AMED
Hemîd Edalet Millan di Konferasna Zimanê Kurdî ya Neteweyî de axivî û diyar kir ku pirsgirêka perwerdehiya zimanê kurdî ji ber perçekirina erdnîgarî û siyasî pêktê. Millan, anî ziman ku heke girîngiyê nedin perwerdehiya zarokan a bi kurdî dê nifşek ji kurdî dûr ketî mezin bibe."

Konferansa Ziman a Neteweyî di roja 3'yemîn de bi panela "Ji Pêşdibistanê Heta Zanîngehê Pergaleke Çawa?" dest pê kir. Di panela ku moderatoriya wê Sebahattîn Gultekîn dikir de Haydar Diljen, Temoz Şemalî, Hemîd Edalet Millan û Yusuf Bîlgîç axivîn.
Haydar Diljen, diyar kir ku ji bo perwerdehiya kurdî divê pergala perwerdehiyê ya Tirkiyeyê bê guherîn. Diljen got ku pergala pewerdehiyê ya Tirkiyeyê li ser parastina dewletê hatiye avakirin û ji ber vê yekê destûrê nade ku zimanên din bibin zimanên perwerdehiyê.

'Divê bernameyên perwerdehiyê yên înternetê bên şopandin'

Diljen, da zanîn ku ji bo perwerdehiya bi kurdî pêşbikeve û pergala wê baş bê rûniştinadin divê zarok û ciwan bi awayekî baldar li ser perwerdehiyê bisekinin. Diljen, bilêv kir ku ji bo pergala perwerdehiyê ya kurdî pêk bê û di nav sazîbûnekê de pêş bikeve divê ciwan li ser înternetê bernameyên perwerdehiyê bişopînin.

Divê ji bo perwerdehiya kurdî mamoste bên amadekirin

Temoz Şemalî jî diyar kir ku di pergala perwerdehiyê de têkiliya mamoste û xwendekar ji bo hev binasin gelek girîng e. Şemalî, anî ziman ku ji bo perwerdehiya bi kurdî bi awayekî rêk û pêk pêşbikeve divê mamoste bên gihandin. Şemalî, da zanîn ku divê ji bo perwerdehiyê ji teknîk û teknolojiyê fêde bên girtin.

'Dibe ku nifşekî ji kurdî dûr mezin bibe'

Hemîd Edalet Millan jî diyar kir ku kurdan berhemên wêjevanên wekî Cegerxwîn û Ehmedê Xanî xwendin û girîngî dan ziman. Millan, anî ziman ku pirsgirêkên di qada perwerdehiya bi kurdî de pêk tên ji ber sedemên perçekirina erdnîgarî û siyasî pêk tên. Millan, da zanîn ku heke zarok girîngiyê nedin perwerdehiya zimanê kurdî dibe ku nifşekî ji kurdî dûr mezin bibe. Millan bilêv kir ku ji bo kurdî bi awayekî rêk û pêk bê bikaranîn divê ji kesên pîr ên li gunda dijîn têkildarî ziman de agahiyan wan teqez li ber çavan bên girtin.

Yusuf Bîlgîç jî têkildarî ziman û girîngiya ziman de axivî.

Ji DÎHA'yê hatiye girtin