Memed Drewş
Şewa 15’ê êlule ra na kişt, Kobanê êrişanê girdana rî bi rî yo. O roj ra na kişt, mayê Kobanê’ya rakewnê û Kobanê’ya werzenê. Hinî winî biyo, Kobanê teniya Kobanê niyo. Eynî wext di, Kobanê teniya Kobanê eleqeder nêkeno. Kobanê kilîtê şoreşa Rojawan akerd. Şoreşê Rojawan, Kobanê di dest kerd ci, vilayê cayanê bînan bi. Kobanê rayverîn û serantîna şoreşê Rojawan kerd.
***
Kobanê rojê siftayin ê şoreşî ra na kişt, biyo hedefê dewleta tirk û çeteyanê ay. Dewleta tirka çiyê ki, bi xo nêşena bikiro, bi destê çeteyanê xoya kena. Nameyê ê çeteyan bivuriyo jî, quwetê înan pey di, nêvuriyeno. Nameyê ê çeteyan El Nûsra bo jî û DAIŞ bo jî, quwetê esasî ê quwetan rêşeno Kobanê û cayanê bînan ê Rojawan ser, dewleta tirk bi xo ya.
***
Dewleta tirk rojê şoreşê Rojawan ra na kişt, wazena verniyê şoreşî bigiro. Qandê rijnayinê Şoreşê Rojawan heme çî kerd û kena. Çimê dewleta tirk kantonanê Cizîr û Efrîn nêweno. Kobanê zey loxmeyê werdî vînena. Coka çeteyanê DAIŞ kena warî, tanq, top û tifînganê girdan dana înan û rêşena Kobanê ser. Kobanê zey kilîtê girotinê keverê azadiyê kurdan vînena. Coka heme îmkanê xo seferber kerdê.
***
Kobanê qandê kurdan jî, teniya cayo şoreşa Rojawan dest kerd ci niyo. Kobanê keverê şoreşê Rojawan akerd. Kobanê ewro qandê ma kurdan, cayê kilîtê azadî yo. Raya azadiya ma, hinî Kobanê ra ravêrena. Coka Kobanê teniya Kobanê niyo. Coka Kobanê teniya kobanijan eleqeder nêkeno. Xoverdayinê Kobanê aqûbetê ma pêrin eleqeder keno. Senî Kobanê keverê Şoreşê Rojawan akerd, xoverdayinê nika jî bişo keverê azadiyê pêrinê kurdan akiro.
***
Şiyayinê xeta sînor ê bi hezaran kesan çiyo muhîm o. Lazimo amorê kesê şinê xeta sînor zaf bo. Şiyayinê xeta sînorê Kobanê, teniya şiyayinê xeta sînor niyo. Eynî wext di, şiyayinê vera azadiyo. Berzkerdinê xoverdayinê Kobanê yo. Girotinê verniyê çeteyan û planê lîmin ê dewleta tirk o. Her darbeya çeteyê DAIŞ Kobanê di bûrê, hesabê dewleta tirk bixerpiyo. Coka wexto ki, Kobanê di, çeteyê DAIŞ darbeyan wenê, quwetê tirk benê harî û êrişê şêligê şiyo xeta sînor kenê. Coka lazimo ma, bi fikrê Kobanê teniya Kobanê niyo, heme hetan ra xoverdayinê Kobanê berz bikirê.
26.09.2014 / Azadiya Welat