QAMIŞLO

Nûnerên Meclisa Gel a Rojavayê Kurdistanê (MGRK) û Encumena Niştimanî Kurdî li Sûriyê (ENKS) bi armanca nirxandina rewşa rojavayê Kurdistanê ya ewlekarî û siyasî, xebatên Desteya Bilind û xebata hevbeş civîn lidarxistin. Di civînê de hate destnîşan kirin ku pêwîstî bi karê hevbeş û piratîkirina Desteya Bilind a Kurd heye.

Civîn duh êvarê li navenda Partiya Yekîtiya Demokratîk (PYD) ya Qamişloyê hate lidarxistin. Di civînê de mijarên siyasî û ewlekarî yên li rojavayê Kurdistanê hatin nirxandin. Di civînê de mijara rêveberiya demî ya li Rojava ku pêwîst e hemû pêkhateyên Rojava cihê xwe têde bigrin hate nirxandin û her du aliyan li ser vê mijarê nêrînên xwe yên hevbeş anîn ziman.

Civîn bi beşdariya hevserokên MGRK’ê Ebduselam Ehmed û Sînem Mihemed, Endama Desteya Bilind a Kurd Îlham Ehmed, Hevseroka PYD’ê Asya Ebdela, Endamê Komîteyên Têkiliyên Dîplomasî yî TEV-DEM’ê Hekem Xelo, Serokê ENKS’ê Tahir Sifûk, Serokê Partiya Dîmokratî Kurd li Sûriyê Nesredîn Ibrahîm, Endamên Rêveber ya  ENKS’ê  Mistefa Meşayîx û Asim û Nimet hate lidarxistin. Civîn bi awayekî ji çapemeniyê re  girtî pêk hat.

Piştî civîn bi dawî bû daxuyaniyek nivskî ya hevbeş hate dayîn. Di daxuyaniyê de hate gotin ku MGRK û ENKS’ê bi armanca nirxandina rewşa rojavayê Kurdistanê ya siyasî û ewlekarî, têkiliya di navber ENKS û MGRK’ê, sedema rawestandina karê Desteya Bilind û komîteyên hevbeş û  geşedanên dawî li welêt li hev civiyane. Di daxuyaniyê de hate destnîşankirin ku pêwîst e hemû alî bi li gorî berpirsyariyên xwe yên dîrokî û niştimanî tevbigerin û hemû pirsgirêkên mîna ne piratîkirina karê Desteya Bilind, peymana Hewlêrê û şirîkatiyeke rastî di nava MGRK’ê û ENKS’ê de çareser bibin.

Têkildarî rêveberiyeke demî ji bo rojavayê Kurdistanê di daxuyaniyê de hate gotin ku di rojavayê Kurdistanê de valahiyeke ewlekarî û îdarî heye, li ser vî esasî pêwîstiya herêmê bi avakirina rêveberiyek demî ku nûneriya hemû beşên civakê bike heye û di zûtirîn demê de komîteyên hevbeş ku hatine avakirin karê xwe yê piratîkî bikin.

Di daxuyaniyê de hate destnîşankirin ku ENKS û MGRK’ê derbarê têkiliya bi hêzên muxalefeta Sûriyê û di serî de Koalîsyona Hêzên Niştimanî ya Sûriyê û îtîfaqa di nava ENKS û Koalîsyonê de nerînên hevbeş diyar kirin. Di daxuyaniyê de hate gotin ku çi peyman û hevdîtinên li ser mafê gelê kurd pêk werin pêwîst e di riya Desteya Bilind a Kurd û gorî peymana Hewlêrê pêk were. Di daxuyaniyê de hate bibîrxistin ku tu peyman bê qebûlkirina mafên gelê kurd bi awayekî destûrî û li ser esasê mafên rewa yê gelê kurd dê pêk neyên.

Di dawiya daxuyaniyê de êrîşên komên çete yên li dijî rojavayê Kurdistanê û êrîşa li ser benda kontrolê ya YPG’ê ku li ser riya Amûdê û Hesekê pêk hat û di encamê de 6 endamên Meclisên Gel ên gundên herêmê û şervanekî YPG’ê jiyana xwe ji dest dan hate şermezarkirin.

ANHA