21'ê mehê, nûçeyên li ser Rojava…

…Ev nûçe tê nûkirin…

Lahûn Cengî peyamek li ser Rojava belav kir
Siyasetmedar Lahûn Şêx Cengî Talebanî li ser Rojava peyamek belav kir û got, "Bi awayekî fîzîkî ez li girtîgehê me lê ez bi dil li cem we me."
Talebanî li ser hesabê xwe yê facebookê wêneyê xwe yê ligel Mazlum Ebdî jî belav kir û wisa got, "Berxwedan rêya serketinê ye, loma jî ber xwe bidin û bi paş ve venekişin. Hûn li hemberî êrîşan ber xwe birin hûnê civaka navneteweyî bînin ser rê. Ger na, wê kes bersiva we nede. Xwedê ligel yên ber xwe dide ye."

*

ŞÊX MURŞÎD XEZNEWÎ PIRSA PÊŞMERGEYÊN ROJ KIR
Dr. Şêx Murşîd Xeznewî di bernameya Rûdawê li ser rewşa dawî axivî. Xeznewî pirsa Pêşmergeyên Roj jî kir ku hê deng ji wan nayê, "Hûnê kengê biryarê bistînin?"
Va ye ji wê bernameyê çend gotinên Xeznewî:
- Ji HSD'ê bi quwettir hûnê bikaribin hêzeke din li Rojavayê Kurdistanê çêbikin? Egir bi HSD, YPG, YPJ têk here wê Rojavayê Kurdistanê jî têk here.
- Îro tiştê tê xwestin em destên General Mazlum Ebdî li ser maseyê bi quwet bikin. Ew şertên wan hemû giran in, lê em dibînin General çawa dixwaze vê herêmê biparêze, vî miletî biparêze. Ji ber vê, van sêv rojên werê de, her çar parçeyên Kurdistanê, parçeyê pêncan dîaspora, ger bikaribin bexdekî mezin çêbikin li ser Yekîtiya Ewropayê, Amerîka belkî bikaribin muadele bê guhartin. Ji bo vê yekê, li Bakur û Başûrê Kurdistanê, ger hûn bawerin cihek bi navê Rojavayê Kurdistanê heye sînoran bişkînin.
- Berî ku ez daxwaz ji miletê Başûr û Bakurê Kurdistanê bikim, ez berê xwe didim Pêşmergeyên Roj. Hûn li benda çi ne? Kengî? Hûnê kengî xwedanê biryarê bin? Hûnê kengê biryarê bistînin? Hûn rojek wekî îro hûn ne xwedî biryarê bin, kengê? Tu ji Aldar Xelîl ditirsî, yan ji Aldar Xelîl aciz î, kerem bike Aldar Xelîl bide kuştin û miletê xwe biparêze. 
- Hinceta we ew bû, we digot 'Ji bo em şerê birakujiyê nekin em derbasê Rojavayê Kurdistanê nabin'. Îro miletê te tê îbadekirin. Tu hê li bendê yî? Bi kêmî derbas be, wê şerê xwe yê birakujî bike. Bi kêmanî egir em şikestin bila keç û dêyên me di destê we de bin, ne di destê wan ereban de.

*

SAZIYÊN HIQÛQÎ: LI GOR PARASTINA STATUYA ROJAVA GAVAN BIAVÊJIN
Li Amedê, Baroya Amedê, ÎHD û OHD li ber Edliyeya Amedê li ser Rojava daxuyanî dan çapemeniyê.
Saziyan bang li dewletan kir û got, "Banga me li dewletên bandor li ser Sûriye û Rojava heye ye; Li Sûriyeyê li hemberî êrîşa dijî sivîlan, li hemberî êrîşa dijî binpêkirina mafan ji aliyê olî-etnîkî ve divê bêdeng nemînin. Ji bo ji aliyê hiqûqû û siyasî ve parastina statuya Rojava li gor hiqûqa navneteweyî divê gav bêne avêtin."

Li aliyê din saziyan bang li Serokomariya Tirkiyeyê, partyên li MEclisê û bang li partiyên din kir ku Komara Tirkiyeyê ne piştgiriya hêzên radîkal wekî HTŞ û ên din, ligel kurdan û gelên din ên li Sûriyeyê bikevin nava diyalogê û bi vê kedê bidin aştiya mayînde.

*
LI NISÊBÎNÊ ÇÛN SER SÎNOR
Li Nisêbînê bi deh hezaran bi armanca şermezarkirina êrîşên li ser Rêveberiya Xweser ber bi sînorê Qamişloyê ve bi diruşma , “Rojava rûmeta me ye” meşiyan. Bi pêşengiya Platforma Saziyên Demokratîk, bi tevlibûna Hevserokê DEM Partiyê yê Giştî Tuncer Bakirhan û Hevseroka DBP'ê Çîgdem Kiliçgun Uçar, parlamenterên DEM Partiyê, hevşaredar, endam û rêveberên saziyên sivîl en civakî û deh hezaran kes li ber Goristana Hecacê ya li navenda navçeya Nisêbînê kom bûn. Girseyê bi diruşmên, “Rojava rûmet e rûmeta gelê Kurd e” û “Bijî berxwedana Rojava” dest bi meşê kir.

*

KOMÊN ÇETE GIRTÎGEHA EQTANÊ DOPÊÇ KIRIN
Hezên girêdayî HTŞ'ê bi tang, top û droneyan dor li Girtîgeha Eqtanê ya li Reqayê girtin. Di girtîgehê de gelek çeteyên DAIŞ'ê hene. Tê gotin, dorpêçî dewam dike. 
HTŞ'ê berê jî bi ser girtîgehên din de girtibûn û girtiyên DAIŞ'ê serbest berdabûn.

*

HEYETA DEM PARTÎ Û DBP'ê diçe Rojava.
Ji bo nûçeyê, lînkê bitikînin...

*

GORÊN KURDAN XIRA KIRIN
Li Şedadî endamên çeteyên HTŞ'ê êrîşê gorên kurdan kirin û borkoleyên wan şikandin. Di dîmenên hatine belavkirin de ev yek dixuye û yek bi yek berkoleyan dişkînin.

*

Komeleya Pêşmergeyên Dêrîn piştgirî da Rojava 
Komeleya Pêşmergeyên Dêrîn ya Silêmaniyê ji bo piştevaniya Rojavayê Kurdistanê bi beşdarbûna endamên Komeleyê, çalakiyek lidarxist. Di çalakiyê de daxuyaniyek çapemeniyê hate dayîn. 
Serokê Komeleya Pêşmergeyên Dêrîn a Silêmaniyê Cemîl Hewramî destnîşan kir ku êrîşên komên çete yên Sûrî ku bi fermana Colanî li ser Rojavayê Kurdistanê tê kirin, bi armanca qirkirina gelê kurd e.
Serokê Komeleyê Cemîl Hewramî diyar kir ku bi tundî êrîşên çeteyên Colanî li ser gelê wan ê Rojavayê Kurdistanê şermezar dikin.
Cemîl Hewramî her wiha bêdengiya civaka navneteweyî ya beramberî êrişan şermezar kir û banga helwestek ciddî kir.

***

Nûçeya Eleqedar:
20'ê mehê çi qewimîbû, yên derketine pêş...