Diyarname
Çend roj berê Brahîmê Alûcî bi navê "Ferhenga Derûnnasiyê" e-pirtûkek belav kir û me jî nûçeya wê çêkir. Kovara Psychology Kurdî bi ser hesabê xwe re îdîa kir ku Alûcî keda wan a salan wekî ya xwe belav kiriye. Alûcî jî dibêje tiştek wisa nîn e.

Kovara Psychology Kurdî di peyama xwe de gotiye, "Brahîm Alûcî, di sala 2016an de dema me dest bi xebatên xwe yên kovarê kir, yek ji edîtorên kovara me bû. Di wê demê de xebatên me yên li ser termên derûnnasiyê jî dest pê kiribûn û me her hejmar di dawiya kovarê de cih dida van terman heta îro. Brahîm Alûcî heta hejmara 12an bi me re bû, lê piştre bi îradeya xwe ji xebatên kovara me vekişiya". 

'KEDA ME YA SALAN A HEVPAR SER NAVÊ XWE ÇAP KIRIYE'
Kovarê paşê gotiye, "Ke keda me ya gelek salan a hevpar ku bi baldarî dihat meşandin ji aliyê wî ve hefteya borî bi awayekî lezgîn wekî e-pirtûkekê bi tena serî hat weşandin" û wiha dom kiriye, "Li gel ku dizanîbû armanceke Kovara Psychology Kurdî bi vî awayî heye, ferheng li ber qedandinê ye û dê di demeke nêz de ev xebata hevpar dê wekî ferhengekê ji aliyê Psychology Kurdî ve bê çapkirin jî termên em bi salan e li ser dixebitin tevî hin zêdekirinan weşandin û haya me bi we re ji vî tiştî çêbû. Hevkarên me jî di nav de ji gelek kesan re dişîne, ji wan dixwaze ku ew jî di rûpelên xwe de parve bikin. Ev rêbaza ku wî hilbijartiye, ne etîk e."
Kovarê gotiye "Wekî ku hûn jî dizanin, heke termek bi awayekî şaş bê sazkirin, ew term wisa tê pejirandin û bikaranîn ku ev yek ji feydeyê zêdetir zererê dide qadê. Sedemek ji sedemên ku me heta niha termên derûnnasiyê çap nekirine jî ev bû. Me nexwest termek bi xeletî bê sazkirin û bi vî awayî rûne" û wisa dawî li gotina xwe aniye, "Li gel vê, ya rastî pêşî me nexwest em têkevin nîqaşeke bi vî rengî, lê li ser daxwaza heval û dostan, me biryar da ku em daxuyaniyeke wiha belav bikin."

'MIN JI WAN TU GOTINEK NEGIRTIYE'
Li ser vê yekê me xwe gihand nivîskar Brahîmê Alûcî û mesele jê jê pirsî. Alûcê dibêje, "Tu gotinek min jî wan negirtiye û heqê wan tune vê bûxdanê têxin stûyê min. Bila xebata min û ya xwe bidin ber hev, gotinek wan di nav xebata min de hebe ser çavan. Wekî din, min di pêşgotina xwe de diyar kiriye û çavkanî jî hene ku diyar in."

Alûcî dibêje, "Di X'yê jî min gotina xwe got û gotina min ya di X'yê de jî ev e; Xwedê mirov ji bêbextî û buxtana bistirîne. Hin kes rabûnûn min bi dizandina xebata xwe tomedbar dikin. Keremkin hûn biryarê bidin:  Ev mînakeke ji xebata wan e (yê di wêne de xuya dike)"

Fotoyê ku Brahîmê Alûcî qal dike ev e.

***

Nûçeya Eleqedar:

- 'Ferhenga Derûnnasiyê' wekî e-pirtûk derket