Fahrettîn KILIÇ - Eylem AKDAG / AMED / MA

Şanoya Bajêr a Amedê bi lîstikek nû derdikeve pêşberî şanohezan. Yekem car lîstika Don Kîşot bi kurdî hat amadekirin û wê di 29’ê hezîranê de promiyera lîstikê bê pêşkêşkirin.

Şanoya Bajêr a Amedê di qada şanoya kurdî de her ku diçe bi lîstikên nû derdikeve pêşberî şanohezan. Yekem car e ku romana Don Kîşot (Don Kîxot) wekî lîstikeke bi kurdî derdikeve ser dikê. Lîstik ji romana Miguel De Cervantes a Don Kîşot hatiye wergirtin. Ferhad Feqî ku şanonameya lîstikê amade kiriye di heman demê de derhêneriya lîstikê jî dike. Lîstik ji aliyê Dilawer Zeraq ve hatiye wergerandin.

Lîstikvanên Şanoya Bajêr Ozcan Ateş, Şahabettîn Dag, Berfîn Emektar, Dîcle Guneş Yavûz, Ozkan Şeker û Şîlan Alagoz di lîstikê de dilîzin. Wê lîstik sibê derkeve ser dika Şanoya Bajêr a Amedê û promiyera wê were pêşkêşkirin. Lîstikvanê Şanoya Bajêr a Amedê Ozcan Ateş derbarê lîstikê û xebatên xwe de ji bo ajansa me axivî.

PROMIYERA WÊ LI DAR DIKEVE

Ozcan Ateş da zanîn ku berî pênc salan jî xwestibûn lîstika Don Kîşot bilîzin lê ji ber şert û mercan nikaribûn bilîzin û wiha got: “Wê demê jî derhenêrê lîstikê Ferhad Feqî bû. Ferhad Feqî li Almanyayê dijî û karê şanoyê dike. Don Kîşot fikra wî bû. Piştî 5 salan li ser xebitî, hin sehne ji romana Cervantes derxist û ji wan şanonameyek çêkir. Pişt re li me geriya û got ‘ez dixwazim em bi hev re vê lîstika Don Kîşot bilîzin’. Me jî wekî Şanoya Bajêr a Amedê biryar da ku em bilîzin. Niha em xebatên wê didomînin. Qasî 2-3 meh in em li ser dixebitin. Niha li ber haziriyê ye. Em ê di 29 û 30’ê hezîranê/pûxperê de promiyera wê çêbikin û derkevin pêş temaşevanan.”

‘DIXWAZE BINDEST Û MAZLÛMAN BIPARÊZE’

Ateş qala naveroka lîstika Don Kîşot kir û wiha axivî: “Don Kîşot çîrokên şovalyeyan dixwîne û derdikeve rêyekê, dixwaze bindestan û mazlûman biparêze. Li hemberî kesên ku zilmê dikin, dixwaze li cem yên bindest bisekine û wan biparêze. Armanca me ya lîstikê nîşandana rastiyekê ye. Em di lîstikê de rastiyê û nerastiyê bi hev re didin nîşandan.”

WÊ DERKEVIN TURNEYAN

Ateş xwest ku xwe bigihînin hemû bajarên ku kurd lê dijîn û wiha dirêjî da axaftina xwe: “Piştî ku me li Amedê ev lîstik du caran pêşkeş kir, em difikirin mehekê navber bidinê. Piştî mehekê wê turneya lîstikê çêbibe. Li metropolên Tirkiyeyê jî wê turne li bajarên wekî Stenbol, Enqere, Îzmîr, Edene û Mêrsînê jî li dar bikeve. Heke pêdivî pê çêbibe car caran em ê li Ewropayê jî turneyan çêbikin.”

‘EM VALA NESEKININ’ 

Ateş got ku şewba vîrûsa coronayê wekî hemû beşên kar bandora xwe li xebatên çandî jî kir û wiha dom kir: “Em di vê pêvajoyê de jî vala nesikînin. Rast e me nikaribû şanoyê bilîzin lê ji xeynî şanoyê me xebatên bernameya henekan 'Hinek Henek' dan destpêkirin. Em zêdetir li ser vê sekinînin. Ji ber me nikaribû lîstikên şanoyê li ser dikê nîşanî temaşevanan bida em li ser medya civakî û ekranên televîzyonan derketin pêşberî şanohezan. Niha jî çiqas bandora pandemiyê hebe jî eleqeyek jî heye.”

AMADEKARIYA LÎSTIKEK NÛ

Lîstikvan Ozcan Ateş got ku ji bo serdema nû ew amadekariya lîstikeke nû dikin û wiha got: “Niha navê lîstikê ne diyar e lê wê di nava serdema nû de xebateke din dest pê bike. Em zêdetir li ser lîstikên zarokan difikirin. Divê teqez em lîstikeke ji bo zarokan çêbikin.”

‘EM BI SAYA TEMAŞEVANAN LI SER PIYAN IN’ 

Ateş diyar kir ku temaşevan bi awayekî rehet dikarin li şanoya wan temaşe bikin û axaftina xwe wiha bi dawî kir: “Temaşevan pir bi rihetî dikarin werin lîstikan temaşe bikin. Ji ber ku me bergiriyên pandemiyê girtine. Em bi saya temaşevanan li ser piya ne, em sipasiya temaşevan û xelkê xwe dikin ku temaşeyî lîstikên me dikin.”