Diyarname

Li gelek navçe û bajaran hem BDP, hem AKP, MHP, CHP'ê îtîraza hilbijartinê kir. Li hin cihan ji nû ve deng hatin jimartin, li hin deran îtîraz hat redkirin. Bi kurdahî di hilbijartinên Tirkiyeyê de heta niha tu demê ew qas îtîraz û nerazîbûn nehatine dîtin.

Li hin navçeyên kurdan (wekî Serêkanî, Wêranşar, Bîrecîk) pevçûn derketin û xirecir didomin.

Yek ji xaleke balkêş cihên ku BDP'ê îtîrazê dike, îtîraza wê tê redkirin, lê dema partiyên din dikin tê qebûlkirin û deng careke din têne jimartin.

Vane hin navçe, bajarên ku îtîraz hatine kirin û hin encamên wan:

Serêkanî

Li Serêkanî AKP'ê bi dek û dolaban şaredarî bi dest xist. BDP'ê îtîraz kir lê nehat qebûlkirin. Gel serî hilda. Pevçûn û xirecir didome. Ji bilî van pevçûnan, ji aliyê legal ve BDP xwe amade dike ku roja 2'yê mehê serî li Lijneya Hilbijartinê ya Bajêr bide.

Agirî

- Li Agirî BDP bi ser ket. AKP'ê îtîraz kir. 4 caran deng hatin jimartin. Di ya yekem de BDP 800 deng li pêş bû, ya duyem de daket 250, ya sêyem de BDP'ê bi 10 dengan şaredarî bi dest xist. Ev yek têra AKP'yiyan nekir, AKP'ê serî li YSK'ê (Lijneya Bilind a Hilbijartinê) da.

Gewaş (Wan)

- Li Gewaşa di dema jimartina dengan de BDP li pêş bû, elektrîk hatin birîn, piştî elektrîk hatin vê carê gotin AKP'ê bi 7 dengan şaredarî bi dest xistiye. BDP'ê îtîraz kir lê îtîraza wan hat redkirin. Hat gotin ku dê BDP serî li Lijneya Hilbijartinê ya Bajêr bide.

Weranşar (Riha)

- Li Wêranşarê BDP bi ser ket. AKP'ê îtîraz kir, îtîraza wan hat qebûlkirin ^udi 200 sindoqan de dê careke din jimartin pêk bê.

Mebû BDP'ê İbrahim Ayhan got ku wan li Serêkaniyê îtîraz kirine lê îtîraza wan nehatiye qebûlkirin, li vê derê ya AKP'ê hatiye qebûlkirin.

Bîrecîk (Riha):

- Li Bîrecîkê hat gotin ku AKP'ê bi hîle hilbijartin bi dest xistiye. Li ser vê BDP'yiyan hin belge jî pêşkêşî Lijneya Hilbijartina Navçeyê kir lê daxwaza BDP'yiyan hat redkirin.

Îdir

- Li Îdirê BDP bi ferqek 547 dengî bi ser ket. Li ser vê yekê MHP (bû partiya duyem), CHP û DP'ê îtîraz kir.

Ercîş (Wan)

- Li Ercîşê BDP'ê bi 34 hezar û 609 dengî şaredarî bi dest xist. BDP'ê 4 hezar deng ji AKP'ê zêdetir girtibû. AKP'ê îtîraz kir, lê hê bersivek nehatiye dayîn.

Mehsertê (Mêrdîn)

- Li Mehserta Mêrdinê piştî serketina BDP'ê, AKP'yiyan serî li Lijneya Hilbijartinê ya Navçeyê da û îtîraz kir lê ev îtîraz hat redkirin.

Hezo

- Li Hezoya Batmanê pisûlayên dengan yên qetandî û şewitandî derketin holê. Li ser vê BDP'ê îtîraz kir lê îtîraza wê nehat qebûlkirin.

Taşliçay

- Li Taşliçaya Agirî jî BDP'ê îtîraz kir lê îtîraza BDP'ê nehat qebûlkirin.

Li Xelatê deng dîsa têne jimartin

- Li Xelata Bedlîsê li ser daxwaz û îtîraza BDP'ê dengan dîsa dijmêrin Lê Midûrê berpirs ê hilbijartinê muşahit negirtin hundir û ew tenê dengan dijmêre.Midûrî parêzer jî negirtin hundir û ew bi tena serê xwe dengan dijmêre.

Hat gotin ku BDP'ê bi 103 dengên zêdetir şaredarî bi dest xistibû lê li ser mudexeleya AKP'ê, AKP'ê bi 237 dengan şaredarî girt.

Akdenîz

- Li Akdenîza Mêrsînê BDP'ê bi ser ket. Li ser vê yekê CHP'ê îtîraz kir. Li ser vê yekê gel li ber avahiya Şaredariya Akdenîzê ya Mêrsînê kom bû. Bi sedan welatiyên ku piştî nîvro hatin ber avahiya BDP'ê nobeta xwe didomînin.

Norşin

- Li Norşîna Bedlîsê BDP'ê ebi 32 dengên zêdetir şaredarî bi dest xist, lê AKP'yiyan sindoqa li gundê Mişkan sedem nîşan dan û îtîraz kirin. Deng careke din hatin hilbijantin û BDP careke din bi ser ket lê vê carê dengên xwe zêdetir kirin. 

Stenbol

- Li Stenbolê berendamê CHP'ê xwest deng careke din bêne jimartin. Mustafa Sarigul xwest li hemû navçeyan deng dîsa bêne jimartin.

Enqere

- Li Enqereyê şerê di navbera berendamên CHP û AKP'ê de didome. CHP dixwaze li hin sindoqan careke din deng bêne jimartin.

Yalova

- Li bajarê Yalovayê CHP û AKP'ê bi hev re îtîraz kir. YSK'ê îtîraz qebûl kir û li 124 sindoq ji nû ve bêne jimartin. 

Demîrtaş: Divê hikûmet zextên xwe bi rawestîne

Li ser rewşê, nerazîbûn û bûyeran Hevserokê Giştî yê BDP’ê Selahattîn Demîrtaş  daxuyaniyeke nivîskî weşand û diyar kir ku wê li hemberî hewildanên ku dixwazin serkeftina wan ji destê wan derbixin bêdeng nemînin. Demîrtaş banga yên ku hewl didin bi sextekarî û lîstokên qirêj encam bigirin, bila kêliyek zûtir dest ji van helwesta xwe berdin. Demirtaş wisa got: “Gelê me xwedîderketina ku li hemberî îradeya xwe nîşan kiriye pir rawe û hêjayî destxweşiyê ye. Divê êrîşên hikumetê yên ku li hemberî lêgerîna gel a ji bo mafê xwe kêliyek pêş a din werin bi rawestandin. Li cihên ku partiya me lê serkeftin bi destxistiye û li hemberî îtîraz hatiye kirin, divê gelê me heya ku encama dawî negire bêdeng nemîne, heya ku pêwîst bike divê li cihê hejmar lê were kirin razên. Li hemû cihan bi girseyî û seknekî bi biryar, divê xwedî li gelên me yên li cihên berxwedanê dikin derbikevin û bi tenê neyên hiştin."