rojnameya Dema Nû jî ew wêne weşandiye, bêyî ku bifikirin bi rastî wî kurikî ev teqîn pêk aniye yan na. Yanê malperên me jî ketine dû çapemeniya tirk."
Çima niha min ev bibîr xist.
Ez bibêjim: Darizandina Erdal Polat meha borî jî berdewam kir (26.06.2008). Di 27.06.208'an de ajansa DÎHA'yê li ser darizandina Erdal Polat nûçeyek saz kir û di nûçeyê de tê gotin ku Polat xweparastina xwe ya ku ji 13 rûpelan pêk tê pêşkêşî dadgehê kiriye. Ajansê ji parastinê agahî pêşkêş kirine.
Polat wisa gotiye:
- "Berê jî min bi kurteparastineke gotibû ku min ev bûyer nekiriye, tu eleqeya min pêre nîn e. Emniyetê (ewlehiyê) mexsûs îfade wisa saz kiriye. Her wiha roja bûyerê telefona min a destan nîn bû, tenê dema min erebe teslîm kir min nimreyeke da xwedî erebeyê."
Li gor nûçeyê parêzerê Polat parêzer Muharrem Şahin jî di dadgehê de diyar kiriye ku Midûriyeta Emniyeta Amedê dikare nimreyê derxe holê û parêzer xwestiye muwekîlê wî bê tehlîyekirin.
Her wiha di nûçeyê de tê gotin ku Polat xwestiye parêznameya wî li çapemeniyê bê belavkirin û di parêznameyê de wisa gotiye: "Eleqeya min bi bûyerê re nîn e. Îşkeneya psîkolojîk li min kirin, ji bo ku ev zordarî zêdetir bibe avêtine ser mal û kargehên xizmên min. Emniyetê, bi şerta ku ez îfadeyê îmze bikim dê xizmên min serbest berdin û min îfade îmze kir bi zorê min birin cihê bûyerê û kişf bi min dane kirin."
Bêşik di nûçeyê de agahiyên berfireh hene, lê ev bes in. Di vê çarçoveyê de rojnameya Tarafê jî bi îmzeya Buhan Ekinci nûçeyeke weşand û di vê nûçeya Ekinci de jî agahiyên wekî yên nûçeyên DÎHA'yê hebûn.
Em vê carê bipirsin:
Çapemeniya tirk Erdal Polat wekî kiryarê bûyerê nîşan da, wêneyê wî weşand (Ji bilî Cnnturkê. Malpera Cnnturkê bi awayê ku rûyê kurik neyê dîtin wêne weşand)
Malperên kurdan ên ku li jor navên wan me rêz kirin, wan jî Erdal Polat wekî kiryarê bûyerê nîşan da û wêneyê Polat weşandin.
Ev doza ku meha borî danişîna wê li dar ket û Polat parêzname pêşkêş kir di çapameniya tirk de nebû nûçe. Yanê niha x
wendevanên çapemeniya tirk dibêjin qey ku Erdal Polat ev bûyer pêk aniye.
Her wiha ev danişîna dozê di malperên ku me li jor qala wan kir de jî nebû nûçe. Lewma xwendevanên van malperan jî dibêjin qey Polat kiryarê bûyera li Amedê ye.
Di vir de çend tişt derdikevin holê:
- Ev malperên me li dû çapemeniya tirk diçin, li wir nûçe hebe, ew ji wir digirin û ew jî çê dikin, nîn be ew jî çênakin.
- Ev malper dema kesek 'wekî kiryarê bûyerekê nîşan didin' dema ew kes vê yekê qebûl neke divê mafê wî teslîm bikin ku edalet bê cih. Dema rastiyeke derket holê çawa nûçeya şaşiyeke dikin, divê nûçeya rastiya bûyerê jî saz bikin ku edalet bê cih.
Lê encam li holê ye.
Û niha xwendevanên van malperan nizanin ku Erdal Polat parêznameyeke bi vî rengî daye dadgehê.
Bi ya we jî divê ev malper lêborînê nexwazin?
Bi ya we divê ev malper heqê Erdal teslîm nekin?
Pirseke din: Van malperan nûçeya rast saz nekir. Xwendevanên van malperan jî bi rastiyê nizanin. Em bibêjin li Amedê xwendevanekî van malperan heye û wî kesî di bûyera Amedê de xizmekî xwe winda kiriye.
Em bibêjin sibê Polat ji girtîgehê derket û li Amedê wî xizmî guleyekî bera Erdal Polat de û ew kuşt, dê çawa be? Dê qesas kî be?
Wekî notek em lê zêde bikin: Bûyer ji aliyê Erdal Polat bi xwe ve hatibe kirin (ku heta doz bi dawî nebe, heta rastî dernekevin holê, ne diyar e) jî tê zanîn di hiqûqê de ev heye; "Heta neyê çepsandin her kes mehsûm e."
Not: Yek ji wêneyên ku Netkurdê weşandiye min di vir de bi cih kir, lê rûyê Erdal Polat min xera kir ku neyê dîtin.
***
Ji bo nivîsa Cemil Oguz: Di nûçeyên malperên kurdan de edalet!
.jpg)
