HEWLÊR

Parlementerê Parlementa Iraqê Dr. Mehmûd Osman, xweseriya demokratik a Rojava û avakirina Herêmên Kanton a Cizirê li gelê Rojava pîroz kir û bang li Herêma Federal a Kurdistanê kir, bi awayek fermî Herêmên Kanton yên Rojava nasbike. Herwisa Osman têkildarî Cenevre-2 da zanîn ku heta mafê gelê Kurd yê Rojavayê neyê naskirin, Cenevre-II nikare aloziya li Sûriyê çareser bike.

Parlementerê fraksiyona Kurdî yê Parlementoya Iraqê Dr. Mehmûd Osman têkildarî avakirina sîstema xweseriya demokratik û Herêmên Kanton yên li Rojava û Konferansa Cenevre-2 de ji DÎHA’yê re axivî. Osman sîstema "Xweseriya Demokratîk a Rojavayê Kurdistanê" li gelê Rojava û tevayî kurdan pîroz kir û bang li Herêma Kurdistanê kir piştgiriyê bide hewildanên azadiya gelê Rojava û bi awayek fermî nasbike. Herwiha Osman di derbarê Konferansa Cenevre-2 de jî da diyar kirin ku beşdarnebûna Kurdan bi awayek serbixwe dibe sedem ku Cenevre-2 nikaribe bigehe armanca xwe û eger bixwazin aloziya Sûriyê çareser bikin divê mafê kurdan û daxwazên wan li berçavan werin girtin.

XWESERÎ GAVEKÎ GIRÎNGE

Osman balkêşand ser îlankirina sîstema xweseriya demokratik û Herêma Kanton a Cizîrê û da zanîn kû, li her parçeyek a Kurdistanê kurd sîstema xwe ava bikin gelek başe. Wiha pêde çû: "Pêngaveke erênî û dirokiye kû ji bo Kurd jî di nav gelên cîhanê de bibin xwedî maf û destkeftiyên xwe yên netewî. Ji bo vê jî ez avakirina Herêma Kanton Cizirê li Rojavayê Kurdistanê pîroz dikim û serkeftinê ji gelê Rojava re dixwazim. Lê min dixwast hemû aliyên siyasî û civakî yên li Rojava cihê xwe di nava vê sîstemê de bigrin. Ji hev re bibin alîkar û hêzek netewî a kurd avabikin. Herwisa min dixwast hemû partiyên kû cihê de di herdû meclîsên MGRK û ENKS’ê yên di cîvîna Hewlêr de amadebûn cihê xwe di nav vê sîstemê de bigrin. Ez bawerim ji ENKS’ê hinek alî cîhê xwe di nav vê sîstemê de digrin. Hêviya me ewe kû hemû aliyên siyasî û civakî yên Rojavayî cihê xwe di nav sîstema xweseriya demokratik a Rojavayê Kurdistanê de bigrin û Rojava birêvebibin."

BILA HERÊMA BAŞÛRÊ KURDISTANÊ XWESERİYÊ NASBIKE

Dr. Mehmûd Osman têkildarî avakirina Xweseriya Demokratîk li Rojava bang li Herêma Kurdistanê kir kû bi awayek fermî nas bike. Osman axaftina xwe wiha domand: "Ji bo Herêma Kurdistanê sîstema xweseriya demokratik û Herêma Kanton a Cizirê û herêmên din yên kanton yên li Rojavayê Kurdistanê bên avakirin bi awayek fermî bipejirîne, tiştê ji destê bê emê hewilbidin bikîn. Herwisa emê ji Herêma Kurdistanê bixwazin bi Rojavayê Kurdistanê re li ser gelek mijaran weke du herêmên rizgar bûyî bi hev re îtifaqan stratejîk li ser bingehê berjewendiyên gelê Kurd çêbikin. Pêngavên dostaniya bi Rojavayê Kurdistanê re divê Herêma Kurdistanê bilezgînî bavêje." Herwiha Osman got: "Daxwaza me ewe kû guftigoyên li ser çareseriya azoliya Sûriyê tê kirin gele kurd jî beşek ji vê guftigoyê be. Herwisa divê gelê Rojava bikaribe nûnertiya parçeya xwe di nav pêkhateya nû a Sûriyê de cig bigre. Herêmên Rojavayê Kurdistanê yên hatine Rizgar kirin divê kurd bêy kû li rastî astengên destûrî bên bikaribin nûnertiya herêmên xwe bikin. Herwisa di destura nû a Sûriyê de mafê gelê Kurd bê naskirin û beşa Rojavayê Kurdistan bibe herêmek federal."

PÊWÎST  KURD WEKE ŞANDEK SERBIXWE BEŞDAR CENEVRE BIBIN

Têkildarî Konferansa Cenevre-2 Osman da zanîn kû, pêwîst bû kurd weke şandek serbixwe beşdar biban ne kû di nav muxalefeta Sûriyî de û dîtinên xwe wiha anîn ziman: "Bes wisa diyare ev yeke pêknehatiye. Li gorî fikra min çêbûna konferansa Cenevre-2 dû ne xirabe, pêngaveke jibo pêşeroja Sûriyê. Lê pir aşkere ye kû pirsgirêka Sûriyê tenê bi Cenevre-2 çareser nabe. Hemû cîhan baş dizane yek ji gelên herî mezin yên Sûriyê gelê kurde, ji ber vê sedemê jî beşdarnebûna kurdan weke şandek serbixwe a Cenevre-2 wê pirsgirêka Sûriyê kûrtir bike. Dil dixwast kurd weke nûnere gelê Rojava beşdarî Cenevre-2 bibûya, ez bawerim wê pirsgirêka Sûriyê bêhtir nêzî çareseriya mayînde bibaya. Yên kû nexwastin Kurd weke şandek serbixwe beşdar bibin DYE û welatên Rojavayî bûn."

Parlementerê Fraksiyona Kurdî yê Iraqê Dr. Mehmûd Osman di dawiya axaftina xwe de peyama xwe a ji bo xweseriya demokratik a Rojava de bi van gotinan anî ziman: "Di dawiyê de ez dibêjim sîstema xweseriya demokratik û avakirina herêmên kanton li Rojavayê Kurdistanê di aliyê azadiya gelê Rojava û ji bo parçeyên din yên Kurdistanê pêngavek erênî, dîrokî û xwedî nirxek bê hempaye. Jibo wê jî ez disa xweseriya demokratik li gelê Rojava pîroz dikim. Dubare dibêjim divê dinav vê sîstema xweseriya demokratik û herêmên kanton de hemû aliyên civakî û siyasî yên Rojavayê Kurdistanê cihê xwe di nav de bigrin. Herwisa bang li Herêma Kurdistanê dikim kû pêşketinên siyasî û avakirina xweseriya demokratik li Rojavayê Kurdistanê bi awayek fermî binase û piştgiriya xwe bide nîşakirin. Weke Başûra Kurdistanê rizgarbûna Rojavayê Kurdistanê jî destkeftek dîrokiye jibo gelê Kurd û ev destkeftane wê bibin hîmê rizgarbûna hemû parçeyên Kurdistanê. Ji tevayî Kurdên Rojava re serkeftinê dixwazim."