Şengul Ogur / Qaqibo

Ez jî "Xewna Azadiyê" dibînim. Dibe ku sûcek be, dîtina vê xewnê, sûcekî mezin. Lê çi bikim, ne di destê min de ye, dibînim. Ji ber ku azadî, gewherê
însên e û ji ber ku ez jî însan im vê xewnê dibînim, ji ber ku ev xewna mirovahiyê ye, ezbeniyên min.

Ez jî "Xewna Aştiyê" dibînim. Dibe ku sûc be, dîtina vê xewnê, sûcekî
mezin. Lê çi bikim, ne di destê min de ye, dibînim. Ji ber ku xewna mirovahiyê
ye ev xewn û ji ber ku ez jî însanek im vê xewnê dibînim ezbeniyên min.

Ez jî "Xewna Wekheviyê" dibînim. Dibe ku sûcek be, dîtina vê xewnê, sûcekî
mezin. Lê çi bikim, ne di destê min de ye, dibînim. Ji ber ku xewna mirovahiyêye ev xewn û ji ber ku ez jî însan im vê xewnê dibînim, ezbeniyên min.

Ez jî wê xewnê dibînim ku kurd bi zimanê maka xwe perwerde dibin. Dibe ku Sûcek be dîtina vê xewnê, sûcekî mezin. Lê çi bikim, dibînim. Ji ber ku mafê her însanî ye bi zimanê maka xwe perwerde dîtin û ji ber ku kurd jî însan in ez vê xewnê dibînim, ezbeniyên min.

Ez jî wê xewnê dibînim ku zarokên me ne di zindanan de lê di parkan de bi
lîstikan dilîzin. Dibe ku sûcek be dîtina vê xewnê, sûcekî mezin. Lê çi bikim, dibînim. Ji ber ku zarok ne da ku di zindanan de birizin lê, da ku di
jiyanê de zîl bidin hatine jiyanê, ez vê xewnê dibînim, ezbeniyê min.

Ez jî wê xewnê dibînim ku jinên me ne di zindana de lê di navenda jiyanê de ne. Dibe ku sûcek be dîtina vê xewnê, sûcekî mezin. Lê çi bikin dibînim. Ji ber ku maka her însanî  jin e û ji ber ku ez jî însanek im û maka min jî jin e vê xewnê
dibînim, ezbeniyên min.
...
Ez van xewnan û gelek xewnên din dibînim ku xewnên mirovihiyê ne.
Ez van xewnan û gelek xewnên dibînim ku saweke mezin dixe dilê wan ezbeniyên min ku van xewnên me wekî sûc dibînin û wan qedexe dikin.
Ev xewnên min wekî şevreşkan têne têgihiştin ji hêla ezbeniyên min ve. Lê
ev xewnên min in dîsa yên ku dê ezbeniyên min ji wan şevreşkên wan rizgar bike.

Ezbeniyê min! Pirsek min ji we heye: Qey hûn jî Xewna Mirovahiyê nabînin?! Qey hûn jî bi destpêkirina dîtina van xewnan, xwe beşdarî prosesa avakirina
Xewna Mirovahiyê nakin!?
Bi rastî jî, ezbeniyên min! Pirseke min heye ji we: Ma qey hûn jî ne mirov in ku Xewna Mirovahiyê nabînin?!