Çalakî, kampanya, şermezarkirin û seferberî. Vane li Bakur agahiyên 6'ê mehê yên ji bo Rojava:
Çalakiya ji bo Rojava di roja sêyemîn de bi dawî bû
Bi pêşengiya KCD, BDP, DOKH, Meclisa Ciwanan û saziyên civakî de ji bo piştgiriya Rojava li navçeya Serêkaniyê ya Rihayê çalakiya nobetê ya 3 rojan ku hatibû destpêkirin îro bi dawî bû. Parlamentera BDP'ê Nursel Aydogan da zanîn ku çalakî gihîştiye armanca xwe û nêzîkatiya AKP'ê ya ji bo çareseriyê Serêkaniyê careke din derketiye holê.
Ev 3 roj in kurd ber bi Parka 3 Fîdan a Serêkaniyê ve diherikin. Êrîşa polîsan, astengkirina meşvanan, têkbirina Konên Nobedariyên yên ji aliyê TOMA'yên dewleta Tirkiyeyê ve jî nekarî pêşî li gel bigire. Di 3 rojan de bi hezaran kes ber bi Serêkaniyê ve herikî.
Di dawiya 3 rojan de Parlemena BDP'ê Nursel Aydogan daxuyaniya bidawîkirina çalakiyan xwend. Aydogan wisa got: "Parçeya ku herî zêde piştgiriyê dide têkoşîna rizgariya Kurdistanê. Piştgiriya ji bo Şoreşa Rojava berî her tiştî peywireke mirovahî ye.
Gel li hember hemû astengiyan li Serêkaniyê 3 rojan nobet girt. 3 roj in li vir îşkence û zilmê li gel dikin. Îşkenceyên ku di dema 12'e Rezberê de nehatin kirin, li vir pêk hatin. Polîsan wekî pêkanînên 12'ê Rezberê li vir êrîşî gel kir. Ev hemû bi fermanan pêkhatin. Hûnê fermanê bidin, zilma ku li gelê Kurd bê kirin rewa bibînin û piştre behsa çareseriya demokratîk û aştiyê bikin. Wisa nabe. Em careke din li vir wan hişyar dikin. Pêvajoya aştiya demokratîk pêvajoyeke cidî ye. Birêz Ocalan cidî nêzîkî vê pêvajoyê dibe. Ger muxatabê we cidî be hûnê jî cidî bin."
Piştî daxuyaniyê govend hatin girtin û welatiyên ku ji bajarên cuda hatibûn Serêkaniyê ber bi bajarên xwe rê ketin.
*
Alimên olî komkujiya li Rojava şermezar kirin
Endamên Komeleya Piştgirî û Alîkariya Alimên Olî ya Stenbolê (DÎAYDER), li avahiya komeleya xwe komkujiya li hember gelê kurd ên li Rojavayê tên kirin bi civîna çapemeniyê şermezar kir. Endamên Platforma Komeleyên Rojhilata û Başûrêrojhilat (DGD), komeleyên derdorê jî piştgirî dan. Pêşî ji bo kesên di komkûjiya Rojava'da jiyana xwe ji dest dane re dia hatin kirin. Di civînê de Serokê DÎAYDER'a Stenbolê Mehmet Şîmşek axavî û alîkariya çekdayînê ya çeteyên girêdayên El Qaîdeyê şermezar kir. Şîmşek, da zanîn ku alîkariya çekê nayê qebûlkirin û anî ziman ku ew hemû kesên zilmê dikin lanet dikin.
Komeleya Piştgirî û Alîkariya Mirovên Olî û Cemeata Alimên Olî ya Mislimanên Amedê jî li ber Cemiyeta Rojnamegerên Rojhilatabaşûr daxuniya çapemeniyê lidar xist. Li ser navê aliman Mele Osman Akçay axivî û got ku di hiqûqa îslamê de di herêma îslamê de kes nikare dest bi ol, ziman, mal û namûsa kesî; lê îro li ber çavên hemû cîhanê ji hêla komeke ku navê 'Mislimantiyê' li xwe danîne zarok û jinên kurdan bi hovane qetil dikin. Akçay, komkûjiya li heberê gelê kurd ên li Rojavayê tên kirin şermezar kir û got: "Banga me ji hemû mislimanan re, li ku derê cîhanê dibe bila bibe li cem gelê mazlûm cih bigirin."
*
Meclisa Gel a Swîsreyê: Ji bo Rojava bibin yek dil
Meclisa Gel a Swîsreyê dê sibê li ber NY’yî êrîşên komên çeteyan yên li hemberî Rojava şermezar bikin û her wiha dê di 10’ê gelawêjê de jî li Baselê meşek girseyî pêk bîne.
Meclisa Gel ya Swîsreyê, bi armanca komujiya li Rojava pêk tê şermezar bikin û piştgiriyê bidin gelê Rojava sibê (7'ê mehê) saet di 14.00’an de dê li ber avahiya Netewên Yekbûyî ya Cenevreyê daxuyaniyek bide çapemeniyê. Piştî daxuyaniyê dê dosyeyek pêşkêşî rayedarên NY’ê bikin. Her wiha roja şemiyê jî dê li Baselê meşek girseyî pêk were.
Endamê Meclisa Gel a Swîsreyê Hanîfî Hoca got ku dê 10’ê mehê li Baselê meşê pêk bînin û ev meş dê ji Basel Claramattparqê saet di 16.00’an de dest pê bike û xwest her kes beşdar bibe
Cih û saeta çalakiyan
7'ê mehê: Li ber avahiya Netewên Yekbûyî ya Cenevreyê saet di 14.00
10’ê mehê: Basel Claramattpark sae 16:00
*
Li Şirnexê ji bo Rojava seferberî hat îlankirin
Kampanyaya bi navê "Xwedî li Rojava derkeve" ku bi pêşengiya komelaya Mafê Mirovan a Şirnex'ê, Rêxistina BDP'a Şirnexê û Şaxa KESK'a Şirnexê hat destpêkirin rastî eleqeyek mezin a welatiyan hat. Di çarçoveya kampanyayê de welatiyên şirnexî pêwîstîyên jiyanî dibin avahiya Rêxistina BDP'ê, Şaredariya BDP'ê û cihên hatine diyarkirin
*
54 saziyên sivîl ên Wanê êrîşên Rojava şermezar kirin
54 Sazyên Sivîl yên Wanê bi armanca êrîşên li dijî kurdan şermezar bikin li Parqa Feqiyê Teyran hatin cem hev. Şaredarê Bajarê Mezin ê Wanê Bekîr Kaya jî tevli çalakiyê bû.
Serokê SES a Wanê Yilmaz Berkî axivî û diyar ki ku komkujiyên li hemberî Kurdan zêde bûne û ev jî bi destê çeteyên çekdar yên El Qaîdeyê pêk tên. Berkî destnîşan kir ku di çend rojên dawî de ji aliyê eniya El Nusra ya girêdayê El Qaîdeyê ve komkujiyek mezin li hemberî kurdan pêk hatiye û nêzî sed sivîl hatine qetil kirin û bi sedan jî dîl hatine girtin.
Berkî da zanîn ku jin û zarok bi awayek hovene hatine qetilkirin û wesayîtên amûrên mirovahiyê dibin jî tên astengkirin û got: “Ev jî bi destê AKP’ê tê kirin. AKP çeteyan diparêze û bi rê ve dibe. Ligel hemû hewldanan deriyê sînor venakin. Ev jî gumanên me yên li hemberî AKP’ê di vê pêvajoya çareseriyê de zêde dike.
54 Saziyên Sivîl yên êrîş şermezar kirin ev in:
SES a Wanê, Egîtîm Sen a Wanê, Yapi Yol a Wanê, Tum Bel Sen a Wanê,ESM a Wanê, Haber Sen a Wanê, BES a Wanê, Tarim Orkam Sen a Wanê, BTS ya Wanê, Nûneriya Çand û Hunerê ya Wanê, DÎSK, TMMOB a Wanê, Odeya Endezyarên Înşatê ya Wanê, Odeya Mîmaran a Wanê, Odeya Endezyarên Ziraatê, Odeya Endezyarên Elektîrîkê, Odeya Endezyarên Makînê ya Wanê,Odeya Endezyarên Jeolojiyê, Odeya Endezyarên Nexşerê û Kadastro a Wanê, Odeya Endezyarên Kîmyaê, Odeya Endezyarên Madenê, Odeya Endezyarên Xurekê, Odeyama Mîmarên Peyzajê, ÎHD,MAZLUM DER, TUYAD DER, KURDİ DER, VAKAD, GÖÇ-DER, MEYA-DER, Hakkari-Van TTB, Mala Piştgiriyê ya Wanê, ÇEV-DER, Konseya Bajar, HDK, KCD, Dayikên Aştiyê, Komeleya Oldaran, Belediye Îş, însiyatîfa Azadî, GÎAD, Komeleya Lêkolîna Civakî û Aborî, Meclisa Bajar a Jinan, Meclisa Ciwanan, Tamara San-der, İnsan der, Mamoste der, Mina Ka der, VATSO, YAKA KOOP,Komeleya Hunermendên Jin, Komeleya Jinan a Mavî Gol, Nûneriya ÎHD’ê ya Başûrê Rojhilat û Rojhilat a Anatolya, Baroya Wanê, DDKD
***
Nûçe û nivîsên eleqedar:
- Ji bo Rojava kampanya dermên
- Bakur ji bo Rojava li ser piya ye
- Ji eniya Serêkanî-Til Xelef çend not
- Tugluk: Ev polîsên kê ne û xizmetê kê dikin?
- Vê sibê: Polîsan êrîşî konên nobedê kir
- Bernameya meşa Serêkaniyê ya ji bo Rojava
.jpg)
