Diyarname

Civînên Cenevre, paşê Astana, dûre niha dîsa Cenevre... Niha civînek din dê li Cenevreyê bê lidarxistin û her alî xwe amade dike. Li ser rewşa dawî nivîskara Ozgur Polîtîkayê Henîfe Hisên ku yek ji rêveberên li Rojavayê ye jî di nivîsa xwe ya dawî ya bi sernavê "Koalîsyona Sûriyê li dijî kurdan biryar girt" (06.02.2017) de dibêje ku diyar dibe ku rus dixwazin heyetek ji muxalefeta Sunî û hinekan jî ji yên li derve mane, beşdar bikin. Hisên wisa dibêje, "Ji bo kurdan û hin grûbên heya niha ne bi bandor in jî di bin însiyatîfa xwe de kom bike û wan jî wekî însiyatîfa Moskovê amade dike. Lê hîn nîqaş tên kirin. Tevî ku hîna pirr nediyar e ka wê kî heta ku derê û çawa beşdar bibe jî, Koalîsyona Niştimanî ya Sûriyê ku di nav de ENKS jî heye, civîna xwe di bin rêveberiya Tirkiyeyê de li dar xist û biryar girt ku ew ê qebûl neke PYD bi tu şêwazî beşdar bibe. Ev biryar ji milê ENKS'ê ve jî hat erêkirin."

Hisên di nivîsê de balê dikişîne ser yekîtiya kurdan, dibêje, "di demekê de ku her kes ketiye navberê da ku yekîtiya kurdan bê çêkirin, ENKS îmze avêt bin biryareke din ya li dijî partiya ku temsîla beşeke herî mezin ji kurdên Rojava dike û di rizgarkirin û parastina xaka Rojava de bi rola xwe rabûye" û wiha didomîne: "Bi rastî ev biryar û gelek biryarên din ên wekî vê ku ENKS beşdar bûye, qelîşteka nava kurdan hîn mezintir dikin û hîn zêdetir beşdarî planên bi qirêj ên li ser kurdan dibin. Êdî gelê me her roj pirs dike, ji bo yekîtiya kurdan çêbe, gelo ENKS amade ye ji nava vê koalîsyona ku her roj destê wan dikeve xwîna gelê me, derkeve û dev ji berjewendiyên xwe yên desthilatdarî û madî berde, were beşdarî têkoşîna gelê xwe bibe? Ev pirseke mezin e li benda bersivê ye."

Hisên li ser reşnivîsa ku Rusyayê amade kiriye jî disekine û dibêje: "Niha Rusya reşnivîsek amade kiriye û ew ê li ser vê reşnivîsê israr bike. Guman heye ku haya Rusya ji parçekirina Sûriyê ya li gorî federesyonên etnîkî heye, bi vê reşnivîsê dixwaze pêşiya vê parçebûnê bigire. Amerîka jî li beramberî vê, mijara herêmên bi ewle xist rojevê. Ev her du nihêrîn jî wê ji bo gelên li Sûriyê çareseriyê neyînin. Projeya federesyona demokratîk ku xwe dispêre çareseriya cografî û jiyana hevbeş, çareseriya herî guncaw e."