Diyarname

4'emîn Konferansa TZPKurdÎ bi eşkerekirina encamnameyê bi dawî bû. Di encamnameyê de hat gotin ku TZPKurdî dê ji bo perwerdehiya zarokan kar û baran bimeşîne.

Konferansa TZPKurdî ku roja 24'ê mehê li Amedê dest pê kiribû, roja 25'ê mehê bi nîqaşan û di dawiyê de jî bi eşkerekirina encamnameyê bi dawî bû.

Di encamnameyê de hat gotin ku divê hemû sazî di warê kurdî de bi berpirsiyarî tevbigerin. Di encamnameyê de gotina Serokwezîrê Tirkiyeyê hat rexnekirin.

Konferansa ku bi beşdariya li dor 200 delegeyî li dar ket di dawiyê de encamnameyeke hat eşkere kirin. Vaye ew encamname:

1- TZPKurdî perwerdehiya zimanê zikmakî wekî mafekî jêneger dibîne û vê yekê nake mijara nîqaşê. Li ser vê esasê axaftina Serokwezîrê Tirkiyeyê bi tundî şermezar dike.

2- Delegasyona konferansê Kongreya Neteweyî ya ku dê li Hewlerê li dar bikeve silav dike.

3- Di pêngava rizgariya demokratîk de ji bo perwerdehiya zimanê zikmakî bê qebûlkirin hemû sazî û dezgeh divê di nava gelê me de bi rihekî seferberiyê tevbigerin da ku ji pêvajoyê re bibin bersiv.

4- Delegasyona me ji ber şer û pevçûnan ku di nava gel de bi kuştin û birîndarkirina bi encam dibe xemgîniya xwe tîne ziman.

5- Delegasyona me helwesta dirû ya dewletên Ewropayê ku di derbarê çapemeniya kurd de nîşan dide şermezar dike.

6- Di warê xebatên kurdî de hemû sazî û dezgehên me berpirsiyar in, divê hemû sazî xwedî bername bin. Delegasyona me bi pişyariyekê vê berpirsiyariyê ji bo wan radigihîne.

7- TZPKurdî berxwedan û şoreşa Rojava ji bo azadiya Kurdistanê wekî pêngaza herî girîng dibîne û ji bo perwerdehiya Rojava xwe berpirsiyar dibîne û dikeve nava amadekariyan.

8- TZPKurdî ji bo perwerdehiya kurdî divê hemû sazî û dezgehên kurdî re nîqaşan bike û modeleke nû amade bike.

9- Divê TZPKurdî hemû kar û barên xwe li gorî bernameyekê bimeşîne.

10- TZPKurdî bi taybetî dê ji bo perwerdehiya zarokan kar û baran bimeşîne. Bi taybetî ji bo televîzyona zarokan dê di nava hewldanê de be.

11- TZPKurdî ji bo perwerdehiya astengdaran dê xebatan bimeşîne.

12- Di hîndekariya zimên de dê ji xeynî rêzimanê, dê dersên dîrok, wêje, erdnîgarî û çandê jî bên dayîn.

13- Divê TZPKurdî di warê hîndekariya zimên de materyalên cuda û kêrhatî amade bike.

14- Sazî, dezgeh, rêveber û siyasetmedar^ne me divê hemû kar û barên xwe bi zimanê xwe bikin.

15- Ji bo xitimandina pergalê, divê hemû gelê me di hemû saziyên fermî û ne fermî de zimanê dayikê bi kar bîne. Ji bo vê yekê di serî de delegasyon û hemû sazî dezgehên me li hemberî pêkhatina vê biryarê berpirsiyar in.

16- Divê di hemû dibistanan de xwendekar bersivên mamosteyan bi kurdî bidin û mamoste jî di dibistanan de bi awayekî eşkere bi kurdî biaxivin.

17- Her hefte di heman saetê de li her navçe û bajarî ji bo perwerdehiya bi zimanê dayikê rêzeçalakî bên lidarxistin.

18- Di 16'ê rezberê de li her derê li gorî derfetan meş û daxuyanî bên ladirxistin.

19- TZPKurdî û hemû saziyên me di hemû xebatên xwe de du zaravayan bikar bînin. Ji bo zaravaya kirmanckî cudahiya pozîtîf li ber çavan bê girtin.

20- Sazî û dezgehên ku li gorî feraseta dewletê li ser zimanê kurdî kar û xebatê dikin ji aliyê delegasyonê ve hatin redkirin û divê hemû sazî û dezgehên me li gorî vê biryarê tevbigerin.

21- Divê di bin banê hemû şaredariyên me de pêşdibistan bên damezrandin.

22- Kesên ku di hilbijartinan de ji bo rêveberî û parlementeriyê dibin berendam divê teqez bi kurdî bizanibin.

23- Di hemû şaredariyên me deji şaredar heta xebatkarên di dan û standinên rojane de divê zimanê dayikê bikar bînin û hemû şaredariyên me xebatên xwe bikin du zimanî û bi her awayî piştgiriya xebatên der barê ziman de bikin.

24- Divê hemû kar û xebatên TZPKurdî ne bi feraseta piştgiriya jinê, bi feraseta pêşîvekirina li xebatên jinê bên meşandin.

25- Delegasyona konferansê, konferansê diyarî 3 jinên kurd ên siyasetmedar ku li Parîsê hatin kuştin û helbestvanê kurd Şêrko Bêkes û hemû şehîdên Kurdistanê dike.

***

Nûçeya eleqedar:

- Notên li ser roja yekemîn a Konferansa Ziman