Stenbol

6 rojnamegerên di bin navê "Komîteya Çapemeniyê ya KCK'ê" hatibûn girtin û piştî 29 mehên li girtîgehê ji aliyê 3'yemîn Dadgeha Cezayên Giran a Stenbolê ve hatin berdan. Wan li rojnameya Ozgur Gundemê civîna çapemeniyê li dar xist. Ertuş Bozkurt, Turabî Kîşîn, Ramazan Pekgoz, Davut Uçar û Yusel Genç derketin pêşberî çapemeniyê.

Li ser navê rojnamegeran Yuksel Genç daxuyanî xwend û diyar kir ku kêxweş in ku hatine berdan  lê bi sedan kes bê hiqûq di girtîgehan de ne û wiha got: "Min silavên hevalên girtî anîne." 

Genç,  got ku girtin û serbestberdana wan siyasî bû, diyar kir ku hikumetê di pêvajoya hilbijartina serokomariyê de ji ber zextên navneteweyî û welat ên li dijî azadiya çapemeniyê hinek sererastikirinên "kozmetîk" pêk anîn. Genç, da zanîn ku ev sererastkirin tu guherînê di pergala dijdemokratîk de çênake û wiha axivî: "Ev guherîn girtin û cezakirina xebatkarên çapemeniyê asteng nake. Ji bo heta hetayê di girtîgehê de nemînin asteng dike. Serbestberdana me jî ji bo guherîna siyaseta Tirkiyeyê erenî nîn e."

'TMK hê wekî berê li cihê xwe ye'

Genç, bal kişand ser rewşa girtiyên nexweş ên di girtîgehan de û wiha dom kir: "Girtiyên nexweş yek bi yek jiyana xwe ji dest didin. Serbestberdana me nîşaneya helwesta hikumetê ya li dijî azadiya çapemeniyê guherî nîn e. Ji ber ku TMK hê li cihê xwe disekine." 

Yuksel Genç, destnîşan kir ku li Tirkiyeyê azadiya çapemeniyê bi hejmara rojnamegerên girtî nayê pîvan û wiha berdewam kir: "Rewşa azadiya çapemeniyê gelek nebaş e. Hikumet li gorî kêfa patronên rojnameyan têkildarî azadiya çapemeniyê biryarê dide."

'Birêz Ocalan divê di şertên azad de pêvajoyê rêvebibe'

Genç, balkişand ser asta çareseriya pirsgirêka kurd û wiha axivî: "Çawa, niha tu ewlehiya hiqûqî ya pêvajoya Îmraliyê tuneye, tu bingeha azadiya raman a xebatkarên çapemeniyê jî tune ye. Aktorê pêvajoyê Rêberê Gelê Kurd Birêz Abdullah Ocalan hê di şertên tecrîdê de tê girtin. Ji bo ku pêvajo vegere muzakereyê divê şertên Birêz Ocalan bên sererastkirin." Genç xwest ku hemû rojnameyên girtî serbest bên berdan û wiha got: "Em dixwazin hemû rojnamegerên girtî bên berdan û bi awayekî azad ramanên xwe bînin ziman. Em niha 'azad' in û heya careke din bên girtin em dê di nafa refên çapemeniya azad de xebatên xwe bidomînin."