Diyarname

Tîma Fûtbolê ya Şaredariya Bajarê Mezin a Amedê "Diyarbakir BB" ku ji bo lîgê amadehiyên xwe dike, dê maçeke xweamadekirinê bi Zaxo Sporê re bilîze.

Diyarbakir BB par di Lîga 3'yem a Tirkiyeyê de bûbû şampiyon û derbasî Lîga 2'yemîn bûbû. Tîma Fûtbolê ku îsal dê di Lîga 2'yemîn de bilîze, amadehiyên xwe yên ji bo lîgê didomîne.

Zaxo Spor ku ji Federasyona Fûtbolê ya Iraqê destûr girtibû û xebatên xwe yên amadehî li Bakur dikir, dê du rojan bibe mêvanê Diyarbakir BB'yê.

Zaxo Spor ku li Amedê xebatên xwe yên amadehî didome roja 25'ê mehê dê li Tesîsên Şilbe ya Diyarbakir BB'yê bi hev re maçeke bilîzin. Maç wê saet 16.30 de dest pê bike.

Serokê Klûba Şaredariya Bajarê Mezin a Amedê Prz. Metin Kilavuz li ser maçê wia got: "Di serdemeke ku Rojhilata Navîn bûye gogek ji agir de, li gor rihê sporê, em di wê baweriyê de ne ku divê dengê aştiyê bilind bibin. Bi hêviya ku ev maça me dê bibe wesîleya aştiyê, di serî de komkujiya li Rojava, em komkujiya li Misir û Sûriyê ya li hemberî sivîlan şermezar dikin."

Li Tirkiyeyê maçên Lîga Super a Spor Totoyê û Lîga 1'emîn a PTT'yê dest pê kirin, lê maçên Lîga 2'yemîn û Lîga 3'yemîn dê 7 û 8'ê meha pêşiya me de dest pê bikin. Diyarbakir BB dê di Lîga 2'yemîn Koma Sor de maça xwe ya yekemîn li deplasmanê, li mala Îskenderun Demir Çeliksporê bilîze.

***

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.