Diyarname

Nivîskar Cîhan Roj bi romaneke nû li pêşberî xwendevanêr xwe ye: Serkêş. Roj dê di Fûara Pirtûkan a Stenbolê de pirtûka xwe îmze bike û beşdarî gotûbêjeke bibe.

Nivîskarê malpera me Cîhan Roj "Mexa Moriyan", "Gîtara Bê têl" û "Perde"yê vê carê bi romaneke din, bi "Serkêş"ê li pêşberî xwendevanan e. Cîhan Roj di çîrok û romanên xwe de dikeve nav rihê karakteran, jiyana wan, ji nav jiyana kurdan mînakan, bûyeran pêşkêş dike. Rihê kurdewarî derdixe pêş. Di vê romana xwe de bi ser malbateke esilkurd ku êdî li metropolekî Tirkiyeyê hay ji kurdbûna xwe tune re mijareke nû û modern digire dest. Sûnaya parêzer ku bavê wê jî parêzer e xwendevanan di nav bûyeran de digerîne...

Serkêş bi zimanekî herikbar hatiye nivîsandin û romaneke serketî ye; belkî mirov dikare bibêje ev roman ji romanên din ên Cîhan Roj baştir û serketîtir e. Bi vê romanê Cîhan Roj gaveke din nivîskariya xwe pêşvetir biriye.

Weşanên J&J ku romana "Serkêş" weşandiye, romana Cîhan Roj a din "Gîtara Bê Têl" jî bi çapeke nû derxistiye.

Nivîskar Cîhan Roj di Fûara Pirtûkan a Stenbolê de wê rojên 11,12 û 13'yê mehê pirtûkên xwe îmze bike. Her wiha 12'yê mehê ligel Abdullah Pertev Işik, Omer Dilsoz dê Cîhan Roj beşdarî panela bi navê "Romana Kurdî" bibe û dîtinên xwe bîne ziman.

Cîhan Roj kî ye?

Nivîskar Cîhan Roj di sala 1965'an de li gundê Înaqa ya Gimgima Mûşê hatiye dinê. Dibistana seretayî li gund, ya navîn û lîse li Gimgimê xwendiye. Ew ji sala 1993'yan ve bi kurdî dinivîse. 

Pirtûkên wî:

- Ratîka, helbest, Weşanên Sî, 2002

- Meyman, çîrok, Weşanên Lîs, 2006

- Deriyê Çîrokê, çîrok, Weşanên Do, 2008

- Aqil Diçe Sewda Dimîne, helbest, Weşanên Do, 2008

- Gîtara Bê Têl, roman, Weşanên Do, 2009

- Meya Moriyan, roman, Weşanên Evrensel, 2011

- Perde, roman, Weşanên Na, 2012

- Sehne, çîrok, Weşanên Yekîtiya Nivîskarên Kurd a Dihokê, 2013

- Serkêş, roman, Weşanên J&J, 2014

Serkêş / Cîhan Roj / Roman / 188 Rûpel / Weşanên J&J / 2014