COLEMÊRG

Hevserokê BDP’ê Selahattîn Demîrtaş nerazîbûna xwe a li hemberî provokasyonên pêş hilbijartinê yên Huda-Parê ku nêzî Hizbullahê ye nîşan da û got: “Partiya ku wekî HUDA-PAR binav dikin, li navçeya Licê ku hema bêje tu endamên wê lê tune diçe li ser esnaf û gel belavokan belav dike. Esnaf bixwe nerazîbûn nîşan didin. Gel nerazîbûna xwe danîne holê.” Demîrtaş hişyariya “ger ku hûn wekî partiyekî siyasî dixwazin siyaset bikin, siyaset bikin. Negerin, provokasyonan nekin. Bila her kes bizane ku ne esnafê me û ne jî gelê me bê xwedî ye.”

Hevserokê Giştî yê BDP’ê Selahattîn Demîrtaş, di serdana xwe ya 2 rojan de ku hat Culemêrgê ji aliyê bi hezaran kesî ve li Depînê hate pêşwazî kirin. Jinên ku bi cil û bergên gelêrî hatibûn pêşwaziya Demirtaş, stran gotin û govend gerandin. Karwana ku ji nêzî 500 wesayîtan ku bi hatina Demirtaş re ketin rê, derbasî navenda bajar bû. Bi hezaran kesên ku li pêş avahiya Şaredariyê li benda Demîrtaş bûn, wêneyên Rêberê PKK'ê Abdullah Ocalan li gel alên PKK  û Konfederalîzmê hilgirtin. Parlementerên Culemêrgê Adil Zozanî û Esat Canan, Şaredarê Culemêrgê Fadil Bedirhanoglu, rêveberên BDP û HDP’ê li gel namzetên şaredariyan hevalbendiya Demirtaş kirin.

Demirtaş li şaneşîna Şaredariyê ji bo gel axivî, sipasiya wan kir û got ku ew bi gelê Culemêrgê serbilind e. Demîrtaş wiha got: “Bi taybetî peyamên ku em li vir bidîn pir girîng in. Li ser vê xaka ku ev zilm û êş kêşaye, li gel wê jî ew çend têkoşer, li ser van xakên ku ji bo lehengiyê pêşengî kiriye niha jî dîrokê dinivîse. Dema îro em temaşeyê Rojava dikin, Efrîn, Kobanî, Cizîr û Qamişlo dikin, encama tekoşîna ciwanên Gever û Culemêrgê dibînin.”

Demirtaş ku çû serdana MEYADER'ê, li ser pirsa rojnamegeran ya ku duh li navçeya Licêya Amedê HUDA-PAR’ê êrîşê gel kiribû, got ku HUDA-PAR li pey provokasyonan e, gel vê baş dizane û nerazîbûna xwe daniye holê. Demirtaş li ser êrîşên HUDA-PAR’ê yên ku li herêmê zêde bûne wiha got: “Ez vê pir zelal dibêjim. Partiya me li hemberî tu namzetên şaredariyên partiyan, pilankirina êrîşan û pilana astengkirina hilbijartinê nekiriye. Wê neke jî. Em wekî partiyekî siyasî xebatên xwe yên hilbijaritinê dimeşînîn. HUDA-PAR li cihekî ku temaşe dikî tu endamên wê jî lê nîn in, diçe Lîcê û li ser esnafan belavokan belav dike. Esnaf bixwe nerazîbûna xwe nîşan didin. Gel bi xwe nerazîbûna xwe nîşan dide. Dibêje ‘ez BDP’yiyîm vê belavokê nedin min’. HUDA-PAR’yiyên ku her cihê diçinê li rastî nerazîbûnê tên, vê carê jî neheqiyê li esnafan dikin. Tu biryarekî partiya me astengkirina xebatên HUDA-PAR’ê nîn e, pêwistî jî pê nîn e. Ji ber ev ji aliyê gel ve nayên hezkirin li hemû cihî li rastî nerazîbûna gel tên.”

JI BO RASTBÎNÊ BANGEWAZÎ

Demîrtaş ku bangewaziya gel kir û wiha got: “Hûn rastiyê bibînin. Êrîş ji kê were bila were, xwe parastin mafê te ye. Lê li hemberî provokasyonê şiyar bin. Li hemberî me tenê HUDA-PAR ne, AKP, MHP û CHP hemû li heman cihî ne. Bi teybetî pêwist e ciwanên partiya me pir baldar bin, armanca wan çêkirina aloziyan e. Hinek ji agirbesta ku heye nerehet in.  Dixwazin ji vê navendê rabin û alozî derbixin. Ji bo vê yekê van bi kartînin. Gelê me gelekî bi rêxistinkirî û bi disîplîn e. Xwedî hêza sekna li hemberî van lîstikan e.”