SERÊKANÎ

Çeteyên koma bi navê Dewleta Îslamî ya Iraq û Şamê (DAIŞ) ên ser bi El Qaîdeyê, roja 29'ê mehê avêtin ser hin gundên li herêma Serêkaniyê ya rojavayê Kurdistanê û komkujî pêk anîn. Li gorî agahiyên destpêkê, jin, mêr û zarok jî di nav de herî hindik 15 sivîl hatine qetilkirin.

Li gorî agahiyên nûçegihanê ANF'ê ji Serêkaniyê ragihand, çeteyên DAIŞ'ê êrîşî gundên Tilêliyê, Temad û Ovencakê yên Serêkaniyê kirin.

Hat ragihandin ku jin, mêr, zarok her kesên li van gundan dijîn, bi awayekî komî hatine qetilkirin. Der heqê hejmara miriyan de hejmareke zelal nîn e, lê tê gotin ku ev hejmar gelekî zêde ye. Li gorî agahiyên destpêkê 7 jê zarok cenazeyê herî hindik 15 kesan hatiye dîtin.

Ji dîmen û wêneyên ji herêma komkujiyê hatine tê dîtin ku cenazeyê gelek sivîlan li erdê ne. Di nava cenazeyên hatin komkirin û li wesayîtekê hatin barkirin de, cenazeyê herî hindik 4 zarok û jinek hene. Gelek ji wan, organên wan ên hundirîn derketine derve.

Li gundên ku hînê dûxan jê bilind dibin, xuya dike ku mirov hewl didin ji gundan birevin. Yek ji gundiyê ku şoqa komkujiyê derbas kir, li ber dîwêr rûniştiye û serê xwe xistiye nava lepên xwe.

Piştî ku komkujî hat bihîstin şervanên YPG'ê û YPJ'ê destwerdan kirin û ji bo parastina welatiyên sivîl ên herêmê bersiva çeteyan DAIŞ'ê dan.

Çavkaniyeke YPG'ê destnîşan kir ku çeteyên DAIŞ'ê li gundê El-Rawiyê û El-Dehmaa yên Serêkaniyê li hemberî şervanên YPG'ê bin ketin û ji ber vê jî li dijî welatiyên herêmê yên sivîl komkujî pêk anîne.

Çeteyên DAIŞ'ê ku bi taybetî li aliyên Til Ebyad û Cerablûsê bi Tirkiyeyê re xwedî têkiliyeke nêz in, ji destpêka meha adarê û vir ve li dijî herêma Kobanê dest bi êrîşan kiribûn. Lê belê li hemberî YPG'ê windahiyên giran dabû û ev pêla wan a êrîşan têk çûbû.