Cemil Oguz
Li bakur bi giştî 15 kovarên bi kurdî weşanê dikin. Piraniya wan jî kovarên çandî, wêjeyî û hunerî ne. Ji nav van çar jê (kovara Nûbihar, Nûpelda, Peyam û Ronahî) li ser xeta olî weşanê dikin. Jê du sê heb bi kurdî-tirkî, yên din hemû bi kurdî ne (piranî bi kurmancî). Lê jê du heb (Vate û Şewçila) bi kirmancî weşanê dikin. Her wiha ji van kovaran du heb jî (Asîva û Pêngav) ji aliyê xwendekaran ve têne derxistin. Her wiha di nav van de Tabûlarasa tekane kovara ku tenê li ser beşeke wêjeyê (li ser wergerê) weşanê dike ye.
Vaye di sala 2012'yan de rewşa kovarên bi kurdî (Li gor algabeyê hatine rêzkirin):
Asîva
Kovara Asîva ji aliyê xwandekarên zanîngehan ve ji sê mehan carekê li Enqereyê tê amadekirin û derxistin. Kovara çandî, hunerî, wêjeyî û ramanî Asîva bi kurmancî û kirmanckî weşanê dike.
Kovarê di sala 2012'yan de tenê 3 hejmarên xwe ragihandin ber destên xwendevanan.
Çirûsk
Kovara Çirûsk ku kovareke hunerî, wêjeyî, felsefî, civakî û entelektuelî ye ji çar mehan carekê ji aliyê Weşanên Belkî ve li Amedê tê amadekirin û weşandin.
Kovara ku di sala 2007'an de dest bi weşana xwe kiribû, ji çar mehan carekê derdikeve. Kovarê di sala 2012'yan de jî ev rêwîtiya xwe dom kir. Di sala 2012'yan de sê hejmarên wê derketin û li gor edîtoriya kovarê di sala 2013'yan de jî dê bi heman peryodê weşana xwe bidomîne.
Hawara Botan
Kovara Hawara Botan ku du mehan carekê dertê di payîza 2011'an de dest bi weşana xwe kir lê kovar her bi zextên dewletê re rû bi rû ma. Xwedî, berpirsê karên nivîsaran ên kovarê hatin girtin, polîsan bi ser navenda wê de girt û kovar berhev kirin. Hawara Botan digel her tiştî meşa xwe didomîne. Heta niha 6 hejmarên wê derketine û 5 jê hatine berhevkirin.
Hinar
Kovara Hinar ji aliyê Kurdî-Dera îzmîrê ve tê derxistin. Kovara du mehane wekî kovareke wêjeyî, çandî û hunerî weşana xwe didomîne. Kovara ku du mehan carekê dertê îsal jî weşana xwe bênavber dom kir.
Nûbihar
Kovara Nûbihar ku yek ji kovara herî kevn a kurdan e, ji sala 1992'yan ve weşana xwe didomîne. Nûbihar ku her sê mehan carekê dertê îsal jî ev peryoda xwe dom kir. Nûbiharê îsal 4 hejmarên xwe derxistin ku yek ji wan hejmaran hemû bi kirmanckî (zazakî) bû. Bi vî awayî Nûbihar bû yekemîn kovara bi kurmancî ku hemû rûpelên hejmareke xwe bi kirmanckî derdixe.
Nûpelda
Kovara Nûpelda li Wanê tê derxistin. Kovara ku her sê mehan carekê dertê, heta niha 11 hejmarên xwe gihandiye xwendevanan.
Pêngav
Kovara Pêngav di sala 2010'an de ji aliyê Xwendevarên Zanîngeha Stenbolê ve hate derxistin. Kovarê heta niha 9 hejmarên xwe derxistine. Kovara ku pêşî wekî fanzîn derdiket, di van demê dawî de bû fermî û êdî bi awayekî fermî derdikeve.
Peyam
Peyam kovareke çandî, hunerî û ramanî ye ku di rezbera 2012'yan de dest bi weşanê kir. Kovarê dabû ber xwe ku mehê carekê derê lê di çar mehan de tenê 2 hejmar derxist û hejmara wê ya sêyem li ber çapê ye.
Ronahî
Kovara Ronahî wekî kovareke mehane di avrêla 2012'yan de dest bi weşanê kir. Kovara ku ji aliyê meleyên kurd DİAYDER ve tê derxistin bi kurdî û tirkî weşana xwe dike. Heta niha 7 hejmarên wê derketine.
Şewçila
Şewçila kovara bi kirmanckî ya. Şewçila, di wesarê 2011'î de dest bi neşrkerdinî kerde. Kovara edebî û hunerî her demsal Amed de yena hedrekerdin û vejêna. Heta enka 7 (hejmarey payîzê 2012'inan) hejmarê Şewçila vejiyayê.
Tabûlarasa
Li nav kurdan kovara bi navê Tabûlarasa tekane kovara wergerê, tekane kovareke ku tenê li ser beşeke wêjeyê weşana xwe dike ye.
Kovarê di rêbendana 2012'yan de hejmara xwe ya yekemîn derxist û dest bi weşanê kir. Kovarê dabû ber xwe ku du mehan carekê derê lê hejmara wê ya duyemîn di meha pûşperê de derket û îsal karî du hejmaran ragihîne ber destê xwendevanan.
Tîroj
Tîroj kovareke hunerî, çandî û wêjeyî ye her du mehan carekê dertê. Kovara ku ev 9 sal in weşana xwe dike bi tirkî û kurdî her du mehan carekê bi rêk û pêk derdikeve. Yek ji kovarên ku herî bi îstîkrar û bi rêk û pêk dertê jî Tîroj bixwe ye.
Vate
Vate kovara bi kirmanckiya ke hîrê mengan reyke vejêna. Kovara ke Koma Vate kena hedre û neşr kena, bi kirmancî weşaney xo berdewam kena.
W
Kovara W ji aliyê Enstîtuya Kurdî ya Amedê ve tê amade kirin û weşandin. Kovara ku wekî kovara çandî, wêjeyî û hunerî weşana xwe dike du mehan carekê dertê.
Zend
Kovara zanistî û lêkolînî Zend ji aliyê Enstîtuya Kurdî ya Stenbolê ve tê derxistin. Kovara ku wekî kovareke demsalî derdikeve ji aliyê ziman ve nivîsên lêkolînî, nirxandinî diweşîne. Kovarê îsal 3 hejmarên xwe gihandine ber destê xwendevanan.
***
Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.
***
- 2012: Ji nav kurdan hin bûyerên xemgîn
- 2012: 109 kes li girtîgehan mirin
- 2012: Li Qoserê pirtûkên ku herî zêde hatine firotin
- 2012: Li Girtîgehan binpêkirina mafan
- 2012: Peyvên ku herî zêde li wan geriyane
- 2012: Li dinyayê kesên herî hêzdar
- 2012: 10 pirtûkên herî serketî yên New York Timesê
- 2012: Herî zêde van pere kar kir
.jpg)
