Îro di civîneke çapemeniyê de ku her yek ji serokê Şîrketa Fezalar ya Perwerde û Fêrkirinê ya tirk Talib Buyuk,serokê zanîngeha Işikê ya taybet Salih Hoşgul,birêvebirê giştî yê zanîngehên taybet yê li wezareta xwendina bilind ya herêma Kurdistanê Hîmdad Ebdulqadir tê de amade bûn, vekirina Zanîngeha Işikê ya taybet a li Hewlêrê hate ragihandin.
Di destpêka civînê de Talib Buyuk hemû kar û projeyên şîrket Fezalar aşkere kir ku ji sala 1994-ê ve li herêma Kurdistanê hatine pêkanîn û got:” Piştî sala 1994-ê me koleja yekê li Hewlêrê vekir û heta nuha jî me li bajarên herêma Kurdistanê 10 kolej vekiriye û nêzî 3400 xwendkar tê de dixwînin ku me moleta vekirina wan ji hikûmeta herêma Kurdistanê wergirtiye.”
Buyuk got:” Piştî serkeftinên ku me di maweya 14 salên borî de bi dest xistiye,hikûmeta herêma Kurdistanê û xelkê Kurdistanê daxwaz ji me kir ku zanîngehekê vekin.Em jî piştî wergirtina moleta wê ji wezareta xwendina bilind ya herêma Kurdistanê, nuha Zanîngeha Işikê ya taybet li Hewlêrê vedikin.”
D. Salih Hoşgul jî got:” Zanîngeha me îsal li gor standardên navdewletî dest bi xwendina xwe dike. Zanîngeha me taybet e û wek hemû zanîngehên din ên Kurdistanê zimanê xwendinê îngîlîzî ye û sala yekê xwendkar tenê bi îngîlîzî dixwîne.”
Hoşgul got:” Zanîngeha me ji 4 fakûlte û 7 beşan pêk tê; fakulteyên pizîşkiya didan,endezyarî,computer,kargêriya aborî.Ji bo her beşî jî 50 xwendkar tê wergirtin.Ji bo xwendinê divê her xwenkar sala yekê 35 hezar dolarî bide û ji bo her salekê din jî 3-5 hezar dolar bide.”
Di heqê xwepêşandana xwendkarên zanîngehên herêma Kurdistanê ya li dijî vekirina zanîngeha Işika tirkî jî birêvebirê giştî yê zanîngehên taybet yê li wezareta xwendina bilind ya herêma Kurdistanê Hîmdad Ebdulqadir got:” Me wek wezareta xwendina bilind hemû rêyên zanîstiyê girtiye ber, ev zanîngeh jî hemû mercên zanîstiyê yên navdewletî tê de ne ku dê di dahatûyê de xizmeta xelkê herêma Kurdistanê bikin lewra em ne digel daxwaza xwendkaran in.”
Ji PUKmedia hatiye girtin
Wekî têbinî: Fezalar wekî şîrketeke derdora Fetullah Gulen tê nasîn.