Diyarname
24'emîn Kongreya Sosyalîst Enternasyonal (SI) ev du roj in li Başûrê Afrîkayê li dar e. Hevseroka BDP'ê Gultan Kişanak îro li SI'yê axivî. Kişanak got ku hem zordariya li ser kurdan, hem jî têkoşîna kurdan bilind bûye û got: "Em dibêjin divê ne şer û şîdet, aştî û demokrasî bi ser bikeve. Ez bang li we dikim ku li Tirkiye û Rojhilata Navîn hûn piştgiriyê bidin têkoşîna kurdan û têkoşina partiya me ku em ji bo aştî û demokrasiyê têdikoşin."

Kişanak li ser kurdên rojavayê Kurdistanê û li ser Tirkiyeyê axivî. Vane hin gotinên Kişanak:

- Divê li Sûriyeyê em guherîna ku bingeha wê li ser azadî û yekîtiya demokratîk a gelan e teşwîq bikin.
- Di nav muxalîfên li Sûriyeyê de tekane hêza ku bernameya xwe ya siyasî ragihandiye dinyayê hêza kurd e. Ji partiyên siyasî yên cuda kurd hatine ba hev û Konseya Bilind a Kurd ava kirine; ew dixwazin li bakurê Sûrilelê herêma xweser a Kurdistanê ava bikin. Bi awayekî fiîlî ev yek çêkirine jî. Li rojavaya Kurdistanê li gelek bajaran meclisên gel ava kirine, dikin ku xweseriya demokratîk ava bikin.
- Em wekî BDP, em piştgirî didin ev polîtîkaya kurdan ku dane ber xwe. Hemû welatên ku li Sûriyeyê guherînê dixwazin em bang li wan dikin ku bi kurdan re bikevin nav têkiliyê û piştgirî bidin wan.
- Bêyî kurdan li Sûriyeyê rejimeke demokratîk ne mimkûn e bê sazkirin. Divê Tirkiye herêma xweser a li bakurê Sûriyeyê qekî "tehdîd"ek nebîne.
- Di salên dawî de bi pêvajoya YE'yê (Yekîtiya Ewropayê) re li Tirkiyeyê qala reforman tê kirin lê tu pêşketinek baş çênebûye.
- Li Tirkiyeyê kurd ku 20 mîlyon in ne xwediyê tu mafî ne. Hê jî dibêjin "Her kesê li Tirkiyeyê dijî tirk e" û digel hemû cudahiyan, kurdan jî tune dihesibînin.
- Em kurd, em dixwazin bi zimanê xwe yê zikmakî perwerdehiya bi kurdî bibînin, di nav saziyên dewletê de zimanê xwe bikar bînin û li herêmên xweser beşdarî rêveberiyê bibin.. Em ne tenê ji bo kurdan ji bo hemû gelên li Tirkiyeyê van mafan dixwazin. Lê hikumeta AKP'ê bi tundî dijî van daxwazan derdikeve.
- Niha li girtîgehên Tirkiyeyê nêzî 8 hezar girtiyên polîtîk hene. Piraniya van girtiyan endamên partiya me ne. Di nav van de 6 mebûsên BDP'ê, 32  şaredarên BDP'ê û 190 jî endamên Meclisên Şaredariyan ên BDP'ê hene. Her wiha di nav van giriyan de gelek parêzer, rojnameger, sendîkavan, parêzvanên mafên mirovan, endamên tevgera jinan û xwendekar hene. Hê jî nahêlin girtî bi kurdî parastina xwe bikin.
- Bi awayekî eşkere mafê siyaseta demokratîk, azadiya rêxistinkirinê, vegotina azadiya ramanê û mafê parastinê di bin tehdîdê de ye.

***

Nûçeya eleqedar:

- BDP li Sosyalîst Enternasyonal e