DiyarName.Com

'Hebû, tune bû' li wir çîrokek hebû

"Hebû tune bû" navê fîlmê derhêner Kazim Oz ê nû ye. Oz çîroka malbatek ji Batmanê ku diçe herêma Enqereyê ji bo karê de

Cemil Oguz

"Hebû tune bû" navê fîlmê derhêner Kazim Oz ê nû ye. Oz çîroka malbatek ji Batmanê ku diçe herêma Enqereyê ji bo karê demsalî bi zimaneke serketî pêşkêşî temaşevanan dike.

Li Tirkiyeyê gelek kes betal in. Lê kurd zêdetir... Hejmara betalan li nav kurdan di asteke bilind de ye. Hin ji van kurdan ji mecbûrî her havînê ji malên xwe derdikevin, ligel zar û zêçên xwe ji bo çend mehan diçin bajarên rojavayê Tirkiyeyê. Ji wan re "Karkerên demsalî" têne gotin. Heta niha li ser van karkerên demsalî lêkolîn hatine kirin, pirtûk hatine nivîsandin, fîlm hatine kişandin. Lê niha fîlmekî din li ser vê meseleyê hat kişandin lê hinek din bi hûrbûnî, hinek bi din bi awayekî serketî... Fîlm ji aliyê derhêner Kazim Oz ve hatiye kişandin. Di fîlm de çîroka malbata ji Batmanê ku ji bo gihandina marûlê diçe herêma Enqereyê heye. Fîlm hem çîroka çûyîn heta vegerê, hem jî ji çandina marolê heta ku diçe marketan û tê firotin pêşkêş dike. Pêre jî çîrokeke evînî ku di nav çîrokê de cihê xwe digire...

Fîlm niha yekem car di çarçoveya 33'yemîn Festîvala Fîlman a Navneteweyî ya Stenbolê de derdikeve pêşberî temaşevanan. Derhêner Kazim Oz jî dê di dema nîşandayîna fîlm de amade be û piştî nîşandayîna dê bersiva pirsên temaşevanan bide.

Fîlm di heman demê de di çarçoveya festîvalê de di beşa "Pêşbaziya Neteweyî" de ye. Kazim Oz ku di fîlm û belgefîlmên xwe de berê kameraya xwe dide civakê, pirsgirêkên civakê derdixe pêşberî temaşevanan, di vî fîlmê xwe de jî bal kişandiye ser vê çîrok û jiyana bi êş. Derhêner Oz li ser vê wisa dibêje: "Li gor texmînan li Tirkiyeyê nîzî mîlyonekî kes wekî karkerên demsalî hene û ew rastî kedxwarineke mezin tên. Piraniya karkerên demsalî kurd in ku bêsîgorte û bi heqdesteke gelek hindik dixebitin û piraniya wan jî zarok in. Nakokiyên çînî ku di roja me de didomin, rêbazên nû yên kedxwariyê û biyabûna mirovan a li hemberî tiştên hilberînê û xwarinê, encax huner dikare dikare vê rewşê nîşan bide û bibe wijdanê mirovahiyê."

Ji bo kesên bixwazin temaşe bikin, rojan nîşandayînê:

18.04.2014, Salona Atlas, Saet 19.00

Kunye:

HEBÛ TUNE BÛ

Derhêner, Senaryo, Derhênerê Dîmenê: Kazim oz

Vesazkiri: Kazim Oz, Semih Yildiz

Lîstikvan: Saim Çalar, Gamze Çalar, İsmehan Çalar, Şemsihan Çalar, Ferhat Çalar, Dilber Çalar, Derya Çalar, Recep Mertoglu, Cengiz Kanat

Sazkar: Kazım Oz

Şîrketa Sazkar Yapim 13 Film Production û Al Jazeera

Sala Kişandinê: 2014 / DCP / Renkli

Mawe: 82 deqîqe

Ziman: Kurdî û Tirkî