1.

Di gel ku tu xweşiktirîn gulistan î

Fermo!

Ev gul ji boyî te ye...

Di gel ku tu xweştirîn derd û kovan î Fermo!

ev kul ji boyî te ye...

di gel ku tu xewn û êşa şevan î

fermo!

Ev dil ji boyî te ye...

 2.

BILIND BIBE!

Di xewna min de, di xema min de, di xwîna min de

Bilind bibe!

Di bîra min de, di kovana min de, di dîlana min de

Bilind bibe!

Di birîna min de, di girîna min de, di nêrîna min de

Bilind bibe!

Di giyana min de, di viyana min de, di jiyana min de

Bilind bibe!

 3.

Ji bo salvegera koçkirina Nebîhê El-Hekîm...

Lêvên şevê sêwî dimînin,

Lêvên min jî

nema dizanin navên miriyan bibêjin...

yê ku xweliya bîranînê ye ez im!

Yê gulan li ber kêlan ji bîr dike ez im!

Yê li ser şaneşîna şevê

li hêviya miriyan dimîne ez im!

Yê ku hemî rêçên wî

ber bi goristanan ve diçin ez im!

 4.

Bo Yûnis El- Hekîm

Bila hinekên din vî barî hilgirin!

Bila hinekên din helbestên mirinê binivîsînin!

Min nîvê mirinê di dilê xwe de kedî kir,

Û te jî nîvê din, wekî xweşmêran, ji xwe re bir...

De li çavên min binêre!

û ji miriyan re bibêje:

ji mirinê netirsin hey bêbextno!!

 5.

Dema tu dest bi peyivînê dikî,

Çima

 stêrk dirijin,

Ewr pev diçin

Agirê mûmê gur dibe

Û dilê min dişewite?

 6.

Meyweyên kenê te bi ser min de dibarin...

Rêçên azadiya te di laşê min de dimeşin…

De ka xwe ji bîr bike,

Xwe ji bîr bike ji kîjan ferhenga te diweşim...

06.12.2013, Ji Azadiya Welat hatiye girtin