WAN 

TUHAD-FED ji bo balê bikişîne ser biryara darvekirina derheqê 59 siyasetmedarên kurd ên ku Komara Îslam a Îranê biryara darvekirina wan daye, li ser sînor çalakiya greva birçîbûnê ya 3 rojan da destpêkirin. Hevseroka KCD'ê Aysel Tugluk bang li Îranê kir ku dest ji biryara darvekirin berde.

TUHAD-FED ji bo balê bikşîne ser biryara darvekirinê ya ku Komara Îslam a Îranê derbarê 59 siyasetmedarên kurd de, û trajediya Somayê şermezar bikin li Deriyê Sînor ê Kapikoy ya navçeya Seray ya Wanê meş li dar xist û kona ji bo nobetgirtinê vedan. Di meşê de hevparên TUHAD-FED'ê yên Mûş, Bazîd, Gever, Amed û Wanê, Hevseroka KCD'ê û Parlementera Wanê ya serbixwe Aysel Tugluk, Endamê Meclisa BDP'ê Ramazan Yildiz, Serokê Rêxistina BDP'ê yê Wanê Musa Îtah, Seroka TUHAD-FED'ê Zubeyde Teker, Hevşaredarê Bajarê Mezin ê Wanê Bekîr Kaya, hevşaredarên navçeyan û bi sedan welatî tevlî çalakiyê bûn. Girseya ber bi sînorê Îranê ve meşiya pankartên; "Qatîl Îran dê hesabê bide", "Komara îslam na komar darvekirinê", "Qeza na, qeder na komkujî! em êşa gelê Soma parve dikin" vekirin û sloganên "Bijî berxwedana zindanan", "Bijî Serok Apo" û "Qatil Îran dê hesabê bide" berz kirin.

Seroka TUHAD-FED'ê Zubeyde Teker bi zaravayê kirmanckî (zazakî) axivî û diyar kir ku ew ji bo siyasetmedarên kurd ên ji aliyê rejîma Îranê ve cezayê dardakirinê girtin çalakiyê dikin. Teker, anî ziman ku Dewleta Îranê derheqê 59 siyasetmedarên kurd de cezayê darvekirinê da. Teker, da zanîn ku divê hemû kes bertekan nîşanî zilma dewleta Îranê bide.

'Ji bo darvekirinên Misirê yên rabûn serpiyan...'

Aysel Tugluk jî wiha got: "Em ji bo şermezarkirina biryara darvekirina 59 siyasetmedarên kurd a ji aliyê Dewleta Îranê ve hatin dayîn li vir in. Komara Îslama Îranê bi eslê xwe Komara Darvekirin a Îranê ye."
Tugluk, xwest ku Îran dest ji biryara darvekirinê berbide û wiha axivî: "Mixabin dema mijar bû darvekirinên Misirê cîhan rabû ser piyan lê dema mijar bûn kurd hemû kes bêdeng man. Li Îranê di bin navê hiqûqa îslamê de mirov tên qetilkirin. Em li hemberî vê yekê bêdeng namînin. Em li vir careke din Îranê hişyar dikin. Demildest dest ji van pêkanîn berdin."

Mebûs Tugluk, da zanîn ku heke Îran darvekirinan berdewam bike û agirbesta PJAK'ê binpê bike ew dê têkoşîna xwe bilind bikin.

Serokê TUYAD-DER'a Wanê Ahmet Aygun jî diyar kir ku ji sala 2011'an heya niha PJAK di pozîsyona agirbestê de ye û ji şertên agirbest yek jî rawestandina darvekirinan bû û Îranê ev yek binpêkir û wiha got: "Rêveberiya Tehranê li dijî kurdan polîtîkayên darvekirinê xistin dewreyê. Ev yek girêdayî geşedanên heremê ye."

Aygun li ser greva birçîbûnê ku dan dest pê kirin jî wisa got: "Ji bo em vê wehşetê şermezar bikin, hişyarî bidin hikumeta Îranê, bala raya giştî bikişînin ser vê û ji bo madenkarên li Somayê mirin em li vir 3 rojan çalakiya greva birçîbûnê didin dest pê kirin."

Piştî axaftinê çalakiya rûniştinê pêk hat û girse careke din vegeriya ber konê û dest bi çalakiya girava birçîbûnê ya ji 3 rojan kir.

DÎHA